Які ж мяч наварыў сабе «Гомель»: дзівачыў не толькі брамнік, але і абаронца. Гледачы насцеражыліся

2 траўня прайшоў другі гульнявы дзень 6-га тура чэмпіянату Беларусі. Апошнімі гулялі «Гомель» і «Тарпеда-БелАЗ». «Рысі» адкрылі лік ужо на 16-й хвіліне – хуткую атаку дакладным дальнім ударам завяршыў Кірыл Данілін.

Гомельцы трымалі перавагу да 59-й хвіліны, пакуль «Тарпеда-БелАЗ» не зраўняла – і зрабіла гэта максімальна дзіўным чынам. Вось гэты гол з ракурсу, які паказалі ў трансляцыі АБФФ: кіпер «Гомеля» Станіслаў Кляшчук чамусьці згуляў адной рукой – не даў мячу выйсці за межы поля, адкінуўшы яго ў брамніцкую. Там Віктар Сотнікаў мог спакойна выносіць, але замест гэтага абаронца замарудзіў і чамусьці пачаў закрываць мяч корпусам. У выніку Наджы Агбо выцарапаў яго з-пад нагі суперніка, а Махамед Бамба занёс у пустыя вароты.

Крыху пазней «Тарпеда-БелАЗ» апублікавала гэты эпізод, зняты з-за варот. З гэтага ракурсу ўсё выглядае яшчэ больш дзіўна і незразумела.

Каментатары пад відэа западозрылі дагаварняк.

У выніку – 1:1. «Гомель» пасля шасці тураў набраў 11 ачкоў і ідзе 4-м. У «Тарпеда-БелАЗ» усё больш сціпла: адна перамога ў шасці матчах і 10-е месца з 6 баламі.