Фінал ЛЧ зрабіў Дэмбеле фаварытам за «Залаты мяч» – піяр-кампанія ўжо запушчаная

Фінал Лігі чэмпіёнаў паміж «ПСЖ» і «Інтэрам» меў вялікае значэнне не толькі для каманд, але і для асобных гульцоў. Не сакрэт, што ў футболе індывідуальны поспех для прэстыжных узнагарод трэба падмацоўваць таксама перамогамі клуба ў буйных турнірах – што, уласна, зрабіў Усман Дэмбеле.

Настолькі, што цяпер француз лічыцца галоўным прэтэндэнтам на «Залаты мяч». Але чаму? Паспрабуем прывесці прычыны пачатку піяр-кампаніі Дэмбеле і як яна выглядае.

Усман лідаруе ў большасці СМІ/букмекераў – перш за ўсё праз квадрупл, класныя лічбы і ролю ў топ-матчах

Перш за ўсё, зафіксуем, што поўл-пазішн сёння сапраўды займае Дэмбеле. Напрыклад, пасля фіналу ЛЧ ён узначальвае абноўлены рэйтынг прэтэндэнтаў у вядучых выданнях, якія заўсёды вядуць PowerRankings цягам сезона:

1️⃣ Усман – першы ў спісе Goal.com;

1️⃣ Усман – першы ў спісе FourFourTwo;

1️⃣ Усман – першы ў спісе GiveMeSport.

Усюды праследавальнікам француза на другой пазіцыі з'яўляецца Ламін Ямаль, які апярэджвае Рафинью з не менш фантастычным сезонам. Пры гэтым некаторыя букмекеры ўсё ж лічаць фаварытам Ямаля, але гэта выключэнні. Большасць жа ставіць на гульца ПСЖ – каэфіцыенты вагаюцца ад 1.5 да 2.5. У 17-гадовага іспанца – ад 3.5 да 5.0.

Павярхоўныя прычыны зразумелыя: Дэмбеле ў статусе галоўнай зоркі «ПСЖ» у гэтым сезоне ўзяў квадрупл (Суперкубак Францыі, Кубак Францыі, Лігу 1 і, самае галоўнае, Лігу чэмпіёнаў).

А яшчэ ў Усмана 48 выніковых дзеянняў у 49 гульнях: 33 галы і 15 асістаў. Гэта пяты паказнік сярод прадстаўнікоў еўрапейскіх чэмпіянатаў пасля Хары Кейна (51 у 46 матчах), Махамеда Салаха (57 у 52 матчах), Рафіньі (59 у 57 матчах) і Віктара Дзёркераша (65 у 51 матчах).

Трэці плюс француза – яго роля ў вялікіх матчах, асабліва ў Лізе чэмпіёнаў:

☑️ Гол «Ліверпуля» ў 1/8 фіналу, які дапамог атрымаць перамогу на «Энфілдзе» і дацягнуць да пераможнай серыі пенальці;

☑️ Па асісце ў кожным чвэрцьфінале супраць «Астан Вілы»;

☑️ Пераможны гол супраць «Арсенала» на «Эмірэйтс» у першым паўфінале (1:0) і асіст па выхадзе на замену ў другой гульні пры ліку 1:0.

☑️ Два асісты ў фінале супраць «Інтэра».

Карацей, усяго гэтага дастаткова для таго, каб прэтэндаваць на «Залаты мяч». Але каб быць менавіта фаварытам, неабходны яшчэ медыйны складнік – піяр-кампанія, якая, здаецца, ужо пачалася.

Прасоўваць Дэмбеле пачаў Луіс Энрыке: пахваліў за ахвярнасць для каманды – і гэта завірусілася ў сеціве

Уласна, менавіта складнік «медыйкі» здаваўся галоўнай перашкодай для Дэмбеле – улічваючы, на колькі светлавых гадоў па гэтым паказніку яго апярэджвае хайповы Ямаль. Аднак фінал ЛЧ калі не ўраўняў шанцы, то, прынамсі, стварыў нядрэнную канкурэнцыю, няхай галоўным героем матчу і стаў Дэзірэ Дуэ.

У Усмана была некалькі іншая роля. У першую чаргу можна зважаць на дзве выніковыя перадачы. Спачатку француз самастойна працягнуў мяч у контратацы аж да чужой штрафной, а затым ідэальна выразаў перадачу як раз на свабоднага Дуэ:

Ужо пры 3:0 швядой вывеў Кварацхелію сам-насам:

Ну і як не ўспомніць перадасіст пяткай у моманце з другім голам:

Аднак Луіс Энрыке пасля матчу звярнуў увагу на нечаканы аспект – расхваліў Дэмбеле за ахвярнасць для каманды і яго аб'ём працы:

💬 «Усіх цікавіць, каму б я аддаў «Залаты мяч». Я б аддаў яго Усману за тую самаадданую працу ў абароне, якую ён прадэманстраваў. Як ён абараняўся, як шалёна прэсінгаваў. Ці ёсць у свеце гулец, які яшчэ так прэсінгуе?

Гэта і ёсць сапраўднае лідарства. Ён рабіў гэта ўвесь час цягам сезона, але менавіта ў фінале – гэта было зусім на іншым узроўні».

Фраза ў выніку завірусілася ў сацсетках. У прыватнасці, відэа са сканцэнтраваным выразам твару футбаліста, калі ён рыхтаваўся да прэсінгу – як драпежнік на паляванні, які «не перастае бегаць»:

Падмацоўванне знайшлося і ў лічбах – француз у фінале зрабіў 55 (!) прэсінг-дзеянняў, больш за ўсіх на абедзве каманды.

За гэтым крыецца яшчэ адна цікавая гісторыя, якая таксама накладваецца на піяр Дэмбеле – відэа з мінулага сезона, на якім Энрыке адчытвае Кіліяна Мбапэ як раз за пасіўныя дзеянні без мяча.

💬 «Я чытаў, што табе падабаўся Майкл Джордан. