Як за год змяніўся «Дандалк»
Дапамагаем Аляксандру Ермаковічу са зборам інфармацыі па ірландскаму чэмпіёну.
Аляксандр Ермаковіч наракаў на тое, што ў мінулым годзе мала было інфармацыі па «Дандалку». Што ж, у гэтым годзе падобнае не пройдзе. У гэтым артыкуле я распавяду, як змяніўся ірландскі клуб пасля леташняй сустрэчы з БАТЭ.
Год таму я расказваў пра клуб, пра яго фанатаў і сам горад Дандалк, абавязкова зірніце.
Зараз жа разбярэмся, што ў клубе за мінулы сезон змянілася.
Як за год змяніўся склад каманды?
Прайшло крыху больш за год пасля сустрэчы ірландскага чэмпіёна і беларускага. За гэты час і «Дандалк», і БАТЭ зноў выйгралі чэмпіянаты сваіх краін, а ірландцы ў дадатак здолелі ўпершыню за 13 гадоў выйграць Кубак Ірландыі.
Аднак вялікіх змяненняў у складзе не адбылося. Малюнак гульні каманды за гэты год ні кропелькі не змяніўся. Стэфан Кені [галоўны трэнер] працягвае выкарыстоўваць звыклую схему 4-2-3-1. Лінія абароны грунтоўна замацаваная за Мэсі, Бойлам, Гартландам ды Гэнанам, і толькі спераду адбываюцца адзінкавыя ратацыі.
Калі параўноўваць хатнія матчы 2-га кваліфікацыйнага раўнда ЛЧ супраць БАТЭ і супраць «Хабнарф’ёрдзюра», то ў стартавым складзе толькі дзве змены:
За гэты год клуб пакінулі 7 гульцоў (у асноўным рэзервісты). Галоўнай стратай стаў сыход Рычы Тоўэла ў англійскі «Брайтан». За тры сезоны паўабаронца згуляў у 102 гульнях і забіў 45 галоў. Выхаванец «Норвічу» Курціс Бёрн пасля трох сезонаў таксама вырашыў змяніць становішча. Наступным клубам нападніка стаў знаёмы барысаўчанам «Багеміянс».
На змену тым, хто сышлі, падпісалі толькі трох пачаткоўца. Нападаючы Кіла Кірдаф перабраўся з «Сэнт-Патрыкса», Патрык МакЭлені прыйшоў на замену Тоўэлу з «Дэры Сіці», а Робі Бэнсан перабраўся з «УКД», які выступае ў другім дывізіёне Ірландыі.
Дарэчы, «Дандалк» за ўсе гэтыя пераходы не выдаткаваў ні еўра, зрэшты, клуб нічога і не зарабіў.
Па версіі transfermarkt «Дандалк» патаннеў на 30,8%. За год агульны кошт клуба ўпаў з 1,3 млн еўра да 900 тысяч. Да прыкладу, кошт БАТЭ вырас на 13,6%: з 16,55 млн да 18,8 мільёнаў еўра.
У якой форме падыходзіць каманда?
На працягу двух гадоў «Дандалк» «тэрарызуе» чэмпіянат Ірландыі. Каманда ідзе роўна, адбіраючы ачкі ва ўсіх супернікаў. Для параўнання возьмем статыстыку першай паловы чэмпіянату 2015 і 2016 сезонаў (усе матчы чэмпіянату да сустрэчы з БАТЭ).
У мінулым годзе да сустрэчы з нашым чэмпіёнам «Дандалк» згуляў 19 матчаў нацыянальнага першынства, дзе толькі аднойчы прайграў і двойчы падзяліў ачкі. Каманда выйграла 8 з 9 хатніх матчаў, у сярэднім забіваючы па 3 мячы за гульню.
У сезоне-2016 клуб згуляў 18 матчаў і паказаў моцную гульню на выездзе: 8 перамог з 9, 3.2 мячы за гульню. У гэтым годзе «Дандалк» здолеў спыніць толькі «Корк Сіці», які двойчы абыграў чэмпіёна.
Статыстычныя паказчыкі «Дандалка» да сустрэчы ў ЛЧ з БАТЭ ў 2015 і 2016 гадах
Аднак упэўненая гульня чэмпіёна чамусьці страціла добрую частку заўзятараў на трыбунах. У параўнанні з мінулым сезонам хатнія матчы «Дандалка» наведваюць на 25% менш прыхільнікаў. Мабыць, ім надакучыла гегемонія. Знаёмая сітуацыя?
Статыстыка ў каманды, вядома, добрая, месцамі нават лепш, чым у БАТЭ, аднак чэмпіянат Ірландыі не паказчык для нас. Таму пяройдзем да матчаў кваліфікацыі ЛЧ.
