Хто вязе на ЧС самы дарагі склад і на якім месцы фаварыт

Дэдлайн рэгістрацыі складаў на ЧС-2026 ззаду, таму цяпер мы можам ацэньваць ростар кожнай зборнай-удзельніцы па розных параметрах, вызначаючы самых-самых-самых.

Напрыклад, самы ўзроставы склад на турнір вязе Панама – сярэдні ўзрост гульцоў у іх складае 30,4 гады. Адпаведна, самымі маладымі на ЧС прыедуць івуарыйцы – у іх гэты паказчык 25,8 года.

Зборная гэтай афрыканскай краіны таксама характэрная тым, што ніводны з яе гульцоў не прадстаўляе родны івуарыйскі чэмпіянат – усе з’яўляюцца легіянерамі. Але яны не адзіныя – такая ж сітуацыя ў Сенегале, Кюрасаа, Уругваі, ДР Конга, Каба-Вэрдэ.

А вось менш за ўсё «зарабчан» у ростэры Катара і Саудаўскай Аравіі – па адным такім гульцу.

Але больш за ўсё ўвагі звычайна прыцягваюць грошы і пытанне, хто каштуе даражэй.

Францыя едзе на ЧС самай дарагой камандай са значным адрывам. Французы на 200 млн еўра даражэйшыя за бліжэйшых праследавацеляў – англічан. Большы разрыў паміж суседзямі ў рэйтынгу толькі паміж трэцяй Іспаніяй і чацвёртай Партугаліяй.

Тая ж Іспанія, пры гэтым, у букмекераў з’яўляецца фаварытам на перамогу ў турніры, апярэджваючы даражэйшыя зборныя Францыі і Англіі.

Пазначым прысутнасць у топ-дзесятцы Нарвегіі, якая відавочна вылучаецца сярод гэтай кампаніі грандаў і паўграндаў. У скандынаваў адбіваецца прысутнасць у камандзе Эрлінга Холанда, трансферны кошт якога складае траціну ад агульнага кошту ўсёй зборнай Нарвегіі.

Па-за дзясяткі адзначым самыя дарагія зборныя іншых канфедэрацый, акрамя еўрапейскай і паўднёваамерыканскай:

– самая дарагая зборная Афрыкі – Кот-д’Івуар (530,9 млн еўра);

– самая дарагая зборная Паўночнай Амерыкі – ЗША (378,2 млн еўра);

– самая дарагая зборная Азіі – Японія (278,9 млн еўра);

– самая дарагая зборная Акіяніі – вядома, Новая Зеландыя (35,35 млн еўра).