«Вядучыя гульцы свету» хочуць абмежаваць свой удзел у медыя-мерапрыемствах перад стартам «Ралан Гарос» з-за, на іх думку, недастатковай долі прызавых, паведамляе The Guardian.

Гульцы, выбраныя для ўдзелу ў прэс-канферэнцыі ў пятніцу, 22 траўня, пакінуць яе праз 15 хвілін пасля пачатку, сімвалізуючы той факт, што турніры Grand Slam выдзяляюць толькі 15% сваіх даходаў на прызавыя фонды.

Астатнія тэнісісты адмовяцца ад дадатковых інтэрв’ю галоўным інфармацыйным партнёрам турніру, якія валодаюць правамі на паказ медыятрансляцый – TNT Sports і Eurosport.

Паводле інфармацыі крыніцы, блізкай да гульцоў, яны абмеркавалі паміж сабой «стратэгію працы па правілах» на «Ралан Гарос» пасля таго, як стала вядома, што агульны прызавы фонд спаборніцтваў у гэтым годзе павялічыцца да 61,7 мільёна еўра.

Тэнісісты вывучылі рэгламент турніру і прыйшлі да высновы, што не атрымаюць штрафаў, калі будуць выконваць свае дамоўныя абавязкі па правядзенні кароткіх інтэрв’ю з праваўладальнікамі пасля кожнага матча.

Нагадаем, што ў красавіку арганізатары «Ралан Гарос» абвясцілі пра павелічэнне прызавога фонду на 9,5% – да 61,7 млн еўра (52,6 млн фунтаў стэрлінгаў), дзе пераможцы ў мужчынскім і жаночым разрадах атрымаюць па 2,8 млн еўра.

У сваю чаргу, гульцы топ-20 ATP і WTA, сярод якіх Новак Джокавіч (№4 ATP), Янік Сінер (№1 ATP), Арына Сабаленка (№1 WTA) і Коры Гаўф (№3 WTA) выступілі з сумеснай заявай, у якой выказалі расчараванне ўзроўнем прызавых, а таксама запатрабавалі паляпшэння сацыяльнага і пенсійнага забеспячэння і большай уплывовасці на вызначэнне раскладу турніраў.

«Ралан Гарос» пройдзе з 24 траўня па 7 чэрвеня.

Чытайце таксама

Аўтар: cымон pушынскі

Крыніца: The Guardian