У Брэсце прыбіраюць Сяднёва, старыкоў і мары пра медалі, але ўсе планы падвіслі
Галоўнае пытанне: як жыць далей?
Перад стартам сезона-2025 брэсцкае «Дынама» ўражвала: брала статусных навічкоў, але што важней – угаварыла Аляксандра Сяднёва ўзначаліць каманду. Пасля таго, як трэнер стаў чэмпіёнам у Казахстане, яго статус моцна вырас, хаця і раней знаходзіўся на высокім узроўні. Кіраўніцтва хацела мінімум пападання ў топ-3, але лепей – залатыя медалі. На адным са сходаў дынамаўцам агучылі такія мэты, а Сяднёву за высокія месцы абяцалі бонусы, хаця ён прасіў заробак пабольш.
Як Сяднёва ўсё ж угаварылі ў Брэсце: заробак у разы меншы, чым хацелася, але ёсць важныя гарантыі
Але год склаўся зусім інакш. Выніковае месца – 4-е, аднак без шанцаў на медалі (6 пунктаў да бронзы і ўсяго 2 – да 7-га радка). Што тут казаць пра чэмпіёнства. Сяднёў расчараваў брэсцкую публіку не толькі вынікамі, але і панылай гульнёй. Да таго ж сам сцвярджаў, што на тройку яго і не нацэльвалі зусім – задачай нібы было пабудаваць каманду на перспектыву.
Почему в Бресте плюются от футбола Седнева (тренера очевидно уже достал свист с трибун)
Па інфармацыі «Трыбуны», у Брэсце рыхтуюцца да чарговай змены курса – ужо без чэмпіёнскіх амбіцый і без 52-гадовага Сяднёва, кантракт якога заканчваецца 31 снежня. Спецыялісту пачалі шукаць замену яшчэ за некалькі тураў да канца чэмпіянату. Сам трэнер у курсе, што далей з ім супрацоўнічаць брастаўчане не будуць.
Сяднёў сапраўды ў нейкі момант здолеў пераканаць клубнае кіраўніцтва, што на пабудову моцнай каманды патрэбны не адзін год. І босы нават збіраліся падоўжыць дамову, даўшы месячны аклад прыкладна ў 4 тысячы долараў да выліку падаткаў.
Але бліжэй да фінішу ЧБ дынамаўскі менеджмент палічыў утрыманне трэнера бессэнсоўным. Нашыя крыніцы ў клубе сцвярджаюць, што верагоднасць сыходу Сяднёва практычна стоадсоткавая. Інсайдары паведамляюць, што на замену разглядаюцца Вадзім Скрыпчанка і Сяргей Ташуеў. Але, паводле нашых звестак, прадметных перамоў пакуль ні з кім не вялося.
Сяднёў жа наўрад ці застанецца без працы надоўга. Калі варыянт з мінскім «Дынама», здаецца, адпаў (паводле звестак інсайдараў, экс-чэмпіёнаў узначаліць Аляксандр Шагойка, чыю кандыдатуру падтрымаў спартыўны дырэктар клуба Станіслаў Драгун), то магчымасці ўладкавацца ў Казахстане застаюцца.
Яшчэ ў сярэдзіне лета прадметную цікавасць да беларуса меў адроджаны ў 2024-м «Іртыш» з Паўладара. У гэтым годзе клуб вярнуўся ў прэм’ер-лігу Казахстана. Дарадцам прэзідэнта «Іртыша» сёння з’яўляецца Улугбек Асанбаеў. Ён вёў справы экс-абаронцы «Энергетыка-БДУ» Абдукадыра Хусанава і дапамагаў таму перайсці з «Ланса» ў «Манчэстэр Сіці». З Сяднёвым жа функцыянера звязвае тое, што ў часы працы трэнера ў «Актобе» Асанбаеў там жа быў спартыўным дырэктарам. І пасля ад’езду коўча з Казахстана гэтыя двое застаюцца на сувязі.
Якраз у «Іртыш» улетку з’ехаў паўабаронца Уладзіслаў Васільеў, які пачынаў 2025-ы ў Брэсце пад кіраўніцтвам Сяднёва.
У «Дынама» зменіцца не толькі галоўны трэнер, але і сама каманда. Прыкладна гэтак жа, як у «Тарпеда-БелАЗ», якое таксама марыла і пра медалі агулам, і пра чэмпіёнства ў прыватнасці, але засталося ні з чым.
У Брэсце таксама бяруць курс на амаладжэнне і перастаюць усур’ёз думаць пра п’едэстал.
Шэрагу гульцоў брастаўчан, у першую чаргу ўзроставым, ужо паведамілі пра тое, што новых кантрактаў не будзе. «Лішнімі», паводле нашых звестак, сталі 32-гадовы паўабаронца Антон Шрамчанка, 34-гадовы абаронца Дзяніс Палякоў, 36-гадовы форвард Міхаіл Гардзяйчук і 34-гадовы брамнік Дзмітрый Дудар. Выключэннем у катэгорыі «30+» з’яўляецца Арцём Быкаў. Кантракт 33-гадовага хаўбека разлічаны да канца 2026-га, хаця хто ведае.
Адзначым, што, паводле «Трансфермаркту», з дзейнымі пагадненнямі ў 2026-ы уступяць яшчэ васьмёра: абаронцы Мікіта Сцяпанаў (29 гадоў), Максім Касараб (22), Аляксандр Паўлавец (29), Раман Юзэпчук (28); хаўбекі Іван Зянькоў (22), Андрэй Рылач (23), Ягор Карцоў (25), нападнік Дзяніс Максімавіч Кавалевіч (22).
Ёсць тыя, каму ў клубе паведамілі пра жаданне працаваць разам і надалей. Гэта маладыя выканаўцы – 25-гадовы абаронца Аляксей Лаўрык, 24-гадовы паўабаронца Дзяніс Руслановіч Кавалевіч.
У сезоне-2025 сярэдні ўзрост брэсцкага «Дынама» складаў 27 гадоў. Такі ж меў «МЛ», а старэйшымі былі толькі «Тарпеда-БелАЗ» (27,7) і «Нёман» (27,9). Пасля перакройвання складу брастаўчане прыкметна амалодзяцца.
Улетку Брэст набраў зорных гульцоў – вось што ў іх атрымалася з Сяднёвым
Зрэшты, пра тое, што гэты план ажыццявіцца, пакуль варта гаварыць з асцярожнасцю. Па нашых звестках, клубнае кіраўніцтва пакуль паставіла на паўзу і пошук навічкоў, і прадметныя размовы з тымі, каго хочацца захаваць (да Лаўрыка і Кавалевіча проста зафіксавалі цікавасць). Справа ў тым, што ў «Дынама» ўвогуле не разумеюць, як будуць жыць па новым указе аб рэжымнай падтрымцы спорту, які пачне дзейнічаць з 1 студзеня. Яшчэ няма дамоўленасцяў са спонсарамі і партнёрамі, а значыць, і няма яснасці па фінансавых магчымасцях клуба.
Сёння можна толькі фантазіраваць, у якім стане каманда выйдзе з адпачынку.
Іншыя пасты карыстальніка
