Найлепшы гулец свету проста цяпер? Салах – у фантастычнай форме

«Ліверпуль» у эфектным стылі пацвердзіў сваё татальнае дамінаванне ў Англіі – без асаблівых праблем справіўся з крызісным «Манчэстэр Сіці» (2:0) і адарваўся ад найбліжэйшых праследавацеляў у табліцы ўжо на 9 пунктаў.

Пэп зноў прайграў: 10+ фактаў пра знішчэнне «Сіці» «Ліверпулем» у цэнтральным матчы АПЛ

Адзін са стваральнікаў гэтага выніку – Махамед Салах, які спачатку аформіў топавы асіст, а ў другім тайме рэалізаваў пенальці.

Егіпцянін знаходзіцца ў фантастычнай форме – і, падобна, прэтэндуе на свой найлепшы сезон у кар'еры, калі зможа ўтрымаць тэмп. Старт кампаніі ў выкананні вінгера відавочна заслугоўвае ўвагі.

📌 Пасля матчу з «Сіці» ў Салаха неверагодныя лічбы – 13 галоў і 11 асістаў у 20 матчах ва ўсіх турнірах, а таксама 11+7 у 13 турах АПЛ.

Па выніковых дзеяннях ў топ-5 лігах Махамед ідзе трэцім – саступае толькі Хары Кейну («Баварыя») і суайчынніку Амару Мармушу («Айнтрахт») з Бундэслігі. У АПЛ жа ён абсалютны лідар – апярэджвае Букаё Сака на чатыры пункты.

Аднак варта адзначыць, што 4 мячы былі з пенальці.

У спісе бамбардзіраў і асістэнтаў Салах другі – пасля Эрлінга Холанда і Сака адпаведна. Падрабязная статыстыка па АПЛ даступная ў тэгу на Tribuna.com.

📌 У сярэднім Махамед выконвае галявое дзеянне кожныя 67 хвілін ва ўсіх турнірах. І гэта пакуль найлепшы яго паказнік у кар'еры, які перасягае нават дэбютны год у «Ліверпулі» ў кампаніі 2017/18.

Тады, нагадаем, егіпцянін зрабіў 44+15 у 52 матчах, а з 32 галамі ў АПЛ пабіў рэкорд лігі ў фармаце з 20 камандамі – пакуль ізноў праз пару гадоў гэта не зрабіў Холанд.

Праўда, у той кампаніі «Ліверпуль» нічога не выйграў.

📌 З 20 матчаў сезона Салах толькі ў пяці не вызначаўся выніковымі дзеяннямі – у астатніх 15 абавязкова меў гол або асіст. Статыстыка ў АПЛ – 11/13, не пацярпелі толькі «Нотынгем» (0:1, адзіная параза) і «Крыстал Пэлас» (1:0).

Адпаведна, Салах рабіў розніцу амаль у кожным топ-матчы «Ліверпуля». Да гэтай катэгорыі аднясем 8 сустрэч, у якіх у яго 5+7.

📌 Больш за тое, Салах часам ледзь не самастойна выцягваў для мерсісайдцаў складаныя гульні, калі паспяховая серыя была блізкая да завяршэння.

▪️ «Іпсвіч» (2:0) – гол+пас пры ліку 0:0 у другім тайме, дэбют Арнэ Слота ў АПЛ тады праходзіў вельмі цяжка;

▪️ «Арсенал» (2:2) – гол на 81-й хвіліне пры ліку 1:2;

▪️ «Брайтан» (2:1) – гол на 72-й хвіліне пры ліку 1:1;

▪️ «Саўтгемптан» (3:2) – дубль у другім тайме пры ліку 1:2.

📌 Паралельна вінгер працягвае біць розныя рэкорды – напрыклад, перформанс з «Сіці» дазволіў яму зраўняцца з Уэйнам Руні па матчах у АПЛ, у якіх атрымоўвалася адначасова вызначыцца і голам, і асістам (па 36).

Здаецца, цяпер варта шукаць і рэкорды/мэты на перспектыву. Сярод такіх – трапленне ў топ-5 бамбардзіраў у гісторыі АПЛ – у Салаха цяпер 168 галоў, адставанне ад Серхіа Агуэра складае 16 мячоў. Наперадзе таксама Цьеры Анры (175) і Фрэнк Лэмпард (177).

Яшчэ адзін вельмі верагодны сцэнар – трапленне ў топ-7 сумарна па галявых дзеяннях, для гэтага трэба яшчэ 3, каб дагнаць Анры.

📌 Пакуль «Ліверпуль» будзе трымаць узровень, Салах будзе дакладна знаходзіцца сярод галоўных кандыдатаў на званне найлепшага гульца сезона.

Іранічна, што пры гэтым працягваюцца размовы пра падаўжэнне кантракту з клубам, які мінае ўлетку. Пасля перамогі над «Сіці» Махамед зноў выйшаў у публічную плоскасць – і зноў з неадназначнай заявай:

«Шчыра кажучы, гэтая сытуацыя з кантрактам сядзіць у мяне ў галаве. На гэты момант – гэта мая апошняя хатняя гульня супраць «Сіці» за «Ліверпуль», так што я хацеў проста атрымаць асалоду ад яе. Атмасфера была надзвычайнай – і я буду атрымліваць асалоду ад кожнай секунды, праведзенай тут. Спадзяюся, мы выйграем чэмпіянат, а там убачым, што далей».

Самы свежы апдэйт – Салах гатовы да пралангацыі кантракту нават на адзін год і хоча выйграць з клубам АПЛ, ЛЧ і «Залаты мяч». Зрэшты, егіпцянін усё больш расчараваны і раздражнёны тым, як клуб вядзе перамовы.

Фота: інфаграфіка Tribuna.com, Steven Halliwell/MI News, Simon Bellis/Sportimage