Першым самастойным выступленнем зборнай Беларусі на зімовых Алімпійскіх гульнях сталі спаборніцтвы 1994 года ў Лілехамеры. З гэтага моманту краіна рэгулярна брала ўдзел у зімовых Алімпіядах пад уласным сцягам, фарміруючы каманду і выбудоўваючы сваю спартыўную ідэнтычнасць. Асноўнымі крыніцамі медальных поспехаў у розныя гады станавіліся біятлон, фрыстайл, канькабежны спорт і лыжная акрабатыка. Асаблівае месца ў гісторыі беларускага зімовага спорту занялі выступленні біятланістаў і фрыстайлістаў, якія прынеслі краіне першыя золатыя медалі і найбуйнейшыя поспехі на Гульнях. Ніжэй прадстаўлены падрабязны агляд выступленняў зборнай Беларусі на зімовых Алімпійскіх гульнях – ад Лілехамера да Пекіна – з указаннем усіх медалёў, дысцыплін і спартсменаў.

1994 – Лілехамер

Золата: 0 Срэбра: 2 Бронза: 0 Усяго медалёў: 2

Срэбраныя медалі: Святлана Парамыгіна (біятлон, спрынт); Ігар Жалязоўскі (канькабежны спорт, 1000 м).

Святлана Парамыгіна заваявала срэбны медаль у спрынце на дыстанцыі 7,5 км, саступіўшы ўсяго 1,1 секунды пераможцы Мірыям Бедар з Канады.

Ігар Жалязоўскі заваяваў срэбны медаль у бегу на 1000 метраў, саступіўшы толькі нарвежцу Ёхану Олаву Косу — абсалютнаму фаварыту хатніх Гульняў і шматразоваму алімпійскаму чэмпіёну.

1998 – Нагана

Золата: 0 Срэбра: 0 Бронза: 2 Усяго медалёў: 2

Бронзавыя медалі: Аляксей Айдараў (біятлон, індывідуальная гонка); Дзмітрый Дашчынскі (фрыстайл).

Трэцяе месца заняў Аляксей Айдараў у індывідуальнай гонцы, апярэдзіўшы Уле-Эйнара Б’ёрндалена, Рафаэля Пуарэ, Рыка Гроса і Свена Фішэра.

Дашчынскі выйграў кваліфікацыю, аднак у фінале пасля першага з двух скачкоў (тады пераможцу, як і ў наступныя гады, вызначалі па суме балаў за фінальныя спробы) апынуўся толькі пятым і прыкметна саступаў лідарам. Тым не менш другі скачок Дашчынскага аказаўся ўдалейшым, а два канкурэнты дапусцілі памылкі – у выніку беларус заваяваў бронзавы медаль. Пасля спаборніцтваў спартсмен адзначаў, што ў Беларусі доўгі час абмяркоўвалі мэтазгоднасць захавання гэтага віду спорту. «Людзі нарэшце даведаліся, што такое фрыстайл. А раней некаторыя супрацоўнікі Спорткамітэта Беларусі з цяжкасцю вымаўлялі гэта слова», – казаў Дашчынскі.

Хакей

Першая Алімпіяда зборнай Беларусі па хакеі – усяго такіх было тры. Зборная выйграла сваю групу, у якую ўваходзілі Германія, Францыя і Японія, абыграўшы Францыю з лікам 4–0, Германію – 8–2 і згуляўшы ўнічыю з Японіяй – 2–2. Першае месца ў групе дазволіла беларусам выйсці ў фінальны турнір. У фінальнай стадыі каманда трапіла ў групу A, дзе прайграла ўсе тры матчы: Канадзе – 0–5, а таксама Швецыі і ЗША – з аднолькавым лікам 2–5. Заняўшы апошняе месца ў групе A, зборная Беларусі ў чвэрцьфінале сустрэлася з пераможцам групы B – зборнай Расіі. Матч завяршыўся паразай з лікам 1–4, пасля чаго беларусы выбылі з турніру і ў выніку занялі 7-е месца.

