За зборную Кітая дэбютавала 18-гадовая дзяўчына з ростам 226 см (!) – яна шалёна вірусіцца ў сацсетках

16 чэрвеня адбыўся нібыта шараговы таварыскі матч жаночых зборных Кітая і Босніі і Герцагавіны. Аднак сустрэча мела шалёны ажыятаж у сеціве – усё праз 18-гадовую Чжан Цзыюй.

Кітаянка мае рост 226 см (!!!)

У гэтай сустрэчы дзяўчына дэбютавала за дарослую зборную Кітая: чаму так рана? Усё проста – баскетбалістка ўжо сёння мае фенаменальны для жаночай (ды і для мужчынскай таксама) гульні рост 226 сантыметраў.

Яна з'яўляецца адной з самых высокіх гульцоў у гісторыі – у адкрытых крыніцах не сустракаюцца згадкі пра баскетбалістак вышэйшых за Чжан. У сеціве маладую спартсменку імгненна ахрысцілі жаночай версіяй Яо Міна – легендарнага кітайскага цэнтравога, які стаў правадніком мясцовага баскетбола ў НБА. Мін вышэйшы за Чжан усяго на 3 сантыметры.

У сустрэчы супраць Босніі Чжан набрала 16 пунктаў і зрабіла сем падбораў усяго за 12 хвілін гульнявога часу, а Кітай разгромна перамог 127-56.

Запальвала і на моладзевым узроўні

У зборнай U-18 Чжан была сапраўднай зоркай апошняга Кубка Азіі: была прызнаная MVP турніру, на якім у сярэднім набірала 35 пунктаў, 12,8 падбораў і 2,8 перадачы за гульню.

Баскетбалістка правяла сезон у сістэме клуба элітнага дывізіёна Кітая «Пекін». Адтуль прыцягвалася да мясцовага Матчу зорак яшчэ да прафесійнага дэбюту.

Упершыню Чжан выклікала фурор у сеціве, калі мела ўсяго 14 гадоў. Тады разляцеліся яе фота са спаборніцтва U-15 – цэнтравая ўжо тады была значна вышэйшая за аднагодак:

Яе фенаменальнаму росту ёсць пэўнае тлумачэнне. У мінулым годзе Чжан давала разгорнутае інтэрв'ю ФІБА, дзе распавяла пра бацькоў. Аказваецца, што і мама, і тата ў маладосці гулялі ў баскетбол і маюць уражальныя 198 і 213 сантыметраў росту.

Што датычыцца жаночай НБА, цяпер у лізе дзейнічае простае правіла выхаду на драфт для замежных гульцоў – сваю кандыдатуру можна выстаўляць толькі з 20 гадоў.

Чжан шалёна вірусіцца ў сацсетках

Такія анамальныя антрапаметрыя і выступы не маглі застацца незаўважанымі ў эпоху сацсетак – пасты пра кітаянку збіраюць мільёны праглядаў.

У рэшце нічога дзіўнага:

Фота/відэа: ФІБА | Bleacher Report | New York Basketball | Fred Lee/Getty Images, VCG/VCG via Getty Images