Сусветны Супербайк таксама небяспечны. Аб гэтым нагадаў яго этап у Парцімане

Фота: worldsbk.com

У гонках па-ранейшаму можна загінуць, асабліва ў матацыклетных. Нават у малодшых класах, як Supersport 300 чэмпіянату свету па Супербайку, для аднаго з герояў якога Віктара Сцеэмана этап у Парцімане стаў апошнім у яго жыцці.

Гібель мотагоншчыкаў – гэта ўсё роўна выключныя выпадкі, хоць, на жаль, не такія ўжо і рэдкія. А вось гібель украінцаў за апошнія амаль восем месяцаў стала ўжо нечым паўсядзённым. Расійска-фашысцкія захопнікі працягваюць абстрэльваць гарады Украіны усім, што ў іх ёсць.

Парламенцкая асамблея рады Еўропы нарэшце прызнала расійскі рэжым тэрарыстычным, што было зразумела ўсім яшчэ ў лютым. Аднак слоў мала, каб спыніць агрэсію звар’яцелага дыктатара – Украіне патрэбная зброя. Добра хоць, што і гэта Захад, які Украіна абараняе, разумее, і дапамагаць гатовы.

На баку Украіны ваююць і дапамагаюць ёй і беларусы, якія не па чутках ведаюць, што такое акупацыя і дыктатура. Мы таксама прагнем свабоды і зычым перамогі ўкраінцам. Іх перамога дапаможа нам дарабіць тое, што мы пачалі ў 2020 годзе, каб далей жыць у добрасуседстве і без саўковай імперыі. Слава Україні! Героям Слава! Верым! Можам! Пераможам! Жыве Беларусь!

Пра цэннасць чалавечага жыцця добра вядома не толькі народам, якія губляюць сваіх грамадзян у войнах, але і мотагоншчыкам. Адзін з іх, 22-гадовы нідэрландзец Віктар Сцеэман (на галоўным фота), атрымаў цяжкую траўму галавы ў аварыі падчас суботняй гонцы катэгорыі Supersport 300 на трасе Альгарвэ ў партугальскім Парцімане.

Пасля інцыдэнту заезд быў тэрмінова спынены чырвонымі сцягамі. Гоншчык быў тэрмінова дастаўлены спачатку ў медычны цэнтр трасы, а потым верталётам перавезены ў шпіталь горада Фару, дзе ў аўторак 11 кастрычніка памёр.

«Гоначная псіхапатыя» далучаецца да ўсіх спачуванняў, якія гоначны свет выказаў за апошнія дні родным і блізкім Віктара. Мотагонкі надзвычай небяспечныя, і яшчэ доўга, калі не заўсёды, будуць такімі. Мотагоншчыкі будуць гінуць нават праз дзесяцігоддзі пасля таго, як украінцы атрымаюць перамогу ў сваёй вялікай айчыннай вайне і перастануць гінуць ад рук расійскіх акупантаў.

У гонках галоўнай катэгорыі WSBK абышлося без трагедый, дый, шчыра кажучы, без асаблівых драм. Хоць і не без барацьбы за перамогу ў заездах. У першым суботнім, які праз трагічную аварыю Віктара Сцеэмана быў скарочаны, яна развярнулася паміж дзейсным чэмпіёнам сусветнага Супербайка Топракам Разгатліоглу з Pata Yamaha with Brixx WorldSBK і яго шасціразовым чэмпіёнам Джонатанам Рэем з Kawasaki Racing Team WorldSBK.

Брытанец стартаваў з поўлу, але турак абагнаў яго на галоўнай прамой у пачатку шостага круга, выйшаў наперад і перамог. У спрэчцы са сваім напарнікам Алексам Лоўсам Рэй пазіцыю адстаяў, а вось у спрэчцы з лідарам чэмпіянату з Aruba.it Racing-Ducati Альвара Баўцістай – не.

Іспанец стартаваў пятым, але пад канец першай гонкі быў адным з самых хуткіх. Самы актыўны супраціў яму аказаў прадстаўнік Motocorsa Racing Аксэль Басані – італьянца Баўцісце ў барацьбе за трэцюю пазіцыю прыйшлося абганяць двойчы, бо пасля першай спробы на восьмым кругу ён шырока выехаў у першым павароце. На адзінаццатым жа кругу Альвара канчаткова адабраў у Басані трэцюю пазіцыю, а праз круг на галоўнай прамой – другую ў Рэя, які ў выніку задаволіўся трэцім месцам.

Аналагічна тройка прызёраў выглядала і пасля ранішняга нядзельнага суперпоўл-спрынта. Хіба што Баўціста ў гэты раз прарваўся наперад хутчэй і да апошняга ціснуў на Разгатліоглу ў барацьбе за перамогу. Якую нарэшце атрымаў у фінальнай гонцы, яку, у адпаведнасці з вынікамі спрынту, пачынаў з другой пазіцыі.

Пры гэтым на старце іх з Топракам абагнаў Рэй, які лідзіраваў да дзявятага круга, калі яго ў першым павароце абагнаў Разгатліоглу. Праўда, сам Джонатан двума кругамі пазней адказаў яму ў тым жа самым месцы. Турак жа яшчэ і Баўцісту прапусціў наперад, каб той на сярэдзіне дыстанцыі ў дзясятым павароце абагнаў Рэя.

Хутка гоншчык Kawasaki апынуўся і за спінай у Разгатліоглу, які пачаў набліжацца да Баўцісты, з якім у яго ўсё ж такі адбылася кароткая, але прыгожая дуэль. На чатырнаццатым кругу ў трынаццатым павароце дзейсны чэмпіён выйшаў быў наперад, аднак лідар чэмпіянату ў чарговы раз выкарыстаў магутнасць рухавіка сваёй Ducati Panigale V4R і паспяхова контратакаваў на галоўнай прамой.

Другім фінішаваў ужо Разгатліоглу, а Рэй у трэці раз за ўік-энд замкнуў першую тройку. Замыкае яе Джонатан і ў чэмпіянаце, дзе ў яго 366 ачкоў. Разгатліоглу з 392 баламі пакрысе адрываецца, замацоўваючыся на другой пазіцыі. Ну а лідзіруе па-ранейшаму, і па-ранейшаму ўпэўнена, Баўціста, у якога 448 ачкоў. Ducati з 479 баламі лідзіруе сярод вытворцаў. Yamaha займае другую пазіцыю і мае 433 ачкі, Kawasaki на трэцяй з 394 баламі.

Сезон сусветнага Супербайка пакрысе набліжаецца да завяршэння, і яго этап у Парцімане быў апошнім з еўрапейскіх у гэтым годзе. Застаецца ўсяго тры, наступны пройдзе 21-23 кастрычніка ў аргенцінскім Сан-Хуане.