2002 – Солт-Лейк-Сіці

Золата: 0 Срэбра: 0 Бронза: 1 Усяго медалёў: 1

Бронзавы медаль: Аляксей Грышын (фрыстайл).

Для Беларусі гэта была адзіная ўзнагарода на гэтых спаборніцтвах. Таму менавіта Грышыну даверылі несці чырвона-зялёны сцяг на цырымоніі закрыцця Гульняў.

Хакей

Алімпійскі турнір 2002 года ў Солт-Лейк-Сіці стаў вяршыняй у гісторыі беларускага хакея. Каманда пад кіраўніцтвам Уладзіміра Крыкунова сенсацыйна дабралася да паўфіналу, здзейсніўшы адзін з галоўных апсэтаў турніру. 20 лютага на арэне «Маверык-цэнтр» у Вэст-Вэлі-Сіці вырашальную шайбу ў чвэрцьфінале супраць зборнай Швецыі закінуў Уладзімір Копаць, што дазволіла беларусам выбіць аднаго з фаварытаў і працягнуць барацьбу за медалі. Гэты матч атрымаў шырокі міжнародны рэзананс і быў уключаны ў юбілейны спіс ІІХФ «100 галоўных міжнародных хакейных падзей стагоддзя (1908–2008)», заняўшы 28-ю пазіцыю. У СМІ сустрэчу нярэдка называлі «Цуд на лёдзе–2», праводзячы паралелі з легендарнай перамогай зборнай ЗША над СССР на Алімпіядзе–1980.

2006 – Турын

Золата: 0 Срэбра: 1 Бронза: 0 Усяго медалёў: 1

Срэбраны медаль: Дзмітрый Дашчынскі (фрыстайл).

Гэта таксама была адзіная ўзнагарода для Беларусі на тых Алімпійскіх гульнях. Хаця Грышын мог узяць бронзу, але нечакана топ-скачок выканаў расіянін Уладзімір Лебедзеў і забраў узнагароду сабе. Дашчынскі стаў першым мужчынам у гісторыі акрабатыкі з дзвюма алімпійскімі ўзнагародамі. Пазней НАК абвясціў яго спартсменам года.

2010 – Ванкувер

Золата: 1 Срэбра: 1 Бронза: 1 Усяго медалёў: 3

Залатая медаль: Аляксей Грышын (фрыстайл).

Срэбраная медаль: Сяргей Новікаў (біятлон, індывідуальная гонка).

Бронзавая медаль: Дар’я Домрачава (біятлон, індывідуальная гонка).

Героі

Грышын заваяваў залаты медаль у акрабатыцы і стаў першым алімпійскім чэмпіёнам у гісторыі зімовых відаў спорту Беларусі. У 2014 годзе ён удзельнічаў у Алімпійскіх гульнях у Сочы і быў сцягнаносцам зборнай на цырымоніі адкрыцця.

Другое месца ў індывідуальнай гонцы заняў Сяргей Новікаў. Ён падзяліў срэбра з Уле-Эйнарам Б’ёрндаленам, саступіўшы, такім чынам, толькі Эмілю Свенсену. Новікаў стаў другім прадстаўніком Беларусі, які заваяваў асабістую ўзнагароду на Алімпіядзе пасля Аляксея Айдарава.

Першая алімпійская медаль самай тытулаванай біятланісткі Беларусі Дар'і Домрачавай.

Хакей

На Алімпійскіх гульнях 2010 года ў Ванкуверы зборная Беларусі па хакеі з шайбай брала ўдзел у спаборніцтвах, але не змагла прабіцца ў плэй-оф. Беларусы былі ўключаны ў групу C папярэдняга раўнда. У гэтых матчах каманда здабыла адну перамогу над Германіяй – 5–3, але саступіла Фінляндыі – 1–5 і Швецыі – 2–4, што не дазволіла выйсці з групы ў фінальную стадыю турніру. Па выніках спаборніцтваў зборная Беларусі заняла 9-е месца ў агульным заліку хакейнага турніру Алімпіяды–2010.

