Упершыню з 1911 года пераможца «Уімблдона» не прайграла ніводнага гейма ў фінале турніру

Польская тэнісістка Іга Свёнтак (№4 WTA) у фінале «Уімблдона» абыграла амерыканку Аманду Анісімаву (№12 WTA) з лікам 6:0, 6:0.

Па даных статыстычнага партала Opta, гэта другі выпадак у гісторыі Адкрытай эры (з 1968 года – заўв.), калі пераможца фінальнага матча турніру Grand Slam у адзіночным разрадзе не прайграла ніводнага гейма.

Упершыню падобнае адбылося ў фінале «Ралан Гарос-1988», калі немка Штэфі Граф разграміла беларуску Наташу Звераву з лікам – 6:0, 6:0.

Пры гэтым гэта першы выпадак з 1911 года, калі ў фінале «Уімблдона» ў жаночым адзіночным разрадзе пераможца не аддала суперніцы ніводнага гейма.

У 1911 годзе брытанка Даратэя Ламберт Чэмберс абыграла сваю суайчынніцу Дору Бутбі з лікам 6:0, 6:0.

Для Ігі гэтая перамога стала шостай у фіналах турніраў Grand Slam і першай на «Уімблдоне» ў яе кар'еры.