З «Маладзечна» ўцёк натоўп гульцоў (былі скаргі, што дырэктар кідае на грошы), але і новыя ідуць ахвотна, прычым даволі вядомыя

У мінулым сезоне «Маладзечна» паказала, што бывае, калі заходзіш у вышэйшую лігу з Д2 без сур’ёзнага ўзмацнення – без шанцаў заняло апошняе з усяго 11 баламі і вярнулася туды, адкуль выскачыла.

Цягам сезона сітуацыю спрабавалі неяк выправіць, але легіянеры сумнеўнай якасці і новы трэнерскі штаб з Паўлам Бацютам толькі ўрыўкамі дэманстравалі прыкметы жыцця.

Міжсезонне раскрыла трошку мясцовага закулісся: форвард Дзмітрый Вашкевіч, які пачынаў з камандай сезон-2025, але яшчэ ў жніўні перайшоў у «Арсенал» з Дзяржынска, расказаў гісторыю, з якой вынікае, што дырэктар маладзечанцаў Віталь Пачкоўскі яго проста «кінуў»: маўляў, прапанаваў падпісаць нейкі дзіўны кантракт, а калі гулец агучыў сумневы, запэўніў, што грошы будуць прыходзіць у поўным аб’ёме.

– Але нармальна не атрымалася. Выплачвалася толькі бюджэтная частка зарплаты – каля 600 рублёў і плюс нібы нейкае харчаванне. А ўсё абяцанае, што звыш гэтага – да пабачэння, – наракаў футбаліст.

Віталь Пачкоўскі. Фота: тэлеграм-канал «Маладзечна»

У выніку Дашкевіч налічыў, што яму вінаватыя 4000 тысячы рублёў, – і гэта без уліку прэміяльных. Федэрацыя, паводле яго слоў, разумела «абсурднасць» сітуацыі, але юрыдычна дапамагчы не магла.

Сайт bel.football удакладняў, што праблемы з фінансамі меў не толькі Дашкевіч. Паведамлялася пра недаплаты розных памераў і пра тое, што траўмаваным футбалістам у «Маладзечне» плацілі ў лепшым выпадку палову ад заробку, а перад апошнім турам гульцоў аштрафавалі на суму ад 10 да 40 адсоткаў па кантракце – быццам бы такое рашэнне праз «зніжэнне ўзроўню спартыўнага майстэрства і нездавальняльныя вынікі» асабіста прыняў рэжымны мэр горада Павел Губко.

Сам Пачкоўскі на гэтую тэму выказвацца адмаўляўся, прычым паводзіў сябе даволі груба: «Ну выкладайце інфармацыю. Ніякія каментарыі даваць не буду. Нейкія bel.football… Гэта што ўвогуле за прадпрыемства такое? Шмат хто нешта кажа».

Фота: тэлеграм-канал «Маладзечна»

Нягледзчы на гэтую сітуацыю, «Маладзечна» працягвае жыць. Захавала Бацюту на пазіцыі галоўнага трэнера і збірае якасны як па мерках першай лігі склад, але ёсць нюанс. Каманду пакінулі (і гэта толькі афіцыйна) ужо 17 чалавек! Хаця што тут дзіўнага з улікам кантрактных разборак ды паніжэння ў класе. Пры гэтым варта трымаць у галаве, што страт можа быць і больш. Напрыклад, пра сыход Марка Тычко прэс-служба паведаміла толькі 12 лютага, хаця ўжо з канца студзеня паўабаронца мае кантракт з «Паперпрамам».

