«Нафтан» нібыта бядуе, але падпісвае зборніка з Афрыкі. Той гуляў ва Украіне падчас вайны і адмаўляўся ехаць у Расію

«Нафтан», які ў мінулым сезоне ледзь уратаваўся ад стыкавых матчаў, у трансфернае акно дэманструе сціпласць, але адзін навічок ўсё ж вылучаецца. Паводле інсайда тэлеграм-канала «Ухо», з Наваполацкам падпісаў кантракт 25-гадовы гулец зборнай Замбіі Голдэн Мафвента. Неўзабаве яго мусяць прадставіць афіцыйна.

Пікантнасць пераходу ў тым, што апошнім клубам футбаліста быў харкаўскі «Металіст 1925». Ён не проста выступаў ва Украіне падчас вайны, але адмаўляўся ад паездкі ў Расію, праз што нібыта стаў аб’ектам фэйка тамтэйшай прэсы.

Расказваем яго гісторыю.

Нарадзіўся Мафвента ў Замбіі, дзе і пачынаў кар’еру ў клубах «Занако» і «Білдкон». Яшчэ гуляючы на Радзіме, у 20-гадовым узросце дэбютаваў за зборную падчас паездкі на чэмпіянат афрыканскіх нацый – турнір, у якім краіны прадстаўляюць толькі ўдзельнікі нацыянальных чэмпіянатаў. З камандай дайшоў да чвэрцьфіналу, але правёў на полі толькі тайм. У тым жа 2021-м годзе згуляў і за «звычайную» Замбію ў таварыскай сустрэчы.

Фота: instagram.com/pyteljakvelitel

Пасля міжнароднай актыўнасці ў жніўні таго ж года Мафвента падпісаў кантракт з чэшскім «Вішкавам». Клуб тады толькі падняўся ў Д2 і стаў актыўнай завозіць афрыканскіх футбалістаў, на продажы якіх часам зарабляў па некалькі сотняў тысяч долараў.

Чэшскую канкурэнцыю замбіец спачатку не вытрымліваў, таму яго адправілі ў арэнду ў ЗША да клуба «Рэал Монаркс» – на трэці кантынент у кар’еры і ў трэці па моцы дывізіён краіны, што мае назву МЛС Нэкст Про і пераважна прадстаўлены дублямі каманд з МЛС. «Рэал Монаркс», напрыклад, з’яўляецца рэзервовай камандай «Рэал Солт-Лэйк». Мафвента правёў у Штатах 19 матчаў за 7 месяцаў на пазіцыях цэнтрбэка і апорніка і аформіў 1+1 па «гол + пас».

Фота: інстаграм-акаўнт «Рэал Монаркс»

Па вяртанні ў Чэхію гуляў ужо значна больш і за другое кола сезона-2022/23 і цэлы чэмпіянат-2023/24 узяў удзел у 40 сустрэчах з 1+1. Яго «Вішкаў» у гэты час двойчы трапляў у стыкі за «вышку», але абодва разы саступаў.

Летам 2024-га Мафвента адважыўся на новую арэнду – ва Украіну, дзе ўжо напоўніцу ішла вайна. Легіянер пазней прызнаваўся, што «баяўся», але наважыўся на пераезд і на новым месцы «канцэнтраваўся на футболе».

За другую частку сезона-2024/25 замбіец правёў 15 матчаў у Д2 на пазіцыі апорніка і дапамог камандзе заняць 3-е месца, якое выводзіла ў стыкі за права выступаць ва ўкраінскай прэм’ер лізе. Супернікам там быў кіеўскі «Левы Бераг». Мафвента цалкам адгуляў абодва матчы (харкаўцы двойчы перамаглі па 1:0) і выдаў вельмі пацешны асіст на адзін з мячоў. Па факце – проста кіксануў у бок ад брамы, але як жа ўдала ўсё атрымалася (адзнака 5:24).

Украінскі Д2 замбіец называў наймацнейшай лігай у кар’еры, а яшчэ дадаваў, што Украіна стала для яго «сям’ёй».

Менавіта праз такую «сямейную» пазіцыю Мафвента ў сакавіку 2025-га праігнараваў выклік у зборную Замбію. Тая мела ў раскладзе таварыскі матч супраць Расіі ў Маскве (атрымала 0:5), але паўабаронца адмовіўся ехаць.

«Было б няправільна для мяне, калі б я з’ехаў у зборную, якая будзе гуляць супраць Расіі. Расія і Украіна зараз не ў добрых зносінах», – казаў футбаліст. Увогуле, пра ваенную агрэсію пуцінскай арміі ён не шмат казаў – толькі заяўляў, што хоча, каб «непрадбачанае сутыкненне як мага хутчэй скончылася і каб усё было добра».

Пры гэтым напярэдадні матчаў расійскае выданне «Спорт-Экспресс» выпусціла сваё тлумачэнне, чаму Мафвента адсутнічае ў заяўцы на матч у Маскве. Нібыта футбаліст у экслюзіўным каментары для выдання казаў, што ён проста не можа нікуды выязджаць. «Я не адмаўляўся ад гульні. Канешне, я б паехаў у Расію на таварыскі матч, калі б у мяне віза», – прыводзіцца цытата футбаліста.

Фота: інстаграм-акаўнт «Металіста 1925»

Прэс-служба «Металіста 1925» пазней пацвердзіла, што некалькі прадстаўнікоў расійскіх СМІ сапраўды бралі ў Мафвента каментар, але той быццам бы нічога не казаў пра прычыны непрыезду.

Пасля выхаду ў Д1 арэнда замбійца ў «Металісце 1925» скончылася, як і яго кантракт з «Вішкавам». З ліпеня 2025-га легіянер меў статус свабоднага агента – то бок паўгода ён не выступаў на прафесійным узроўні.

Пераход у Беларусь здіўляе яшчэ па адной прычыне. Паводле інсайда тэлеграм-канала «Ухо», у «Нафтане» сур’ёзныя фінансавыя абмежаванні, якія не дазваляюць даваць гульцам заробак большы за 1500 беларускіх рублёў. Крыніца сцвярджае, што менавіта з гэтай прычыны ў студзені Наваполацк пакінуў галоўны трэнер Ігар Крывушэнка.

Кіраўніцтва кажа, што гэта ўсё няпраўда, але «Нафтан» пакуль падпісваў даволі сумнеўных футбалістаў. Аднога нават узялі пасля гадавой паўзы на прафесійным узроўні і гульні ў Д3.

«Нафтан» падпісаў паўабаронцу Александровіча рагачоўскага «Дняпра» з Д3

Мафвента на іх фоне выглядае сапраўднай зоркай.