«Хабнарф’ёрдзюр» – «Дандалк»
На працягу апошніх 12 сезонаў «Хабнарф’ёрдзюр» нязменна прадстаўляў Ісландыю ў еўракубках. Каманда яшчэ не прабівалася ў групавы этап ЛЕ ці ЛЧ, але неаднаразова праходзіла больш моцных супернікаў у кваліфікацыі, да прыкладу, наш «Нёман». Супернік «Дандалку» выпаў вельмі сур’ёзны, у дадатак – нязручны вынік першай хатняй гульні (1-1).
Гульня ў адказ першапачаткова пайшла не па плане. Цэнтральны абаронца Браян Гартланд атрымаў пашкоджанне ў першым матчы, што істотна паўплывала на дзеянні ірландскага чэмпіёна каманды ў абароне.
Шыкоўная галявая атака ў выкананні ісландцаў:
Першы тайм каманды спакойна дайгралі, а вось у пачатку другога ірландцы проста «задушылі» сваіх суседзяў. На 48-й хвіліне Нільсэн парыруе пенальці ў выкананні Ронана Фіна, а праз 4 хвіліны ўжо дастае мяч з сеткі брамы: далёкім стрэлам вызначыўся МакМілан. Ірландцы працягнулі валодаць мячом і атакаваць. На 62-й хвіліне МакМілан афармляе дубль.
Далей гульня перайшла на палову «Дандалка». На 78-й хвіліне зноў правал у цэнтры абароны, і лік становіцца 2-2:
Ісландцы працягнулі атакаваць, часцей за ўсё закідваючы мяч у штрафную суперніка. І варта сказаць, што гэта ў іх атрымлівалася, мяч без асаблівых праблем сустракаўся з нагой нападніка, аднак да ўдару справа не даходзіла: мяч часцей за ўсё «злятаў» з нагі ісландца. Трэці раз забіць у браму гасцей так і не атрымалася.
Каго варта сцерагчыся?
Галоўнай зоркай каманды з’яўляецца ўжо знаёмы нам Дэвід МакМілан. Менавіта Дэвід даў надзею ірландскім заўзятарам, забіўшы ў выязным матчы з БАТЭ. У гэтым сезоне МакМілан відавочна дадаў: за 17 гульняў забіў 12 мячоў. Улічваючы, што ў сярэднім гулец праводзіць на полі ўсяго 63 хвіліны, гэта вельмі прыстойны вынік. Галоўны коўч часта змяняе нападаючага ў канцы гульні ці зусім пакідае на замене, выпускаючы толькі пад канец. Усяго 5 матчаў МакМілан сыграў ад званка да званка.
Але апусцім матчы нацыянальнага першынства і пераключымся да еўракубкаў. Тут Дэвід – сапраўдны кароль Дандалка. За апошнія два гады ірландзец адыграў у чатырох матчах адборачнага раўнда ЛЧ, дзе забіў 4 галы: адзін у мінулым годзе БАТЭ, у гэтым – тры «Хабнарф’ёрдзюру». У сезоне-2014/15 «Дандалк» гуляў у першым і ў другім раўндах ЛЕ, дзе за 4 гульні Дэвід аддаў тры галявыя перадачы. 4+3 – моцны паказчык для гульца такога ўзроўню.
Таксама ў родным першынстве нядрэнна глядзіцца ўжо знаёмы Барысаву Ронан Фін. Цэнтральны паўабаронца прыняў удзел ва ўсіх 18 матчах і забіў 7 мячоў. Таксама нядрэнная статыстыка ў Кіла Кірдафа. Нападаючы згуляў у 11 матчах і забіў 5 разоў. Варта ўлічваць, што часцей за ўсё Кірдаф выходзіць замест МакМілана.
***
Не трэба быць футбольным аналітыкам, каб зразумець, што ў матчах з БАТЭ «Дандалк» будзе адседжвацца ў абароне і чакаць патрэбнага моманту. Гэта і было ў мінулым годзе ў Барысаве.
Ірландцы часцей за ўсё атакуюць праз цэнтр, дзе ў барысаўчан не ўсё добра. Узгадайце ляп і імгненнае геройства Гайдучыка ў матчы з СІКам. Праблема ў абароне і ў ірландскага чэмпіёна. Адсутнасць Гартланда можа моцна ўдарыць па цэнтры, што і адбылося ў матчы ў адказ з ісландцамі. Ды і самі гульцы адрозніваюцца сваёй марудлівасцю і непаваротлівасцю.
Больш за тое «Дандалк», не зможа згуляць на родным стадыёне, што істотна можа паўплываць на атмасфэру гульні.
Ніякіх фіфці-фіфці, адназначна БАТЭ павінен праходзіць у плэй-оф. Супернік знаёмы, поле роўнае, мяч круглы, усё ў руках і нагах нашага чэмпіёна.
Іншыя пасты карыстальніка
