Імперыя не наносіць удар у адказ

Глядзець Славенію-Аўстрыю ў жудаснай якасці цераз інтернет, трэба быць сапраўдным мазахістам. А я дазволіў сабе такую раскошу. Важная праца зроблена, я выходны, ёсць час...

Да таго ж з аўстрыйцамі і хакеем ёсць тыя-сія настальгіі. Свой першы чэмпіянат свету па хакеі я глядзеў на лецішчы, праз кепскі тэлевізар "Гарызон", і быў ён якраз з Аўстрыі. Тады яшчэ фіны выйгралі. І тады я глядзеў на хакеістаў скрозь памехі, і цяпер спрабую разгледзець хакеістаў праз бітыя пікселі...

Але гэты матч я хацеў глядзець больш праз славенцаў. Не таму, што яны нас выбілі, гэта не прычына. Проста ў мяне шмат сяброў са Славеніі, я колькі разоў там быў, гэта цудоўная краіна, у яе з намі  шмат агульнага (можа пазней пра гэта трэ будзе распавесці, калі будзе нагода). Сярод іншага ў славенцаў таксама ёсць "старэйшы брат" і гэта не Сербія, як вы, напэўна, падумалі, а менавіта Аўстрыя.

Славенцы доўгі час былі ў складзе Аўстра-Венгерскай імперыі. Сталіца Любляна называлася Лайбах, і калі вы там пабываеце, то зразумееце мяне лепш.Больш таго, недаўна я зацікавіўся, чаму ў славенцаў такая крутая эканоміка, і высветлілася, што ў 90-х Аўстрыя інвеставала ў іхнюю эканоміку мільярдамі. Ну прыкладна тое самае, што зараз у Мінску робяць маскалі, і нам гэта не падабаецца.

Таму ігра славенцаў з аўстрыякамі, гэта такі Беларусь-Расія на іх манер.

Імперыя мусіла паставіць выскачкаў на месца.

І канечне ў аўстрыйцаў нічога не атрымалася. Славенцы ўчыстую выйгралі на пачатку гульні "пятачок", аўстрыйцы размазалісь па бартах. І тут яшчэ трапныя кідкі славенскіх лідараў, сярод якіх выдатны Капітар.

Але мне спадабалася, што аўстрыйцы не сядзелі ў акопах, лезлі наперад. Мне спадабаўся хуткі і тэхнічны аўстрыец Кох. Але, канечне, славенцы выглядалі больш арганізаванымі. І гол у пустыя брамкі на апошніх хвілінах, даказалі простае: славенцы - галоўнае адкрыццё гэтага турніра.

Ну і цяпер для славенцаў будзе галоўны іспыт, ці змогуць яны паўтарыць наш вынік у Солт-Лейк-Сіці? Той жа супернік, тая ж стадыя, той жа статус андердогаў :)