«Не прарасійскім гвалтаўнікам»: як спорт Грузіі рэагуе на пратэсты ў краіне (беларусы ловяць флэшбэкі)

У апошнія некалькі дзён у Тбілісі адбываліся акцыі пратэстаў – на фоне жадання ўрада прыпыніць перамовы Грузіі з Еўрапейскім звязам па еўраінтэграцыі. Падчас гэтых пратэстаў праваахоўнікі жорстка абыходзіліся з грамадзянамі – многія ў выніку былі дастаўленыя ў лякарні з траўмамі рознай ступені цяжкасці, а больш за сто грамадзян аказаліся пад вартай. Мітынгі разганяюць, у прыватнасці, з выкарыстаннем вадамётаў і слязістага газу.

На гэтыя падзеі адрэагавалі і зоркі спорту краіны – пераважна ў сацыяльных сетках з дэманстрацыяй відэа дзеянняў праваахоўнікаў. Хто проста асуджаў агрэсію, а хто наўпрост выступіў супраць прарасійскіх уладаў і за шлях Грузіі ў Еўропу.

Хвіча Кварацхелія, футбаліст «Напалі» і лідар зборнай

«Я сачу за падзеямі, якія адбываюцца ў нашай краіне, і хачу выказаць сваё меркаванне і пазіцыю як грамадзянін.

Жаданне і воля грузінскага народа – ісці па еўрапейскім шляху, гэта наш гістарычны выбар, адзіна правільны выбар, і адхіляцца ад гэтага шляху нельга. Гэтая краіна належыць народу, і ніхто не стаіць вышэй за волю народа.

Баліць маёй краіне, баліць майму народу, балюча і эмацыйна глядзець відэа, якія распаўсюджваюцца, спыніце гвалт і агрэсію. Сёння Грузія як ніколі заслугоўвае Еўропы».

Гіоргі Мамардашвілі, футбаліст «Валенсіі» (у арэндзе з «Ліверпуля») і лідар зборнай

«Сорамна!».

Гіоргі Цытаішвілі, футбаліст «Гранады» (у арэндзе з «Дынама» Кіеў)

«Мне вельмі шкада праз тое, што цяпер адбываецца ў маёй краіне. Цяпер мае сёстры там, каб бараніць сваю Радзіму. Наш шлях заўсёды быў у Еўропу – і мы не адступім ад яго! Я асуджаю гвалт».

Гіоргі Качарашвілі, футбаліст «Левантэ» і зборнай Грузіі

«Грузія заслугоўвае адзінства і справядлівасці. Балюча глядзець, як пакутуе наш народ. Наш голас і дзеянні павінны быць накіраваныя на найлепшую будучыню краіны».

Буду Зіўзівадзэ, футбаліст «Карлсруэ» і зборнай Грузіі

«Я заўсёды падтрымліваю народ Грузіі, які змагаецца за найлепшую будучыню для краіны. Я асуджаю гвалт. Немагчыма назіраць за тым, што сёння адбываецца ў Грузіі.

Грузія заслугоўвае таго, каб быць адзінай – і каб быць часткай Еўропы. Мой пункт гледжання ніколі не мяняўся. Месца Грузіі – у Еўропе».

Гіоргі Чакветадзэ, футбаліст «Уотфарда» і лідар зборнай Грузіі

«Вельмі цяжка, калі на маёй Радзіме так жорстка нападаюць на суайчыньнікаў. Гвалт павінен быць спынены. Будучыня Грузіі – гэта Еўропа. Гэты шлях патрабуе адзінства і вернасці міру. Грузіны з вамі».

Заза Пачулія, двухразовы чэмпіён НБА

«Цяжка глядзець на гэтыя кадры і не пратэставаць, калі грузін нападае на грузіна. Я асуджаю гэта і адмаўляюся ад любога гвалту. Грузія была, ёсць і будзе часткай Еўропы».

Бека Гігашвілі, лідар зборнай па рэгбі

«Шлях Грузіі – у Еўропу. Не здраднікам Радзімы! Не прарасійскім гвалтаўнікам!»

Давіт Нініяшвілі, гулец зборнай па рэгбі

«Цяжка глядзець на ўсё гэта здалёку. Дзякуй за барацьбу, дзякуй за вашае самаахвяраванне».

Гіоргі Квілітая, футбаліст «Арыса» беларускага трэнера Шпілеўскага

«Вельмі цяжка, калі на тваіх аднагодкаў, якія хочуць жыць у еўрапейскай Грузіі, так жорстка нападаюць. Моладзь, я з вамі».

Леван Мчэдлідзэ, экс-футбаліст зборнай Грузіі

«Не ведаю, што сказаць! Дзе ж трэба вырасці, каб праявіць такія няправільныя і нечалавечыя паводзіны!

Спачатку паліцыянт павінен выконваць усе законы, а потым ужо прасіць пра гэта звычайнага грамадзяніна. Грамадзян, якія сапраўды хочуць міру. Павага Грузіі і грузінскаму народу. Любіце адзін аднаго».

Анзор Меквабішвілі, футбаліст «Універсытаці»

«Я асуджаю ўсе віды гвалту, свабода грузінскага народа заўсёды была і будзе еўрапейскай будучыняй».

Саба Гаглічыдзэ, футбаліст «Эмпалі»

«Цяжка здалёк назіраць за тым, што сёння адбываецца ў маёй краіне. Нішто не можа выстаяць перад воляй і жаданнем грузінскага народа на шляху да перамогі. Трэба спыніць бесчалавечны гвалт супраць мірных пратэстоўцаў. Грузія была, ёсць і будзе часткай Еўропы».

Валеры Казаішвілі, футбаліст «Шаньдун»

«Так цяжка глядзець на ўсё гэта на адлегласці! Чаму грузінскі народ караюць за тое, што ён выказвае сваё меркаванне і хоча еўрапейскай будучыні? Я люблю вас і ганаруся ўсімі, хто змагаецца за свабоду нашай краіны».

Торніке Шэнгелія, лідар баскетбольнай зборнай Грузіі

«Грузінскі народ стагоддзямі змагаўся за свабоду. Ніхто не змог прыгнесці і паставіць на калені нашую нацыю. Усё гэта магчыма ў адзінстве. Тое, што адбываецца ў нашай краіне сёння, абсалютна непрымальна.

Жахліва глядзець на гвалт і гэтыя кадры побач з амерыканцамі. Я асуджаю гвалт. Наша будучыня – у Еўропе. Мір Грузіі і грузінскаму народу».

Фота: ANP/Hollandse Hoogte