Дамінаванне Рэно, унутрыкамандныя разборкі ў KTM, удача Гайсэра і іншыя падзеі мотакросавага Гран Пры Латвіі

Фота: mxgp.com

Этап MXGP у латвійскім Кегумсе быў надзвычай удалым для Максіма Рэно, харошым для Ціма Гайсэра і крыху расчараваў Джэфры Херлінгса. Разбіраемся, чаму менавіта так.

Думаю, ніякую з трас сусветнага чэмпіянату па мотакросе нельга назваць простай. Але тую, што знаходзіцца ў латвійскім Кегумсе як асабліва складаную выдзяляюць многія. Закручаны ва ўсе бакі 1 790-метровы трэк амаль што без прамых участкаў не даруе памылак, пры гэтым іх правакуючы.

Затое ён дакладна выяўляе лепшых гоншчыкаў. І лідар чэмпіянату ў катэгорыі MX2 Максім Рэно ў мінулы ўік-энд як раз пацвердзіў, што належыць да іх кола. Перамогі ў абедзвюх гонках і выніковую на Гран Пры ён атрымаў, прадэманстраваўшы яшчэ і сапраўдную стабільнасць. Тую самую, што ёсць прыкметай майстэрства.

Гоншчык Monster Energy Yamaha Factory Racing у абодвух выпадках застаўся без хол-шоту, які двойчы выйграў яго пакуль што галоўны канкурэнт Маціа Гуаданьіні з Red Bull KTM Factory Racing. Затое потым Рэно ў сваю чаргу двойчы эфектыўна прарываўся с чацвёртай пазіцыі ў першай гонцы і з трэцяй у другой, абагнаўшы Гуаданьіні ў барацьбе за першую пазіцыю на пятым кругу ў кожным з заездаў.

Італьянцу ж толькі ў першым пашчасціла ўтрымаць другую пазіцыю і фінішаваць на ёй. У другім жа ён атрымаў адмашку клецістым сцягам трэцім, прапусціўшы таксама і напарніка бельгійскага Рэно Яга Гіртса, які ў першай гонцы сам прыйшоў да фінішу трэцім. Па выніку ж этапу Яга заняў другое месца, а Маціа падняўся на ніжнюю ступень подыуму.

У чэмпіянаце ж, дзе Рэно працягвае замацоўваць сваё лідарства і ўжо давёў ачковы рахунак да 271 пункта, Гуаданьіні захаваў другую пазіцыю і мае 237 ачкоў. Галоўным пераследнікам італьянца цяпер з’яўляецца Гіртс, які саступае яму ўсяго два балы. Дзякуючы намаганням сваіх райдэраў і ўся Yamaha адрываецца ад KTM у заліку вытворцаў у MX2, маючы 312 балаў супраць 292 у аўстрыйскай маркі. Kawasaki з 227 ачкамі пакуль захоўвае трэцюю пазіцыю, але Husqvarna наблізілася ўшчыльную і адстае толькі на адзін бал.

У галоўнай катэгорыі MXGP незалежна ад вынікаў латвійскі этап стаў этапам Джэфры Херлінгса. Нідэрландскі гоншчык завадской каманды KTM працягвае выступаць за зламаным пасля сутыкнення ў першай гонцы хатняга Гран Пры з Іва Мантычэлі правым плячом. І працягвае не проста выступаць, але і перамагаць у гонках. Ён і тую самую першую хатнюю выйграў, і першую папярэднягя бельгійскага этапу, і першую з латвійскіх.

Пры гэтым у першым заездзе Джэфры яшчэ і аўтарам хол-шоту стаў, аднак на першым кругу даволі жорстка пабадаўся з адным са сваіх партнёраў па камандзе – іспанцам Хорхе Прада. Той нават на кароткі момант вырваўся наперад, аднак нідэрландзец хутка аднавіў статус-кво і болей лідарства не губляў. Прада ж пазней прапусціў наперад і Ціма Гайсэра, які таксама добра стартаваў, фінішаваўшы потым другім, а затым пасля і жорсткай, і ўжо болей працяглай бойкі і яшчэ аднаго свайго сукамандніка Антоніа Кайролі, які і замкнуў першую тройку.

