Сабаленка ўвайшла ў лік гульцоў, якія засталіся незадаволеныя прызавымі «Ралан Гарос» (Guardian)

Прадстаўнікі топ-20 ATP і WTA, уключаючы беларуску Арыну Сабаленка, серба Новака Джокавіча, амерыканку Коры Гаўф, выступілі з сумеснай заявай, у якой выказалі расчараванне ўзроўнем прызавых на «Ралан Гарос».

Пра гэта паведамляе Guardian.

На мінулым тыдні «Ралан Гарос» абвясціў аб павышэнні прызавога фонду на 9,5% – да 61,7 мільёна еўра, пры гэтым пераможцы адзіночных турніраў атрымаюць па 2,8 мільёна еўра.

«У 2025 годзе «Ралан Гарос» атрымаў 395 млн еўра даходу, што на 14% больш, чым годам раней, аднак прызавы фонд вырас толькі на 5,4%, з-за чаго доля гульцоў знізілася да 14,3%.

Пры чаканых даходах звыш 400 млн еўра ў гэтым годзе доля прызавых, верагодна, усё роўна застанецца ніжэй за 15%, што значна менш за 22%, якіх дамагаюцца гульцы, каб прывесці «Вялікія шлемы» да ўзроўню ATP і WTA. Пакуль «Ралан Гарос» ставіць рэкорды па даходах, гульцы атрымліваюць усё меншую долю ствараемай імі ж каштоўнасці.

Што яшчэ важней, гэтая заява ніяк не вырашае структурныя праблемы, пра якія гульцы паслядоўна і абгрунтавана кажуць ужо год. Не было ніякага дыялогу пра дабрабыт гульцоў, і не дасягнуты прагрэс у стварэнні механізма кансультацый з гульцамі пры прыняцці рашэнняў на ўзроўні «Вялікіх шлемаў».

Турніры «Вялікага шлема» па-ранейшаму супраціўляюцца зменам. Адсутнасць кансультацый з гульцамі і недастатковыя інвестыцыі ў іх дабрабыт адлюстроўваюць сістэму, якая не ў поўнай меры ўлічвае інтарэсы тых, хто з’яўляецца асновай поспеху гэтага віду спорту», ​​– гаворыцца ў заяве.

Нагадаем, у красавіку 2025 года гульцы топ-20 падпісалі і накіравалі ліст арганізатарам «Вялікіх шлемаў» з патрабаваннем істотна павялічыць прызавыя.

У верасні тэнісісты адправілі другі ліст з патрабаваннем павялічыць долю даходаў гульцоў – з цяперашніх 16% да 22% да 2030 года, а таксама прадугледзець штогадовыя ўзносы на пенсіі і медыцынскае забеспячэнне.