Старт цаной з Грамыку, два заходы ў штрафную, 20 гадоў між суседнімі пенальці – дэталі таго, як «Нёман» забраў у «МЛ» Суперкубак

Новы белфутбольны сезон афіцыйна стартаваў: «Нёман» перамог «МЛ» у серыі пенальці (2:2, 5:4) і ўпершыню ўзяў Суперкубак ці, як яго называе Ігар Кавалевіч, «вясельны падарунак».

Расказваем самае цікавае пра матч і тое, што было вакол яго.

Рэкорд па наведвальнасці і паўтор найлепшай выніковасці

У Мінску падчас гульні было +4...+7 градусаў, свяціла рэдкае для апошніх тыдняў сонца. Згодна з пратаколам, матч наведалі 3900 чалавек. Цэнтральныя трыбуны «Дынама-Юні» і сапраўды былі запоўненыя, а лічба стала рэкорднай для ўсіх беларускіх Суперкубкаў.

Апроч гэтага, каманды паўтарылі найлепшую выніковасць турніру. За 17 розыгрышаў трафея чатыры разы забівалі толькі ў 2017-м, 2019-м і цяпер.

Цэнтрбэкі «Нёмана» выдалі хіт-парад памылак

Цэнтр абароны «Нёмана» у прынцыпе выглядае адной з галоўных слабых зон каманды, а пад Суперкубак абстаноўка там яшчэ больш пагоршылася праз траўмы. У выніку на матч выйшлі 34-гадовы расіянін Андрэй Васільеў і 21-гадовы дэбютант Ілля Кірко.

Спачатку Кірко падарыў мяч Валеру Грамыку ва ўласнай штрафной, што праз дзясятак секунд на 29-й хвіліне прывяло да прастрэла і гола Басэку Дыябатэ (адзнака 1:19).

Потым Кірко не вытрымаў афсайдную лінію, а Васільеў прапусціў мяч зноў на малійца. Той на 31-й хвіліне зноў вельмі лёгка пазбавіўся Кірко на замаху і забіў у другі раз (адзнака 2:36).

Падчас першага мяча мог быць афсайд – Кавалевіч папрасіў разабрацца «Беларусь 5»

У пасляматчавым каментары Ігар Кавалевіч намякнуў, што яго не задаволіла судзейства, але сказаў, што каментаваць гэта не можа, таму папрасіў разабрацца «Беларусь 5».

Момант з першым голам і праўда выглядаў спрэчна, але без VAR ацэнкі яму даваць немагчыма.

Булойчык пра VAR: «Разлічваем на другое кола ЧБ. Не ўсе матчы – занадта дарагое задавальненне»

Прынамсі, лайнсмен знаходіўся на адной лініі з апошнім абаронцам «Нёмана» і Русланам Лісаковічам у момант, калі апошняму аддаваў пас Балановіч. Далей ўсё вырашалі б сантыметры, калі б іх можна было палічыць.

Лісаковіч – крайні справа

Кірко стаў героем

Малады абаронца да Суперкубка меў у дарослым футболе роўна 100 афіцыйных матчаў за першалігавыя «Баранавічы» і «Лакаматыў» – і сумарна забіў тры разы. А ў другім тайме 101-й сустрэчы ўзяў ды аформіў дубль. Спачатку адзначыўся нагой з дабівання пасля кутняга (адзнака 4:07).

А пасля забіў галавой пасля штрафнога і сумятні ў брамніцкай (адзнака 5:22).

1 матч, 2 галы, 1 трафей – цяпер такую статыстыку мае выхаванец «Нёмана» ў клубе.

Гульцы «МЛ» сварыліся падчас серыі пенальці, а ў «Нёмана» білі з розніцай у 20 гадоў

Першым у серыі пенальці біў Руслан Лісаковіч, які сканчваў матч з капітанскай павязкай «МЛ». Рэалізаваўшы стрэл і вярнуўшыся назад, ён пачаў гучна «піхаць» Захару Волкаву за момант, які здарыўся яшчэ падчас гульні. Гульцы «МЛ» у прынцыпе выглядалі разрозненымі.

