Продаж квіткоў на спарынгі зборнай на «нацыянальным» стадыёне ідзе слаба – у АБФФ вырашылі падагрэць цікавасць розыгрышам прызоў

Учора кіраўнік АБФФ Яўген Булойчык прызнаў, што з продажам квіткоў на таварыскія гульні зборнай Беларусі з Сірыяй (5 чэрвеня) і Буркіна-Фасо (9 чэрвеня) пакуль усё дрэнна: «Мы ўвесь час адсочваем [сітуацыю]. Пакуль продаж ідзе, скажам так, чакана няхуткім тэмпам. Таму што наш заўзятар, не толькі ў футболе, чамусьці часта набывае квіткі напярэдадні матча. Але я заклікаю ісці ў касы загадзя, каб потым не было чэргаў і страты часу перад гульнёй».

Падобна, у федэрацыі вырашылі не спадзявацца выключна на звычку заўзятараў купляць квіткі ў апошні момант. Таму да матчаў дадалі яшчэ і розыгрыш прызоў.

Так, на сустрэчы з Сірыяй сярод усіх, хто прыйдзе на гульню, абяцаюць разыграць PlayStation 5 на 1 ТБ. А на гульні з Буркіна-Фасо – аранжавы iPhone 17 Pro на 256 ГБ. Умовы простыя: прыйсці на стадыён, узяць купон і дачакацца перапынку.

Цікава, ці дапамогуць PlayStation і новы iPhone сабраць на трыбунах больш гледачоў, чым сама зборная. А вы б пайшлі дзеля такога на гульні?