Як там беларускія трэнеры за мяжой: таргі ў Жукоўскага, снежны Дулуб, Маеўскі ідзе па золата
Але не адзін ён прэтэндуе на трафей.
Беларускія трэнеры ў замежных клубах цяпер знахозяцца зусім на розных фазах: дзе міжсезонне, дзе зімняя паўза, а дзе ўжо і працягваецца паход па тытул.
Сабралі апошняе цікавае пра розных коўчаў і іх каманды.
Маеўскі ідзе па золата, але і ў плэй-оф ЛК выйграць не забыўся
37-гадовы Іван Маеўскі стаў галоўным трэнерам славенскага «Цэле» даволі нечакана. Ён працаваў асістэнтам у штабе іспанца Альберта Рыеры, а той паказаў сябе настолькі добра, што атрымаў запрашэнне ў нямецкі «Айнтрахт». Пакінуў «Цэле» Рыера на першым месцы ў чэмпіянаце лізе з камфортным запасам у 10 ачкоў і месцам у 1/16 фінала Лігі канферэнцый.
Говорят, тренер-беларус возглавит лидера европейской лиги перед плей-офф еврокубка – это с чего бы?
Пакуль Маеўскі трымаецца някепска, асабліва як для першага самастойнага досведу. У яго дэбютным матчы на пасадзе галоўнага «Цэле» перамог «Радомлье» (3:1). Потым, праўда, саступіў «Любляне» з чацвёртага месца (1:3), але пасля разграміў аўтсайдара «Муру» (5:1). Запас ад другога месца паменшыўся да 9 ачкоў, але гэта не выглядае крытычна.
Чацвёрты самастойны матч Маеўскага выпаў на еўракубак. «Цэле» значыўся фаварытам у супрацьстаянні з «Дрытай» з Косава і пацвердзіў статус у першай гасцявой сустрэчы, дзе перамог 3:2. Праўда, не без праблем – вырашальны мяч толькі на 90+4-й у контратацы забіў Мацей Паплатнік.
На тым матчы ў «Цэле» сабраўся «фан-сектар» з 30 чалавек у «беларускім» стылі – верагодна, на стадыён прыйшоў славенскі кантынгент у Косава.
Перамога стала першай для беларускіх трэнераў замежных клубаў у еўракубках без уліку кваліфікацыі з часоў Аляксея Шпілеўскага ў «Арысе» – лістапада 2023-га.
У гэтым сезоне Маеўскаму засталося правесці яшчэ 12 матчаў у чэмпіянаце і як мінімум адзін (але хай будзе больш) у ЛК. Дзе перасягнуць дасягненне мінулага сезона будзе складана – тады «Цэле» дайшоў да чвэрцьфінала, дзе да апошняга прэтэндаваў на праход далей у матчах з «Фіярэнцінай».
Клуб Жукоўскага прадаюць, задачы на сезон мінімальныя
У Казахстане праходзіць масавая прыватызацыя футбольных клубаў – таму што так сказаў зрабіць мясцовы аўтакрат Касым-Жамарт Такаеў. Пасля яго слоў раптам «захапіліся» футболам вядомыя мясцовыя бізнесмены, набыўшы ўжо сем каманд. Бадай, самы яркі прыклад – «Актабэ» Мікіты Корзуна, які падпісаў Нані і замахваўся на іншых вядомых гульцоў.
Говорят, беларус может стать одноклубником Нани и Пьянича. Чего только не бывает в Казахстане!
Цяпер продажу чакае і «Атырау» Віталя Жукоўскага, дзе, апроч беларускага трэнерскага штаба, пакуль застаюцца футбалісты Ягор Хаткевіч, Руслан Хадаркевіч і Руслан Юдзянкоў, а таксама далучыўся Ягор Хвалько.
Фота: інстаграм-акаўнт «Атырау»
Патэнцыйным пакупнікам прапануецца паўдзельнічаць у таргах, якія пройдуць 10 сакавіка. Стартавая цана – 175,6 мільёна тэнге, што складае прыблізна 352 тысячы долараў. Але перад будычым уладальнікам стаіць шэраг умоў з 27 пунктаў, адна з якіх – будаўніцтва за тры гады акадэміі з інтэрнатам з агульнымі мінімальнымі выдаткамі пакупніка ажно ў мільярд тэнге! Яшчэ патрабуюць падтрымліваць у належным стане трэніровачныя аб’екты і стадыён, зрабіць кіраванне клубам «больш эфектыўным» і не толькі.
На гэтым фоне, паводле слоў Жукоўскага, «Атырау» хоча проста не вылецець з казахстанскага Д1, што летась удалося з вялікімі цяжкасцямі. Новы розыгрыш стартуе 7-8 сакавіка.
«Іртыш» іншага беларускага трэнера Кірыла Альшэўскага таксама збіраліся прадаваць, але пакуль афіцыйнага абвяшчэння няма. Мясцовы акім (кіраўнік вобласці) Асаін Байханаў казаў, што вядзе перамовы, а таксама настройваў каманду на месца ў топ-8 чэмпіянату Казахстана. Задачу будуць выконваць і падпісаныя беларускія гульцы: Даніла Нячаеў, Павел Сядзько, Уладзіслаў Клімовіч.
