Брэст хацеў зрэзаць Быкаву заробак, а той прасіў прыбаўкі, Гаўрыловіч пакінуў «Дынама» пасля нечаканай прапановы

Ужо пасля таго, як у чэмпіянаце Беларусі па футболе адбыўся першы тур, двое вядомых гульцоў раптам змянілі клубы. 36-гадовы цэнтральны абаронца Аляксей Гаўрыловіч з мінскага «Дынама» пайшоў да канца сезона ў арэнду ў «Гомель», а 33-гадовы паўабаронца Арцём Быкаў спачатку скасаваў кантракт з брэсцкім «Дынама», а затым падпісаўся з «Тарпеда-БелАЗ». Абодва ў сезоне паспелі згуляць за свае на сёння ўжо былыя клубы. Даведаліся, чым абумоўлены гэтыя трансферы.

Гэты заход у «Дынама» ў Гаўрыловіча доўжыўся са жніўня 2023-га. Ад той пары ён паўдзельнічаў за каманду ў 66 матчах ва ўсіх турнірах, адзначыўшыся 13 галамі і 2 асістамі. Асабліва прадуктыўна склаўся сезон-2024: гулец вызначыўся ва ўсіх еўракубкавых турнірах, у якіх удзельнічала «Дынама» (забіў вырашальны гол «Пюніку» ў кваліфікацыі Лігі чэмпіёнаў, паразіў вароты «Лінкольна» ў адборы Лігі Еўропы і прынёс перамогу над «Ларнам» на агульным этапе Лігі канферэнцыі), а па выніках чэмпіянату стаў найлепшым бамбардзірам вышкі сярод цэнтральных абаронцаў (пяць выніковых удараў).

Чарговы кантракт з мінчукамі, чыім выхаванцам лічыцца, заключыў 4 студзеня 2026 года – да канца сезону, прычым зрабіў гэта на наступны дзень пасля таго, як каманду ўзначаліў Аляксандр Шагойка. Але менавіта трэнер шмат у чым і стаў прычынай сыходу абаронцы ў арэнду.

Гаўрыловіч прайшоў з калектывам усю перадсезонку, удзельнічаў у спарынгах, але ў афіцыйных матчах у 2026-м атрымаў толькі адну хвіліну – выйшаў замест Абдула Турэ ў самай канцоўцы экстратаймаў з «Іслаччу» ў чвэрцьфінале Кубка. Відавочна, што пад серыю пенальці – і сваю спробу рэалізаваў, чым дапамог «Дынама» прарвацца ў паўфінал.

Першы матч з «Іслаччу» Гаўрыловіч правёў у запасе, а на 1-ы тур супраць «Славіі» наогул не патрапіў у заяўку. Да старту чэмпіянату, паводле нашых звестак, было прынятае рашэнне, што абаронца не будзе гуляць за каманду.

Шагойка не бачыў яго ні ў аснове, ні нават у запасе, аддаючы па пазіцыі перавагу зборнікам Раману Бегунову (капітан мінчукоў), Уладзіславу Калініну і Максіму Швяцову, якога вярнулі з Д2 Расіі. Аднак ветэрана з «Дынама» не праганялі, а прапанавалі пераключыцца на трэнерскую працу – ці ў штабе першай каманды, ці на іншай пазіцыі ў структуры клуба. Хоць у Гаўрыловіча на сёння і няма трэнерскай ліцэнзіі, палічылі, што ён можа перадаваць свой досвед.

Аднак футбаліст вырашыў яшчэ пагуляць. Разумеючы, што практыкі ў «Дынама» не будзе, пачаў шукаць варыянты. У выніку ўдалося дамовіцца з «Гомелем» пра пераход на правах арэнды. За гэтую каманду Гаўрыловіч ужо выступаў цягам трох сезонаў.

