Перамога Аж’е і прыз глядацкіх сімпатый Цянаку на Ралі Партугалія

Фота: wrc.com

Пяты этап чэмпіянату свету па ралі, што прайшоў у мінулыя выхадныя, не быў лёгкім ні для аднаго з удзельнікаў. Проста камусьці, як васьміразоваму чэмпіёну Себасцьену Аж’е, пашанцавала болей, а камусьці, як чэмпіёну 2019 года Оту Цянаку, меней.

Не ведаю, ці моцна сумны быў Аж’е, калі б не выйграў адну са сваіх самых любімых гонак у сёмы раз. Напэўна, не, але ж не проста так француз па-ранейшаму ўдзельнічае ў WRC, хай і па скарочанай праграме. Кожны раз ён імкнецца змагацца менавіта за перамогу, так было і ў гэты раз.

Ралі Партугалія быў другім пасля Кеніі поўнасцю гравійным этапам, дакладней, амаль поўнасцю, таму што першы амаль трохкіламетровы глядацкі суперспэшл Figueira da Foz у чацвер быў усё ж такі асфальтавым. Хаця машыны на яго старт усё роўна выйшлі ў гравійных спецыфікацыях.

І гэта быў першы і апошні доп, на якім бліснуў лідар чэмпіянату з каманды Toyota Элфін Эванс. На наступны дзень валіец адкрываў спецучасткі і працаваў бульдозерам, праз што асноўную частку дыстанцыі бароўся не за перамогу, а за выжыванне ў сярэдзіне першай дзясяткі. Не так усё дрэнна было ў Аж’е, але і ён на ранішняй секцыі пятніцы не мог пахваліцца хуткасцю праз пралік з наладамі яго GR Yaris.

Крыху лепей справы ішлі ў двухразовага чэмпіёна Кале Раванпэры, які ад пачатку патрапіў у першую тройку, але навязаць рэальную барацьбу Оту Цянаку не атрымалася і ў фіна. Пры гэтым і эстонец з Hyundai хоць і лідзіраваў, але не быў цалкам задаволены сваёй формай – праз выбар цвёрдых шын яму на першых спецучастках не хапала зачэпу.

Так што лёгкага шпацыру ў пятніцу ў Ота не атрымалася, канкурэнты былі блізка ўвесь час. І не толькі канкурэнты, але і яго партнёр па камандзе Адрыен Фурмо, які ўжо па выніках чацвёртага спецучастка прабіўся на другую пазіцыю, на якой заставаўся да сёмага, не саступаючы пры гэтым Цянаку і адной секунды.

Але на восьмым допе Arganil 2 француз у адной са шпілек пашкодзіў аб камень стырнавую цягу свайго i20 N і сышоў з дыстанцыі. Яшчэ адзін прадстаўнік карэйскай каманды, дзейны чэмпіён Цьеры Нэвіль, быў далёка, на пятай пазіцыі, таму супрацьстаяць таётаўскай армадзе Цянак мусіў быў адзін.

Па выніках першага паўнавартаснага спаборніцкага дня эстонец захаваў першую пазіцыю, але Аж’е з яшчэ адным прадстаўніком Таёты Такамота Катсутай абодва былі меней чым у дзесяці секундах ад яго. Себасцьен, які пасля сэрвісу ўжо не меў праблем з наладамі, быў бліжэйшым пераследнікам Ота, і раніцай у суботу таксама трымаўся ў некалькіх секундах ад яго. Затым гоншчык Hyundai пачаў быў адрывацца, але паломка ўзмацняльніка стырнавога кіравання ўвечары на сямнаццатым спецучастку перакрэсліла яго шанцы на перамогу.

У выніку другі спаборніцкі дзень Цянак скончыў на трэцяй пазіцыі, прапусціўшы наперад яшчэ і Раванпэру. Пры гэтым фін прайграваў Аж’е, які выйшаў у лідары, больш за дваццаць сем з паловай секунд, а адставанне Ота ад Сэба наогул перавышала трыццаць шэсць секунд. Адыграць іх здавалася немагчымым, але Цянак у нядзелю ўсё ж такі паспрабаваў, і прыз глядацкіх сімпатый дастаўся менавіта яму.

Эстонец быў самым хуткім гоншчыкам у фінальны дзень Ралі Партугалія, забраўшы сабе ўсе бонусныя балы, у тым ліку за перамогу на фінальным суперспэшле. Так, Аж’е ён не апярэдзіў – той атрымаў сёмую перамогу ў гэтай гонцы і шэсцьдзесят трэцюю ў сваёй кар’еры, але Раванпэру От апярэдзіў (Кале замкнуў першую тройку), а адставанне ад Себасцьена скараціў да 8,7 секунды.

У чэмпіянаце паміж імі ўсяго два балы, але і тут Аж’е, які мае 86 ачкоў, наперадзе – на трэцяй пазіцыі. А двух наперадзе ад Себасцьена Раванпэра, які пакрысе набліжаецца да Эванса. Той пакуль што лідзіруе са 118-цю баламі, але паўтор такога выніка, як у Партугаліі (шостае месца) можа дорага яму каштаваць.

У камандным заліку Toyota ўсё далей адрывацца ад Hyundai і мае ўжо 258 балаў супраць 203-х. Трэцюю пазіцыю займает M-Sport Ford, які мае 72 ачкі. Лепшым прадстаўніком брытанскага калектыву гэтым разам стаў Джошуа МакЭрлін, які заняў восьмае месца.

У катэгорыі WRC2 перамогу на Ралі Партугалія атрымаў Олівер Сольберг. Швед на сваёй Toyota GR Yaris Rally2 правёў гонку ў дамінуючым стылі, болей чым на пяцьдзясят секунд апярэдзіўшы Ёхана Расэля на Citroën C3 Rally2, які заняў другое месца. Вось яму ўжо прыйшлося пабіцца за такі вынік з Гасам Грынсмітам на Škoda Fabia RS Rally2, які фінішаваў трэцім.

Таксама ў Партугаліі прайшоў этап юніорскага чэмпіянату свету, які часткова перасякаецца з катэгорыяй WRC3, у якой практычна ўсе выступаюць на Ford Fiesta Rally3. Лепшым тут стаў аўстраліец Тэйлар Джыл, які паўтарыў сваё дасягненне на шведскім этапе. Ён гэтым разам не проста быў хуткім, але і дзейнічаў разумна, не рызыкуючы тады, калі гэтага не патрабавалася. Яго галоўны канкурэнт і лідар чэмпіянату Міле Ёхансан таксама быў хуткім, але ў выніку задаволіўся другім месцам. Трэцяе заняў турак Керэм Казаз.

Наступным этапам чэмпіянату свету стане Ралі Сардынія, якое пройдзе 5-8 чэрвеня. Італьянская гонка простай не лічылася ніколі, таму і яна можа ўшчыльніць становішча ў турнірнай табліцы, што нам будзе тольі на радасць. Віримо в ЗСУ! Слава Україні! Жыве Беларусь!