41-гадовая бабслеістка ўпершыню стала алімпійскай чэмпіёнкай – на сваіх пятых (!) Гульнях

41-гадовая бабслеістка Элана Маерс-Тэйлар упершыню перамагла на Алімпіядзе. Ёй спатрэбілася пяць Гульняў, каб атрымаць тытул алімпійскай чэмпіёнкі.

Амерыканка аказалася найлепшай у монабобе. Да таго яна збірала на Алімпіядах срэбныя і бронзавыя медалі.

Другой стала Лаура Нольтэ з Германіі. Яна лідаравала пасля першых трох заездаў, але ў выніку адстала на 0,04 с.

40-гадовая Кейлі Армбрустэр Хамфрыс з ЗША заваявала бронзу Алімпіяды. Гэта пяты алімпійскі медаль у яе кар’еры. 18 месяцаў таму яна стала мамай.

Маерс-Тэйлар – адна з самых тытулаваных амерыканак, калі ўлічваць выступленні толькі на зімовых Гульнях: дзеліць першае месца па колькасці медалёў з канькабежкай Боні Блэр. Таксама Элана стала найстарэйшай удзельніцай зімовай Алімпіяды, якая здабыла золата ў індывідуальных спаборніцтвах.

«Я думала, што гэта немагчыма», – пракаментавала сваю перамогу Маерс-Тэйлар.

У час свайго алімпійскага дэбюту ў Ванкуверы ў 2010 годзе Элана атрымала бронзу.

Маерс-Тэйлар таксама з’яўляецца шматразовай чэмпіёнкай свету, маючы 10 медалёў і 4 тытулы ЧС. Акрамя таго яна заваявала 55 медалёў на этапах Кубка свету па бабслеі.

Кар’ера Эланы была пад пагрозай праз строс мазгоў.

Маерс-Тэйлар – маці дваіх дзяцей, Ніка і Ноя. Яны абодва маюць парушэнне слыху. Каб камунікаваць з дзецьмі, Элана вывучае мову жэстаў.

Бабслеістка абараняе правы дзяцей з інваліднасцю і супрацоўнічае з рознымі арганізацыямі, якія займаюцца сіндромам Дауна, паколькі ў яе сына Ніка ёсць гэты сіндром.

Маерс-Тэйлар зможа атрымаць яшчэ ўзнагароду на гэтых Гульнях, бо выступіць і ў бобе-двойцы.

Фота: instagram Элані Маерс-Тэйлар