Тым часам «Нёман» штампаваў «кропкі» адну за адной. Упэўнена справіліся і 19-гадовы Аляксей Дайнэка з першым ударам гродзенцаў, і 18-гадовы Багдан Леўчанка, які біў чацвёртым. А наступны, вырашальны стрэл рэалізаваў гулец зусім іншай узроставай катэгорыі – 38-гадовы Іван Садаўнічы.

Атака «Нёмана» была нямоглай

Адзіная прычына, па якой гродзенцы забілі – стандарты. Усе ўдары, якія каманда нанесла за гульню, адбыліся падчас галявых атак. Акрамя іх, не было створана нічога. Да 22-й хвіліны «Нёман» наогул не мог даставіць мяч у чужую штрафную, а пасля рабіў гэта амаль заўсёды праз навесы.

За ўвесь матч футбалісты гродзенцаў толькі восем разоў сустракаліся з мячом у штрафной і толькі два разы (!) заходзілі з ім у пляцоўку. Усё астатняе – таксама падачы.

«Гардзейчук» не падпарадкаваўся «яканню»

Адзін з тых, хто павінен быў даць атацы крэатыў, выйшаў на матч з няслушным напісаннем прозвішча па-беларуску. Міхаіл Гардзяйчук у часы брэсцкага «Дынама» заўсёды і пісаўся праз «я», як і вынікае з правіла «якання» ў першым складзе перад націскам, але сёння ў «Нёмане» атрымаўся «Гардзейчук».

Небяспека ішла ад таго, хто звычайна не памыляецца

Павел Паўлючэнка ў мінулым сезоне атрымаў званне найлепшага гульца ЧБ у тым ліку праз фенаменальную стабільнасць: за ўвесь чэмпіянат ён не дапусціў, бадай, ніводнай выніковай памылкі.

Сёння ж брамнік мог паўтарыць свой касяк з перадсезонкі, калі на роўным месцы аддаў мяч гульцу «Дняпра». Абышлося.

ВІДЭА

Але пры штрафным перад другім голам «Нёмана» Паўлючэнка адбіў мяч роўна перад сабой.

Склад «Нёмана» каштаваў, як адзін Грамыка

Найлепшы футбаліст Беларусі-2025 сёння правёў свой першы матч пасля асіста на «Эмірэйтс» (як гучыць). Партал Transfermarkt ацэньвае Грамыку ў 1,5 мільёна еўра – толькі на 75 тысяч болей каштаваў увесь стартавы склад «Нёмана».

Фота: t.me/abffby

У цэлым свае 72 хвіліны паўабаронца выглядаў някепска, добра ўзаемадзейнічаў з Лісаковічам у цэнтры і здзейсніў ключавой адбор пры першым мячы, але пакуль абышоўся без выніковых балаў, ды і без трафея.

За «МЛ» згуляў Карповіч, жонка і дачка якога захраслі ў Катары праз іранскія ракеты

Раніцай 28 лютага Ізраіль сумесна з ЗША заявіў пра пачатак сумеснай аперацыі з бамбардзіроўкамі супраць Ірана. Іран стаў адказваць ударамі па Ізраілі і краінах Бліжняга Усхода, дзе знаходзяцца базы ЗША.

ВІДЭА

Пасля пачатку аперацыі закрыў сваё неба ў тым ліку Катар, куды таксама прыляцела. У сталіцы краіны Досе цяпер адпачываюць дачка і жонка абаронцы «МЛ» Сяргея Карповіча. І затрымаюцца там даўжэй, чым планавалася. Іх авіярэйс у Мінск з 1 сакавіка ўжо пераснеслі на дзень наперад. Жонка футбаліста Паліна Карповіч расказала, што здалёк чула выбухі, але пачуваецца спакойна, бо не «ў цэлым не панікёр» і не хоча палохаць дачку.

Карповіч сёння з’явіўся на поле на 71-й хвіліне.