Іітальянскаму чэмпіёну прыйшлося паскорыцца пасля таго, як у небяспечнай блізкасці ад яго апынуўся французскі прадстаўнік Monster Energy Kawasaki Racing Team Рамэн Фэвр. Кайролі, каб не апынуцца пад яго атакамі, да Прада абагнаў таксама завадскога гоншчыка Ямахі Глэна Колдэнхофа. Нідэрладзец выдатна стартаваў, але да фінішу прыйшоў толькі сёмым, прапусціўшы яшчэ і таго ж Фэвра, і мясцовага гоншчыка Йонаса Паўльса з каманды Standing Construct GasGas Factory Racing, які фінішаваў акурат перад ім.

Другая гонка, што, у адрозненні ад першай, праходзіла пад дажджом, склалася для Паўльса не так удала – патрапіўшы ў стартавы завал у першым павароце і ўпаўшы там, да фінішу латвіец прыйшоў толькі пятнаццатым. Але падалі ў другім заездзе многія, і выключэннем у чарговы раз не стаў і Фэвр. Непрыемнасць з ім здарылася на першых кругах, калі ён быццам бы ўпэўнена лідзіраваў пасля хол-шоту ў пачатку.

Лідарства пасля гэтага перайшло да Прада, які ў складаных надворных умовах доўгі час выглядаў недасягальным нават для Херлінгса, які быў яго галоўным пераследнікам. Аднак на апошніх кругах жалезны Джэфры (натуральна жалезны – у першай гонцы Гайсэру ён «прывёз» амаль восем секунд) пачаў скарачаць адставанне ад Хорхе.

Наблізіцца на адлегласць атакі ў нідэрландца, праўда, не атрымлівалася, але вострай неабходнасці абагнаць Прада ў яго не было – другога месца ў другім заездзе яму хапала для выніковай перамогі на этапе. І тым больш крыўдным было яго падзенне пад канец самага апошняга кругу, у выніку якога фінішаваў Джэфры толькі чацвёртым, прапусціўшы наперад Гайсэра і Фэвра.

Рамэну, дарэчы, фініш зусім не быў гарантаваны. Рухавік яго матацыкла пад канец гонкі пачаў моцна дыміць, аднак пазней перастаў, і сходу з дыстанцыі француз пазбег. Ды яшчэ і першую тройку на фінішы замкнуў, скарыстаўшыся, канечне, падзеннем найперш Херлінгса. Праўда, і Кайролі быў паваліўся ў самым пачатку гонкі, яшчэ да самога Фэвра, таксама крыху падыграўшы канкурэнту з Kawasaki. Сам Антоніа фінішаваў шостым.

Што ж да Херлінгса, то, зразумела, выніковым трэцім месцам пры магчымай перамозе задаволены ён не быў. Ды і Прада, які фінішаваў першым у другой гонцы, падняўся толькі на сярэднюю ступень подыуму, хоць і сам разлічваў на большае. Перамогу ж атрымаў Гайсэр, які другі заезд скончыў на другім месцы.

Так што сваё турнірнае становішча славенец з завадской Хонды у выніку палепшыў, замацаваўшы сваё лідарства. У яго пасля сямі этапаў 270 ачкоў супраць 257 у Фэвра, які пакуль што застаецца другім, але наўрад ці надоўга. Прада, які падняўся на трэцюю пазіцыю, адстае ад яго ўсяго на два ачкі, Кайролі, які апусціўся на чацвёрты радок, на пяць.

Пры гэтым KTM, лідзіруючы ў заліку вытворцаў у MXGP, за кошт большай стабільнасці сваіх гоншчыкаў адрываецца ад Хонды, якая застаецца на другой пазіцыі. У аўстрыйскай маркі 329 ачкоў супраць 271 у японскай. Затое ад суайчыннікаў з Kawasaki, якія засталіся трэцімі, удалася павялічыць адрыў з аднаго ачка да дзевяці.

Пасля візіту ў Латвію чэмпіянат свету па мотакросе бярэ амаль што месячную паўзу. Наступны яго этап у турэцкім Аф’ёнкарахісары адбудзецца ў першы ўік-энд верасня. Што, дарэчы, ёсць добрай навіной для Херлінгса, які атрымае час, каб залячыць свае раны, набрацца сіл і далучыцца да спрэчкі за тытул. Астатнія адзінаццаць этапаў сезону дакладна будуць цікавымі!