Не клікалі ў ЧБ, але Скрыпчанка знайшоў большы заробак у Азіі – новы бос зрабіў мільярд на рынку і ігнаруе прэзідэнта краіны
Вось чаму трэнер паехаў на Усход без памочнікаў.
3 чэрвеня 50-гадовы беларускі трэнер Вадзім Скрыпчанка афіцыйна узначаліў «Дардой» са сталіцы Кыргызстана Бішкека. Кантракт – да канца мясцовага сезона ў сярэдзіне лістапада. «Трыбуна» даведалася падрабязнасці, як для Скрыпчанкі знайшлася новая праца.
Трэнер года Беларусі-2024 заставаўся без працы з 5 лістапада 2025-га пасля кароткага няўдалага перыяду ў тыраспальскім «Шэрыфе» з Малдовы.
Далей хадзілі чуткі, што трэнер можа узначаліць зборную Беларусі, замяніць Аляксандра Сяднёва ў брэсцкім «Дынама», прыйсці у «Енісей» з Д2 Расіі. Але нічога з гэтага не адбылося. Па нашых даных, з ЧБ на коўча насамрэч ніхто не выходзіў. Прадстаўнікі чэмпіянатаў Расіі і Казахстана звязваліся, але да канкрэтыкі не даходзіла – пыталіся, маўляў, ці цікава было б папрацаваць, а далей кантакты развіцця не атрымлівалі.
Сапраўды канкрэтная прапанова паступіла толькі ў канцы траўня. Прэзідэнт «Дардоя» Аскар Салымбекаў звязаўся са Скрыпчанкам і выказаў жаданне бачыць яго на пасадзе галоўнага трэнера.
Былы сакратар камсамола мясцовага інстытута фізкультуры Салымбекаў у пачатку 1990-х заснаваў у Бішкеку рынак «Дардой» і дагэтуль яго кантралюе. Гэтая велізарная прастора доўгі час была галоўнай перавалачнай базай для кітайскага шырспажыву ў краіны былога СССР. Лічыцца, што так Салымбекаў стаў мільярдэрам і ўзбагаціў сям’ю. Пры гэтым рынак дагэтуль жыве стандартамі мінулага стагоддзя – у красавіку прэзідэнт Кыргызстана Садыр Жапараў паскардзіўся, што бізнесмен праігнараваў патрабаванне пабудаваць сучасны комплекс, і прыгразіў спытаць за гэта.
Футбольны клуб «Дардой» той жа Салымбекаў заснаваў у 1997-м. З 2005-га па 2010-ы каманда нязменна выходзіла ў фінал Кубка прэзідэнта АФК, азіяцкага турніру для чэмпіёнаў найслабейшых краін канфедэрацыі, а ў 2006-м і 2007-м брала трафей. Паралельна былі часы гегемоніі – з 2004-га па 2014-ы ўпусцілі толькі два чэмпіёнскія тытулы. З 2018-га па 2021-ы ўзялі чатыры запар, давёўшы агульную колькасць да 13.
З таго часу каманда ў чэмпіянаце Кыргызстана займала чацвёртае, трэцяе, другое і зноў чацвёртае месцы. Таксама летась узяла свой 11-ы ўсяго і першы з 2018-га Кубак Кыргызстана. Аднак у гэтым годзе ў лізе стартавала правальна – за 11 матчаў набрана толькі 10 ачкоў. Гэта ў турніры, пашыраным да 16 каманд, дазваляе толькі дзяліць 12-ю пазіцыю з двума супернікамі, у аднаго з якіх матч у запасе.
На фоне такіх вынікаў вырашылі замяніць 52-гадовага экс-гульца зборнай Кыргызстана Уладзіміра Салу, які ўзначальваў «Дардой» з лета 2024-га. Па нашых даных, у клубе разглядалі некалькі варыянтаў, у тым ліку з досведам працы ў клубах Заходняй Еўропы. Аднак выбралі Скрыпчанку і прыкладна тыдзень таму пачалі перамовы.
У папярэдняй размове Салымбекаў абазначыў трэнеру, што прапануе кантракт да канца сезона, які можа быць працягнуты ў выпадку выканання задач. У чэмпіянаце канкрэтнай мэты не паставіў – проста, маўляў, трэба падымацца ў табліцы (да 7-га месца, напрыклад, усяго чатыры ачкі, да 6-га ўжо больш, дзевяць). У Кубку трэба прайсці чвэрцьфінал, куды «Дардой» ужо прабіўся – там 17 і 28 чэрвеня згуляе з «Нефтчы», які ў чэмпіянаце на тры балы наперадзе. Таксама неабходна падрыхтаваць каманду да раўнда плэй-оф кваліфікацыі Лігі выкліку АФК – у гэты турнір для слабых краін «Дардой» не павінен быў трапляць, але ў супернікаў узніклі складанасці з ліцэнзіяй. У адзіным матчы стадыі 11 жніўня пажадана, вядома, выйграць.
Скрыпчанка сказаў, што падумае, а крыху пазней адказаў згодай. Абмеркаванне канкрэтных дэталяў кантракта са Скрыпчанкам праводзіў спартыўны дырэктар «Дардоя» – 29-гадовы Жанбато Ырысбек уўлу.
Як кажуць нашыя крыніцы ў футболе Кыргызстана, цяпер бюджэт у клуба не надта вялікі, таму трэнеру далі менш за 10 тысяч долараў. Канкрэтная сума не называецца, але яна большая за беларускі лімітавы максімум прыкладна ў 4700 долараў да ўтрымання падаткаў. Калі што, у Кыргызстане ніякіх лімітаў няма. Таксама клуб будзе аплачваць коўчу здымную кватэру або нумар у гасцініцы на выбар.
У «Дардой» са Скрыпчанкам ніхто не прыйшоў. Па ініцыятыве кіраўніцтва ўвесь штаб застаўся ранейшым, і ў ім нават застанецца Сала – яго лічаць добрым спецыялістам, ён у структуры з 2023-га, ведае футбалістаў і мясцовую спецыфіку, пры не самых вялікіх рэсурсах прынёс Кубак. Але калі па выніках сезона кантракт са Скрыпчанкам працягнуць, то ён зможа прывесці сваіх памочнікаў.
Трансфернае акно ў Кыргызстане адкрыецца 1 ліпеня – Скрыпчанка будзе працаваць над камплектаваннем складу. Але падняцца вышэй у чэмпіянаце можна і да гэтага: у «Дардоя» 13 чэрвеня матч з «Ілбірсам» з 11-га месца, 23 чэрвеня – з «Нефтчы» (паміж двума кубкавымі з ім жа) з 8-й пазіцыі. Да таго ж 2 ліпеня прымаць галоўнага аўтсайдара «Кыргызалтын».
Іншыя пасты карыстальніка
