Чаму Габрыэл пайшоў біць рашаючы пенальці ў фінале ЛЧ

Да гэтага ў абаронцы было 0 удараў з кропкі ў кар’еры.

Dzmitry Antonau31 траўня 2026, 10:54

Габрыэл / Marc Atkins/Getty Images

Клубны сезон 2025/26 афіцыйна завяршыўся фіналам Лігі чэмпіёнаў, у якім «ПСЖ» абгуляў «Арсенал» у серыі пенальці 1:1 (4:3). «Кананіры» былі як ніколі блізкія да свайго першага трафея такога маштабу, але два промахі Эзэ і Габрыэла прынеслі перамогу парыжанам.

Чаму цэнтральны абаронца Габрыэл увогуле выконваў пенальці? Гэтым пытаннем задаюцца многія заяўзятары ў сацыяльных сетках і ў каментарах пад матэрыяламі і навінамі пра фінал ЛЧ.

Лідар «Арсенала» ніколі раней у кар’еры не падыходзіў да кропкі, а тут раптам вырашыў прабіць апошнім. Звычайна на чацвёрты і пяты ўдары прызначаюць гульцоў з вялікім вопытам выканання пенальці. Але ў «кананіраў» атрымалася інакш.

Габрыэл нават не патрапіў у створ варот.

Пасля матчу галоўны трэнер «Арсенала» Мікель Артэта патлумачыў гэтае рашэнне: «Ён сам захацеў выканаць пяты ўдар. Мы рыхтаваліся і трэніраваліся менавіта на такі момант. Звычайна пенальці ў нас б’юць Сака, Эдэгар і Хаверц. Але мы разумелі, што калі матч дойдзе да дадатковага часу і серыі пенальці, то ўдары будуць выконваць ужо іншыя гульцы. У такія моманты трэба спраўляцца з ціскам. Нажаль, нам не хапіла той дакладнасці, якую паказаў супернік, і менавіта таму мы не змаглі перамагчы».

І Сака, і Эдэгар, і Хаверц былі заменены па ходзе матчу, так што Артэта не мог разлічваць на сваіх асноўных пенальтыстаў. Пасля Дзёкерэша, Эзэ, Райса і Марцінэлі, якія прабілі першыя чатыры ўдары лонданцаў у гэтай серыі пенальці, у Мікеля заставаўся не такі ўжо і вялікі выбар гульцоў для пятага ўдару.

Статыстыка даступных для выбару гульцоў была наступнай:

Габрыэл – 0 удараў з пенальці ў кар’еры

Цімбер – 0 удараў з пенальці ў кар’еры

Саліба – 0 удараў з пенальці ў кар’еры

Інкап’е – 0 удараў з пенальці ў кар’еры

Субімендзі – 0 удараў з пенальці ў кар’еры

Мадуэке – 3 удары: 2 рэалізаваных пенальці, 1 – нерэалізаваны

Гэта значыць, заставаўся толькі адзін футбаліст, у якога быў хоць нейкі досвед – Ноні Мадуэке. Ён часта выконваў пенальці на юнацкім узроўні (за ПСВ і зборную Англіі), але ў дарослым футболе ў яго было не так шмат спроб. Абодва рэалізаваныя ўдары з кропкі былі ў сезоне 2023/24 у складзе «Чэлсі» – тады ён забіў «Уімблдону» у Кубку лігі і «Крыстал Пэлас» у АПЛ. Наступнай спробы прыйшлося чакаць да студзеня гэтага года, але тады Ноні не змог забіць «Портсмуту» у Кубку Англіі. Магчыма, той незабіты пенальці і стаў прычынай таго, што Мадуэке вырашыў не змагацца за права прабіць у першай пяцёрцы ў фінале ЛЧ.

Хаця калісьці вінгер ледзь не з кулакамі спрабаваў вырваць права на ўдар. У красавіку 2024 года ў рамках 33-га тура АПЛ «Чэлсі» разграміў «Эвертан» 6:0. Чатыры мячы ў тым матчы забіў Коўл Палмер, але іх магло быць тры, бо Мадуэке хацеў выканаць пенальці ў сярэдзіне другога тайма. Але Палмер з боем адабраў у яго мяч.

Самога Габрыэла пасля матча эксперты не крытыкавалі, а хутчэй хвалілі.

Петэр Шмейхель: «Мне неверагодна шкада Габрыэла, я лічу, што ён быў найлепшым гульцом на полі сёння».

Легенда «Арсенала» Цьеры Анры: «Шчыра кажучы, я быў здзіўлены, але я лічу, што калі ў цябе хапае смеласці выйсці і ўзяць ініцыятыву ў свае рукі, значыць, у цябе ёсць дзёрзкасць і рашучасць».

Рыа Фердынанд: «Габрыэл – сапраўдная скала, і яму не павінна быць сорамна за пенальці. Павага».

Былы абаронца зборнай Англіі і «Арсенала» Мэцью Апсан: «Габрыэл аддаў усе сілы сваёй камандзе. Ён праявіў настрой і смеласць, каб выйсці і ўзяць на сябе адказнасць».

Дэклан Райс падбадзёрыў партнёраў, якія прамахнуліся ў серыі: «Прамахнуцца з пенальці ў фінале Лігі чэмпіёнаў, вядома, непрыемна. Але мы іх любім і падтрымліваем. Такое здараецца ў футболе. Усе прамахваліся з пенальці, і без гэтых дваіх у гэтым сезоне мы б сапраўды не выйгралі Прэм’ер-лігу. Габрыэл... у мяне скончыліся словы, каб апісаць яго як чалавека і як гульца. Эзэ забіў некалькі важных мячоў для нас у гэтым сезоне. Такое бывае. Гэта футбол, і гэта жорстка. Ну што ж, мы шукаем пазітыўныя моманты і рухаемся далей».

Нават Маркіньяс, капітан «ПСЖ», адразу пасля рашаючага промаху Габрыэла пабег не святкаваць з камандай, а падтрымаў партнёра па зборнай Бразіліі.