Дулуб праводзіць заняткі ў -17 і гульні на снезе
Фота: інстаграм-акаўнт «Нівы»
Алег Дулуб у пачатку 2026-га аднавіў клубную трэнерскую кар’еру ў цярнопальскай «Ніве» з украінскага Д2. Каманда скончыла першае кола чэмпіянату на 8-м радку з 23 баламі пасля 18 тураў. Ад зоны стыкаў за вылет ёсць запас у сем балаў, да плэй-оф за выхад у эліту яшчэ больш – 13 ачкоў.
Дулуб возглавил клуб в Украине, где экс-игроку ЧБ дарили погребальный венок (похоже, было за что)
Ліга адновіцца толькі пад канец сакавіка, а цяпер у «Нівы» ідзе актыўная дамашняя падрыхтоўка. Свае правілы ў яе дадае надвор’е. Футбаліст каманды Васіль Буртнік расказваў, што трэнуюцца, вядома, на сінтэтыцы, а пік холада дасягаў падчас заняткаў -17 градусаў. Справіцца з ападкамі таксама не заўсёды атрымліваецца, таму практыкуецца знаёмы беларускім клубам футбол на снезе.
Фота: інстаграм-акаўнт «Нівы»
Тым не менш з дня прызначэння Дулуба «Ніва» правяла ўжо дзевяць спарынгаў. У суперніках былі ад каманд УПЛ да аматараў. Цярнопальцы атрымалі сем перамог і па разу саступілі і згулялі ўнічыю.
«Зімбру» стаў яшчэ болей беларускім і меціць на трафей
«Зімбру» Алега Кубарава першую частку чэмпіянату Малдовы скончыў на другім радку, набраўшы 44 балы за 21 матч. Ад лідара «Петракуба» каманда адстала на чатыры ачкі. Але вясной атрымае больш камфортныя ўмовы.
Справа ў тым, што з бягучага сезона ў Малдове – новы фармат. Згодна з рэгламентам, па выніках першай фазы дзве апошнія каманды з васьмі выбываюць гуляць з камандамі Д2. Туды зляцела «Палітэхніка» яшчэ аднаго беларускага трэнера Віталя Рашкевіча – яны з таварышам па няшчасці «Спартаніем» з нуля правядуць двухкругавы турнір з чатырма найлепшымі з Д2: першае месца вернецца ў Д1, усе астатнія паўдзельнічаюць у складаным плэй-оф за яшчэ адну пуцёўку наверх.
Топ-6 Д1 працягваюць разам. Пры гэтым фармуецца новая табліца – з улікам матчаў восеньскага этапа толькі гэтых шасці каманд паміж сабой, а ачкі яшчэ і дзеляць на два з акругленнем у меншы бок. А з лідарамі «Зімбру» пачуваўся добра, таму цяпер мае 14 ачкоў і ўсе яшчэ ідзе другім, а «Петракуб» – толькі на адно больш. Наперадзе ў шасцёркі клубаў яшчэ 10 тураў.
Фота: інстаграм-акаўнт «Зімбру»
У камандзе стаіць задача ўзяць тытул, але пры гэтым хапае страт. Сышоў, напрыклад, 27-гадовы выхаванец «Спортынга» Бруна Паз, які далучыўся да румынскага «Ацэлула». Паўабаронца правёў 19 матчаў у гэтым сезоне і аформіў 2+2. Таксама ў Румынію, у «Петралул», перабраўся яго 26-гадовы суачыннік Дыёга Радрыгез. Абаронца правёў 16 гульняў і аформіў 1+3. Яшчэ сышоў у шатландскі «Кілмарнок» 24-гадовы малдаванін Нікі Клешчанка, які ў 17 матчах меў 3+3 пры не такім вялікім часе на полі. Былі і іншыя трансферы, але менш значныя.
Затое «Зімбру» захаваў свайго галоўнага бамбардзіра – 32-гадовага беларускага форварда Дзяніса Казлоўскага, які заявіў пра адмову пераходзіць у «Шэрыф».
Таксама ў кампанію да Цімафея Шаркоўскага і Мікалая Золатава клуб падпісаў 25-гадовага Іллю Васілевіча – цяпер у клубе зноў (раней быў Кірыл Кірыленка) чатыры беларускія футбалісты і амаль поўны беларускі штаб.
«Зубры» рабілі і іншыя падпісанні, але Кубараў пакуль задаволены не да канца, чакае папаўненняў. Да таго ж коўча засмуцілі зімнія зборы, дзе перашкодзілі рэалізаваць планы турэцкія дажджы.
Чэмпіянат адновіццца 7 сакавіка. Таксама «Зімбру» пазмагаецца за Кубак краіны, дзе дайшоў ужо да чвэрцьфіналу.
Іншыя пасты карыстальніка
