У Бразіліі першы ў гісторыі медаль зімовых Алімпіяд – адразу золата! Чэмпіён раней змяніў краіну, але не проста так

14 лютага на Алімпіядзе ў Мілане прайшоў гарналыжны супергігант. І золата ўзяў Лукас Пінейра Бротэн – пад сцягам Бразіліі! Яна ўдзельнічае ў зімовых Гульнях з 1992-га, гэта першы медаль у гісторыі не толькі краіны, але і ўсёй Паўднёвай Амерыкі.

Бротэн не заўсёды выступаў за Бразілію, але і не проста так пераехаў у краіну. Нарвежац Б’ёрн Бротэн неяк ляцеў у Маямі, па суседстве ў самалёце апынулася бразільянка Алесандра Пінейра дэ Кастра. Яны разгаварыліся, а ў выніку ўсё дайшло да адносін. 19 красавіка 2000-га ў пары нарадзіўся сын, які цяпер і перапісаў гісторыю спорту.

Хлопчык з’явіўся на свет у сталіцы Нарвегіі Осла, але ў дзяцінстве кожны год лётаў у Сан-Паўлу да сваякоў па маці. Нядзіўна, што закахаўся ў пляжы і футбол – кумірам быў Раналдынья. У Нарвегіі нават крыху займаўся ў футбольнай школе. Але ў 9 гадоў бацька, фанат горных лыж, прыцягнуў сына да новага віду.

Так у хлопчыка неяк само сабой атрымалася – ён захапіўся і ў 12 гадоў як перспектыўны спартсмен ужо прыцягнуў увагу зборнай Нарвегіі. За яе ў выніку з’ездзіў ужо на АГ-2022, але ні ў слаламе, ні ў гіганцкім слаламе не змог фінішаваць. Але гэта здавалася толькі пачаткам кар’еры, тым больш у 2023 годзе Бротэн стаў пераможцам Кубка свету ў заліку слаламаў.

І раптам у кастрычніку 2023-га спартсмен абвясціў пра сыход – маўляў, ужо нечага дасягнуў, а кар’ера стала абмяжоўваць, тады як «галоўным закладам поспеху і радасці» Бротэн лічыў свабоду (і не саромеўся, напрыклад, фарбаваць пазногці). Незадоўга да таго нарвежская федэрацыя пакарала хлопца за няўзгоднены ўдзел у рэкламе – вось такая была рэакцыя.

Аднак у горных лыжах дастаткова ўсяго аднаго сезону «каранціну», каб потым выступаць за новую краіну. І ў 2024-м ужо Лукас Пінейра Бротэн вярнуўся на спаборніцтвы пад сцягам Бразіліі, радзімы сваёй маці.

«Я заўсёды імкнуся спрабаваць нешта новае, і гэта ў мяне ад бразільскага боку. Бразільцы больш рызыкуюць, імкнуцца да інавацый, яны імправізуюць і нічога не баяцца», – казаў гарналыжнік.

Прадстаўляючы Бразілію, Пінейра Бротэн адразу заняў чацвёртае месца на этапе Кубка свету, прынёсшы краіне першыя ў яе гісторыі рэйтынгавыя ачкі турніру. Потым яшчэ не раз аказваўся на подыумах, аднойчы і выйграў. Праўда, на ЧС-2025 нічога не атрымалася – 13-е месца ў слаламе, 14-е ў «гіганце». Але і гэта аказалася толькі разгонам да вяршыні.

У сваіх паездках па свеце Пінейра Бротэн аднойчы сустрэў яшчэ адну з легенд дзяцінства – Раналда. І падзяліўся з экс-футбалістам, што прафесійна выступае ў горных лыжах. Па словах атлета, суразмоўца засмяяўся і сказаў: «Добра, а калі сур’ёзна?». Прыйшлося пераконваць.

Цяпер Раналда можа ганарыцца суайчыннікам. На АГ-2026 Пінейра Бротэн засяродзіўся на супергіганце. Выніковы паказчык – сума дзвюх спроб, і першую спартсмен прайшоў ідэальна: адрыў ад другога месца склаў 0,95 секунды, гэта велізарна для віду.

У другой спробе заставалася фактычна праехаць у сваім нармальным тэмпе, не памыліцца і не ўпасці – і нарвежскі бразілец справіўся: 0,58 секунды сумарнай перавагі над швейцарцам Марка Одэрматам – золата! Медаль Пінейра Бротэн святкаваў з бацькам, які трэніруе сына.

Цікава, што ад Нарвегіі ў дысцыпліне найлепшым з пятым месцам стаў Атле Макграт – ураджэнец ЗША, сын амерыканскага гарналыжніка і нарвежскай лыжніцы. Тут «натуралізацыя» павярнулася неяк не на карысць скандынаваў.