Сінер пра паразу ад Серундола: «Мне было цяжка, пачалося моцнае галавакружэнне»
Першы ракетка свету Янік Сінер пракаментаваў паразу ад аргенцінца Хуана Мануэля Серундола (№56 ATP) у другім крузе «Ралан Гарос» – 6:3, 6:2, 5:7, 1:6, 1:6.
У трэцім сэце Сінер вёў з лікам 5:1, аднак страціў перавагу. Ён скардзіўся на галавакружэнне, яго таксама аглядаў фізіятэрапеўт.
«Я адчуваў сябе на корце не вельмі добра, але такое здараецца. У трэцім сэце ў мяне была добрая пазіцыя. Але не здолеў падаць на матч. Пасля гэтага мне стала вельмі цяжка.
Віншую яго (Серундола – заўв.). Я ні ў якім разе не хачу прынізіць яго заслугі. Ён правёў вельмі моцны матч, асабліва ў канцы.
Думаю, у цэлым тут супала шмат фактараў. Прычына не адна. Апошнія месяцы я вельмі шмат гуляў і не меў дастаткова часу на аднаўленне.
Раніцай я адчуў, што дрэнна спаў. Калі прачнуўся, мне ўжо было крыху цяжка, але, ведаеце, такое бывае. Звычайна на турнірах Grand Slam бывае пара дзён, калі адчуваеш сябе не ідэальна. Сёння быў менавіта такі дзень.
Мне было цяжка, пачалося моцнае галавакружэнне. Узровень энергіі знізіўся да мінімуму. Я спрабаваў падаць на матч, але сіл амаль не засталося. У чацвёртым сэце я крыху адпусціў гульню, спадзеючыся захаваць больш энергіі на пяты. Першы гейм [у пятым сэце] быў вельмі важным. Я не здолеў абараніць сваю падачу. І далей усё пайшло наперакос», – сказаў Сінер.
