Калі маладосць дасведчаная. Расіянін Мікалай Гразін у мінулы ўік-энд трэці раз у кар’еры атрымаў перамогу на ралі Ліепая

Фота: fiaerc.com

23-гадовы ўраджэнец Масквы перамагаў на латвійскім этапе чэмпіянату Еўропы па ралі ў 2017 і 2018 гадах. Перамог і ў гэтым, спаборнічаючы ў мінулыя выхадныя з такімі грандамі, як дзейсны чэмпіён Аляксей Лук’янюк, Крэйг Брын і Андрэас Мікельсэн.

Мікалай Гразін – мара любога працадаўцы. Ён і малады, і дасведчаны, ды яшчэ і хлопец, а значыць, не сыдзе ў дэкрэтны адпачынак! Гэта ўсё жарты, канечне, але шэсць гадоў таму, робячы з ім інтэрв’ю, я зразумеў, што ён сталы і разумны гоншчык, хоць тады яго ралійная кар’ера толькі пачыналася.

Ну а потым Мікалай толькі пацвердзіў правільнасць маіх уражанняў, у тым ліку і згаданымі вышэй перамогамі. Ну а набраўшыся досведу, ён у гэтым годзе дэманструе гатоўнасць спаборнічаць і за перамогу ў еўрапейскім ралійным першынстве.

Першую смелую заяўку на чэмпіёнства ён зрабіў ужо на першым этапе ў Польшчы, але там яму перашкодзілі праблемы з шынамі. Аднак Мікалай зрабіў правільныя высновы пасля тых праблем, і спаўна адыграўся на ралі Ліепая – фактычна сваім хатнім, бо гоншчык пастаянна пражывае ў Латвіі і выступае пад латвійскай ліцэнзіяй.

Яго трэцяя перамога на латвійскім этапе ERC і стала паказчыкам яго гатоўнасці да гонкі за тытулам, улічваючы дамінуючы стыль, у якім яна была атрыманая. Гразін на сваім Volkswagen Polo GTI R5 захапіў лідарства ад самага пачатку ў пятніцу, і не саступаў яго да самага фінішу ў суботу. Ён выйграў усе пятнічныя допы (два з іх, дарэчы – гарадскія у самой Ліепаі – былі адмененыя праз эпідэміялагічныя рызыкі) і тры суботніх, пакінуўшы пераследнікам разбірацца за астатнія пазіцыі на подыуме.

Вось за іх барацьба ішла напружаная. Прэтэндэнтаў было багата: і згаданыя вышэй Лук’янюк, Брын і Мікельсэн, і іспанец Эфрэн Ларэна на Škoda Fabia Rally2 Evo. Мікельсэн, праўда, хутка выпаў з гэтага кола, атрымаўшы хвілінны штраф за спазненне на старт другога спецучастка.

Яго каманда Toksport WRT паспрабавала аспрэчыць гэтае пакаранне, бо спазніўся Андрэас праз механічныя праблемы на яго Шкодзе, аднак яно засталося ў сіле, а сам нарвежац так і застаўся пятым у выніковым пратаколе. Стаўшы пры гэтым аўтарам лепшых вынікаў на двух апошніх допах у суботу.

Што да Ларэны, то ён проста саступіў Брыну з Лук’янюком у хуткасці. Па выніках першага спаборніцкага дня ён яшчэ апярэджваў расіяніна, аднак той выйшаў наперад ужо ў суботу раніцай. Сапраўднай дуэлі з Брынам у Аляксея не атрымалася – ірландзец на сваім Hyundai i20 R5 таксама быў хуткім і заняў у выніку другое месца, не дапусціўшы памылак.

У адрозненні ад Лук’янюка, дарэчы. Той у пятніцу не ўпісаўся ў адзін з паваротаў, згубіўшы на гэтым некалькі секунд, а ў суботу на дзявятым спецучастку, зачапіўшы агароджу, пашкодзіў радыятар свайго Citroën C3 Rally2. На яго шчасце, яго каманда Saintéloc Junior Team у мінулы ўік-энд абслугоўвала толькі яго аўтамабіль, таму механікі паспелі замяніць пашкоджаную дэталь, і Лукас працягнуў гонку, фінішаваўшы трэцім.

Што, аднак, не перашкодзіла яму толькі замацаваць сваё лідарства ў чэмпіянаце. У ім Аляксей зараз мае 64 ачкі, цяпер ужо на дзевяць апярэджваючы Мікельсэна, які застаўся другім. Польскі гоншчык Міка Марчык, які ў Латвіі фінішаваў шостым, па-ранейшаму замыкае першую тройку з 41 балам на рахунку.

У камандным жа заліку ў лідары выбіўся калектыў Toksport WRT, у якога цяпер 99 ачкоў. Шэсць яму саступае Rallye Team Spain, што займае другую пазіцыю. Sainteloc Junior Team цяпер толькі трэція, у іх 71 ачко.

Чэмпіянат Еўропы па ралі працягнецца 23-25 ліпеня ў Італіі. Гонка Rally di Roma Capitale у наваколлях Вечнага Гораду, у адрозненні ад першых дзвюх, будзе асфальтавай і, магчыма, выявіць і новых фаварытаў.