2014 – Сочы

Золата: 5 Срэбра: 0 Бронза: 1 Усяго медалёў: 6

Залатыя медалі: Дар’я Домрачава — 3 (біятлон: гонка пераследу, індывідуальная гонка, мас-старт); Алла Цупер (фрыстайл); Антон Кушнір (фрыстайл).

Бронзавы медаль: Надзея Скардзіна (біятлон, індывідуальная гонка).

Героі

Беларусы дасягнулі выдатных поспехаў на Зімовых Алімпійскіх гульнях 2014 года ў Сочы, заваяваўшы 6 медалёў (5 залатых і 1 бронзавы) і заняўшы 8-е месца ў медальным заліку. Гэта стала гістарычным рэкордам для незалежнай Беларусі.

Дар’я Домрачава заваявала тры залатыя медалі Алімпіяды ў Сочы, аформіўшы залаты хет-трык. Каэфіцыент складанасці скачка Антона Кушніра быў найвышэйшым (5,0), а выкананне — выдатным: адзнака 134,50 бала стала найлепшым алімпійскім вынікам за адзін скачок, не пакінуўшы апанентам ніякіх шанцаў. Для Алы Цупер гэта была ўжо пятая Алімпіяда, якая прынесла першае золата сярод жанчын у фрыстайле.

2018 – Пхёнчхан

Золата: 2 Срэбра: 1 Бронза: 2 Усяго медалёў: 5

Залатыя медалі: Ганна Гуськова (фрыстайл); Дар’я Домрачава, Надзея Скардзіна, Ірына Крыўко, Дзінара Алімбекава (біятлон, эстафета).

Срэбраны медаль: Дар’я Домрачава (біятлон, мас-старт).

Бронзавыя медалі: Надзея Скардзіна (біятлон, індывідуальная гонка).

Героі

На Алімпійскіх гульнях 2018 года ў Пхёнчхане ў Беларусі найперш разлічвалі на чарговае золата Дар’і Домрачавай у біятлоне. Аднак нямногія чакалі, што сваю рэкордную для жаночага біятлону чацвёртую алімпійскую перамогу яна здабудзе не ў асабістай дысцыпліне, а ў эстафеце. Па ходзе сезона беларуская жаночая каманда ні разу не падымалася ў Кубку свету вышэй за сёмае месца. Тым не менш на гэтых Гульнях Надзея Скардзіна, Ірына Крыўко, Дзінара Алімбекава і Дар’я Домрачава правялі бездакорную эстафету. Таксама ў індывідуальных спаборніцтвах Скардзіна заваявала першы ў кар’еры алімпійскі медаль.

Таксама на Гульнях у Пхёнчхане Ганна Гуськова заваявала сваё першае алімпійскае золата, стаўшы найлепшай у лыжнай акрабатыцы. Такім чынам, Беларусь здабыла дзве перамогі запар на Алімпійскіх гульнях у жаночым фрыстайле. Да гэтага часу ніводная іншая краіна не можа пахваліцца падобным дасягненнем.

2022 – Пекін

Золата: 0 Срэбра: 2 Бронза: 0 Усяго медалёў: 2

Срэбраныя медалі: Антон Смольскі (біятлон, індывідуальная гонка); Ганна Гуськова (фрыстайл).

Антон Смольскі заваяваў срэбны медаль у індывідуальнай гонцы ў біятлоне, дапусціўшы адзін промах на агнявых рубяжах і саступіўшы пераможцу французу Кантэну Фійону Мае. Для Смольскага гэтая ўзнагарода стала першай алімпійскай медаллю ў кар’еры.

Ганна Гуськова стала срэбнай прызёркай Алімпіяды ў лыжнай акрабатыцы. У фінале яна чыста выканала скачок з высокім каэфіцыентам складанасці, аднак па суме балаў саступіла прадстаўніцы Кітая Сюй Мэнтаа, якая заваявала золата на хатніх для сябе Гульнях.