Адзначым, што Касцюк стала першай у гісторыі ўкраінкай, якая згуляе ў паўфінале «Ралан Гарос». Яе саперніцай па паўфінале стала нейтральная тэнісістка з расійскім пашпартам Міра Андрэева (№8 WTA).

– Марта, далей вас чакае расійская саперніца. Ці ўдаецца вам цалкам аддзяляць гэты факт падчас матча, ці ўсё ж немагчыма не звяртаць увагі на тое, што гуляеце супраць прадстаўніцы Расіі?

– Калі б я не ўмела гэта аддзяляць, то наўрад ці змагла б двойчы перамагчы Міру ў гэтым годзе.

Цяпер я спраўляюся з гэтым значна лепш. Звычайна мяне не хвалюе, хто знаходзіцца па той бок сеткі. Я выходжу на корт, каб гуляць у тэніс і выконваць сваю працу. Таму ў чацвер для мяне нічога не зменіцца.

– Пасля сваёй перамогі Дыяна Шнайдэр сказала, што гуляе не супраць саперніцы, а супраць мяча, таму што мяч для ўсіх аднолькавы. Тое ж самае і Міра Андрэева, кажучы пра матчы супраць украінак, кажа, што канцэнтруецца толькі на мячы, які ляціць на яе бок корта. Ці не раздражняюць вас такія словы? Складваецца ўражанне, што яны спрабуюць пазбягаць размоў пра сітуацыю.

– Мяне гэта ўжо не раздражняе. Яны дарослыя людзі. Яны ведаюць, пра што кажуць. Яны ведаюць, што адбываецца. У іх ёсць тэлефоны, інстаграм, доступ да навін. Яны выдатна дасведчаныя пра падзеі.

Калі яны хочуць пазбягаць гэтай тэмы, то гэта іх выбар. Жыць з гэтым прыйдзецца ім, а не мне. Што я магу сказаць? Яны выбралі для сябе стратэгію, якая, на іх думку, працуе. І ўсё.

Вядома, я хацела б бачыць іх больш выразную пазіцыю наконт таго, што адбываецца – асабліва калі твая краіна забівае іншых людзей. Я не ведаю, як можна спакойна спаць па начах, ведаючы пра гэта і не маючы нічога сказаць па гэтым пытанні. Больш мне дадаць няма чаго.

– Марта, гэта ўжо другі матч на турніры пасля ночы масіраваных атак па Украіне. У першым крузе гэта адбылося прама падчас матча. Ці бывае так, што падчас гульні вам прыходзяць у галаву карціны таго, што адбылося ўначы? Ці можаце вы цалкам адключыцца ад гэтых думак на час матча?

– Гэта залежыць ад канкрэтнай ночы. Залежыць ад таго, ці ў бяспецы мая сям’я, ці не ўбачыла я нейкіх асабліва хваравітых навін.

Менавіта таму перад матчамі я стараюся пазбягаць навін. Пасля гульні чытаю ўсё, але да матча стараюся гэтага не рабіць.

Перад матчам першага круга было вельмі цяжка. Я не ведала, ці змагу наогул не думаць пра гэта. Сёння ўсё было нармальна, таму што сябры і родныя, з якімі я размаўляла, паведамілі, што з імі ўсё ў парадку. Для мяне гэта было самым важным. Пасля гэтага я выйшла на корт і проста гуляла ў тэніс.

– У цяперашніх умовах вайны тэніс, вядома, не самае важнае для Украіны. Але мяне цікавіць, ці ёсць у людзей магчымасць глядзець матчы? Якая сітуацыя з электрычнасцю і тэлебачаннем? І ці шкада, што матч паміж вамі і Элінай Світолінай мог бы стаць грандыёзнай падзеяй для краіны, калі б не вайна?

– Калі шчыра, я не ведаю дакладную статыстыку. Цяпер, наколькі мне вядома, вялікіх праблем з электрычнасцю няма. Самае складанае звычайна зімой.

Бывалі выпадкі, калі мае бацькі заставаліся без святла два-тры дні запар. Тое ж самае адбывалася і са многімі іншымі людзьмі. Гэта было жудасна, асабліва ўлічваючы, што на вуліцы было мінус дваццаць градусаў.

Цяпер сітуацыя лепш. Згодна з навінамі і па ўсіх паведамленнях, якія я атрымлівала з віншаваннямі пасля матча, вельмі шмат людзей глядзелі нашу гульню. Думаю, гэта быў важны матч для Украіны.

Вядома, хацелася б, каб такі матч адбыўся ў фінале. Але маем тое, што маем.

Інтэрнэт працуе. Нават калі ўзнікаюць праблемы з электрычнасцю, людзі за чатыры гады ўжо навучыліся рыхтавацца: зараджаюць тэлефоны, наўтбукі і іншыя прылады перад ноччу, таму што ніколі не ведаеш, якім будзе раніца.

У нас шмат адданых заўзятараў, і я вельмі рада дзяліцца з імі такімі момантамі. Яны глядзяць нашы матчы пры любых абставінах, – сказала Касцюк.

Чытайце таксама

Аўтар: Віктар Нікольскі

Крыніца: Tennis Actu TV