Двухразовая алімпійская чэмпіёнка па трэкавых велагонках Арчыбальд завяршыла кар’еру – цяпер яна вучыцца на медсястру
Двухразовая алімпійская чэмпіёнка па трэкавых велагонках, шатландка Кэці Арчыбальд, абвясціла пра завяршэнне кар’еры.
32-гадовая спартсменка паведаміла пра гэта на сваёй старонцы ў Instagram.
«Я завяршаю кар’еру, таму дазвольце мне напісаць крыху доўгі і сентыментальны пост», – падпісала пост Арчыбальд, у якім патлумачыла сваё рашэнне.
«Мой першы трэнер, Алістэр Уотсан, прымусіў мяне паверыць, што я магу стаць добрай веласіпедысткай. Я дагэтуль не ўпэўненая, чаму ён гэта зрабіў, але ўжо паўтара дзесятка гадоў правяраю, ці меў ён рацыю. За гэты час я двойчы станавілася алімпійскай чэмпіёнкай, сем разоў чэмпіёнкай свету, а ў 2016 годзе адкрыла для сябе, што магу жымам нагамі падняць адной нагой тое, што мой тата падымае дзвюма. Больш мне няма чаго дасягаць, і таму сёння я абвяшчаю пра завяршэнне прафесійнай кар’еры.
Акрамя ўсіх слоў падзякі, я таксама хачу папрасіць прабачэння за час гэтай аб’явы і за тое, што не змагу выступіць на нашых хатніх Гульнях Садружнасці. Я вельмі хацела выйсці на старт, але мой розум і цела кажуць «не». Прыйшоў час ззяць новаму пакаленню, і гэта пакаленне гоншчыц сапраўды здольнае зрабіць Шатландыю ганарлівай», – напісала Арчыбальд.
Кэці Арчыбальд за сваю кар’еру заваявала дзве залатыя і адну срэбраную медаль Алімпійскіх гульняў, сем тытулаў чэмпіёнкі свету і 21 золата чэмпіянатаў Еўропы па трэкавым веласпорце.
У снежні мінулага года Арчыбальд была ўключана ў склад зборнай Шатландыі на хатнія Гульні Садружнасці‑2026, якія пройдуць у Глазга з 23 ліпеня па 2 жніўня.
У сваім каментары для British Cycling 32-гадовая шатландка распавяла, што цяпер вучыцца на медсястру і «поўнасцю ўлюбілася ў гэтую справу», асабліва таму, што «гэта так асабліва – быць чалавекам, якому давяраюць, калі патрэбна дапамога».
