Цяпер і «Спортынг» – яшчэ 4 клубы, якія адгуляліся з «мінус 3» у плэй-оф Лігі чэмпіёнаў

Партугальскі «Спортынг» зрабіў тое, што не кожнаму па плячы – адгуляў паражэнне 0:3 ад «Будзё-Глімта» ў першым матчы 1/8 фіналу Лігі чэмпіёнаў.

Нагадаем, што ў першай гульні нарвежцы дома знішчылі суперніка – проста без шанцаў.

Аднак у Партугаліі казка «Будзё-Глімта» скончылася: у асноўны час «Спортынг» змог зраўняць лік і перавесці матч у экстратайм. А ўжо там зрабіў сіламі Максімільяна Арауха і Рафаэла Нэла (які праводзіў дэбютны матч у ЛЧ) фінальныя 5:3 па суме двух матчаў.

Усе галы матчу:

Такім чынам, «Спортынг» склаў кампанію «Дэпартыва», «Барселоне», «Роме» і «Ліверпулю», якія раней адгульвалі розніцу ад трох мячоў і нават больш.

2003/04, чвэрцьфіналы, «Мілан» – «Дэпартыва»

У першым матчы на ​​«Сан Сіра» дзейны на той момант уладальнік трафея «Мілан» пад кіраўніцтвам Карла Анчалоці ўпэўнена перамог 4:1. Хаця менавіта госці высілкамі Вальтара Пандыяні адкрылі лік у той гульні на 11-й хвіліне – гаспадары адказалі дублем Кака, а таксама галамі Шаўчэнкі і Пірла.

Аднак у Ла-Карунні было балюча: Пандыяні зноў забіў першым, а за ім адзначыліся партнёры Хуан Карлас Валён, Альберт Луке і Фран. 4:0!

2016/17, 1/8 фіналу, «Барселона» – «ПСЖ»

Магчыма, самы легендарны камбэк у гісторыі не толькі Лігі чэмпіёнаў, але і ўсяго футбола. Пасля матчу ў Парыжы здавалася, што ў каталонцаў увогуле няма шанцаў, бо ў адрозненне ад іншых каманд у гэтай падборцы яны адставалі не на 3, а на 4 галы.

У другім матчы «Барселона» вяла 3:0 ужо на 50-й хвіліне, але затым Кавані забіў за парыжан і здавалася, што цяпер ужо дакладна далей пройдзе «ПСЖ» (тады яшчэ дзейнічала правіла выязнога гола).

Аднак каталонцы зрабілі цуд, забіўшы тройчы з 88-й хвіліны. Вядома, у Парыжы да гэтага часу незадаволеныя судзействам у тым матчы, аднак вечар быў эпічным.

2017/18, чвэрцьфіналы, «Барселона» – «Рома»

«Барселона» Эрнэста Вальвердэ была відавочным фаварытам супрацьстаяння – і два аўтагалы, якімі на 38-й і 55-й хвілінах адкрылі лік Даніэле Дэ Росі і Костас Манолас, здавалася, гэта зацвердзілі. Фінальны лік гульні на «Камп Ноў» – 4:1 – быццам бы не пакідаў шанцаў «Роме» Эўсебіа Ды Франчэска.

Аднак на «Алімпіка» адбылося тое, што ўвайшло ў гісторыю як «рэмантада». Джэка адкрыў лік ужо на 6-й, на 58-й Дэ Росі падвоіў перавагу... А на 82-й Манолас стаў «грэчаскім богам у Рыме»:

Праўда, варта зазначыць, што сёння гол Маноласа толькі б перавёў матч у экстратаймы – тады яшчэ працавала правіла выязнога гола.

2018/19, паўфіналы, «Барселона» – «Ліверпуль»

Так, «Барса» губляла такім чынам перавагу два сезоны запар! Другі раз гэта адбылося з «Ліверпулем» – у першым матчы гол Суарэса і дубль Месі, здавалася, не пакідалі сумневаў.

Але ў Брытаніі ужо на 7-й хвіліне забіў Дзівок Арыгі. На 54-й і 56-й хвілінах прарвала Вейналдума – дубль, які выраўнаваў сітуацыю.

А на 79-й... Да вы, мабыць, і так ведаеце: «Twelve minutes to go in normal time, Liverpool 3-0... Corner taken quickly!»

Фота: Elli Birch/Global Look Press