Поўны спіс траснфераў на выхад на сёння выглядае так: акармя тычко гэта 22-гадовы габонскі вінгер Жан-Поль Асуму (13 матчаў у сезоне-2025, 2+0), 23-гадовы сербскі вінгер Андрэй Джукіч (15 матчаў, 0+5), 32-гадовы кіпер Павел Ахрамчук (2 матчы), 23-гадовы абаронца Герман Кутковіч (21 матч, 0+0), 25-гадовы цэнтрбэк Ілля Удодаў (22 матчы, 0+0), 37-гадовы абаронца Сяргей Усеня (23 матчы, 1+0), 22-гадовы паўабаронца Арцём Уласаў (25 матчаў, 0+2), 24-гадовы паўабаронца Раман Давыскіба (14 матчаў, 0+0), 24-гадовы апорнік Максім Саматой (27 матчаў, 0+0), 22-гадовы форвард Аляксандр Буцько (14 матчаў, 1+1), 22-гадовы расійскі вінгер Алекс Раджабов (13 матчаў, 1+2) 27-гадовы расіянін Роман Хаджыеў (10 матчаў, 0+0), 24-гадовы расійскі паўабаронца Мікіта Лысенка (13 матчаў, 0+0,), 22-гадовы расійскі вінгер Цімур Галімзянаў (2 матчы, 0+0,), 22-гадовы расйіскі паўабаронца Мікіта Шэлест (8 матчаў, 1+0), 20-гадовы паўабаронца Аляксандр Варановіч (1 матч, 0+0).

Фота: тэлеграм-канал «Маладзечна»

З гэтай партыі новы клуб пакуль мала хто знайшоў, а ў «вышцы» захаваўся толькі Буцько, які падпісаўся з «Іслаччу».

Пры гэтым працягнулі кантракт толькі пяцёра футбалістаў са складу мінулага сезона: 23-гадовы Ягор Імеракоў (20 матчаў, 1+1), які летась закрываў пазіцыі левага абаронцы і паўабаронцы, 21-гадовы кіпер Даніла Траццяк (22 матчы), 24-гадовы абаронца Уладзіслаў Белашэвіч (13 матчаў, 0+0), 20-гадовы брамнік Алег Дзіва (0 матчаў), і 26-гадовы расійскі форвард Артур Сагітаў (13 матчаў, 3+0).

Навічкі ў «Маладзечна» даволі сур’ёзныя для Д2. Прыйшоў Ясін Бара, які ў мінулым сезоне аформіў 10+6 у 30 матчах Д2 за «Астравец». Некаторыя крыніцы паведамлялі, што мараканцам цікавіўся нават «Нёман», але ў выніку зноў Д2.

Таксама з «Астраўца» запрасілі 23-гадовага апорніка Аляксандра Бакіноўскага, які. меў 1+3 у 30 гульнях першай лігі-2025.

Яшчэ «Маладзечна» ўзяла пару з «Паперпрама»: 31-гадовага паўабаронцу Дзмітрыя Велісевіча (30 матчаў, 5+3) і ўніверсала Андрэя Альшаніка (29 матчаў, 2+6 па «гол + пас»).

Дзмітрый Велісевіч. Фота: тэлеграм-канал «Маладзечна»

Яшчэ з «Маладзечнам» падпісаўся 29-гадовы Максім Яблонскі, які летась гуляў «Смаргонь» і ў прынцыпе мае 152 матчы ў «вышцы». У ЧБ-2025 універсал набраў 2+3 у 20 матчах лігі.

Даверыўся дырэктару клуба і 38-гадовы ветэран Эдуард Жэўнераў, які ў мінулым сезоне быў віцэ-капітанам «Мінска». Там правёў 17 матчаў і аформіў 1+1.

Узялі і 23-гадовага цэнтральнага паўабаронцу Станіслава Атрашкевіча. У мінулым сезоне ён дапамагаў «Баранавічам» прарывацца ў эліту (27 матчаў у чэмпіянаце, але без выніковых дзеянняў) ды і ўвогуле ўжо мае 34 матчы ў Д1, якія правёў за «Іслач», «Смаргонь» і «Арсенал».

Такім чынам клуб аб’явіў пра падпісанне/перапідпісанне толькі 12 футбалістаў – стартавы склад ды адна замена. Паводле Transfermarkt, кантракты з «Маладзечнам» усё ж маюць яшчэ двое: 18-гадовы паўабаронца Арсень Янушкевіч (3 матчы, 0+0) і 28-гадовы цэнтрбэк Ілля Коваль (20 матчаў, 1+0). Зрэшты, гэта такая сабе прыбаўка, таму варта чакаць новых падпісанняў – балазе гульцы на праглядзе ёсць.