«Гомель» якраз меў патрэбу ў выканаўцы ў цэнтр абароны пасля таго, як у сярэдзіне сакавіка на некалькі месяцаў страціў праз траўму Ягора Траякова. На першы тур супраць «Віцебска» закрываць пазіцыю дапамагаў 24-гадовы намінальны апорнік Віктар Сотнікаў, якога забралі ў БАТЭ. А вось 20-гадовага цэнтральнага абаронцу Георгія Кушкіна пакінулі ў запасе.

Гісторыя Арцёма Быкава і брэсцкага «Дынама» развівалася інакш. У клуб, з якім у 2019-м станавіўся чэмпіёнам, хаўбек вярнуўся ў пачатку 2025-га, падпісаўшы кантракт на два гады. Прычым, па нашых звестках, пагадзіўся на даволі сціплы заробак – каля 4,5 тысяч рублёў пасля выліку падаткаў. Аднак бакі дамовіліся, што калі ў сезоне-2025 футбаліст сябе пакажа добра, то да канца пагаднення атрымае прыбаўку.

Быкаў быў гульцом асновы (21 матч з 25 ва ўсіх турнірах пачаў з першых хвілін), забіў 5 мячоў і аддаў 3 галявыя – больш у Брэста набралі толькі Ягор Кацоў (12+14) і Міхаіл Гардзяйчук (11+6).

Забіў Быкаў сярод іншага і ў Лізе канферэнцый у пераможным матчы з чарнагорскай «Суцьескай», якую, між іншым, прайсці не ўдалося.

З негатыву – чырвоная картка за ўдар локцем у твар мінскаму дынамаўцу Дзянісу Грачыху, якому дыягнаставалі пералом скулы са зрушэннем. За гэтае парушэнне давялося адбыць 6-матчавую дыскваліфікацыю.

Калі пачалося абмеркаванне ўмоў на 2026 год, Быкаў раптам пачуў, што сезон у яго выкананні не задаволіў кіраўніцтва, найперш – праз дыскваліфікацыю. І наогул аказалася, што з гульцом хочуць расстацца з улікам курсу на амаладжэнне.

«Дынама» спадзявалася скасаваць кантракт па згодзе бакоў, але Быкаў адмовіўся. Босы на аднабаковыя меры не пайшлі, каб не плаціць кампенсацыю. Быкаву прапанавалі зменшыць заробак, але ён адказаў, што не бачыць для гэтага прычын. Больш за тое, паводле нашых звестак, агучыў жаданне, каб яму паднялі аклад да максімальных 6 тысяч рублёў, на якія могуць разлічваць гульцы не са зборнай (сума пасля выліку падаткаў). Клуб таксама адказаў адмовай.

У выніку вырашылі так: гулец можа заставацца ў «Дынама», але калі раптам зʼяўляецца цікавы варыянт, яго без перашкод адпусцяць.

Быкаў прайшоў з брастаўчанамі перадсезонку і ў сезоне-2026 ужо правёў за іх 4 чатыры хвіліны ў чвэрцьфінале Кубка супраць «МЛ» і 27 у 1-м туры ЧБ супраць «Белшыны», абодва разы выходзячы на ​​пазіцыю правага паўабаронцы. Матчы гэтыя яго каманда прагуляла.

26 сакавіка «Дынама» ўсё ж абʼявіла пра расставанне па згодзе бакоў. У гэты дзень футбаліст заехаў на трэнінг, але не каб займацца, а толькі развітацца з аднаклубнікамі. Хоць паводле сістэмы COMET, адзаявілі брастаўчане яго толькі на наступны дзень пасля навіны пра спыненне супрацы.

Амаль адразу зʼявілася інфармацыя, што Быкаў падпіша кантракт з «Тарпеда-БелАЗ». Афіцыйна гэта было пацверджана 30 сакавіка. Як нам стала вядома, жодзінцы зрабілі прапанову аб пераходзе яшчэ месяц таму. Аднак перамовы зацягнуліся праз фінансавае пытанне – Быкаў усё гэтак жа хацеў атрымліваць максімальныя не для зборнікаў 6 тысяч рублёў. «Тарпеда-БелАЗ» у выніку пайшло на такія ўмовы.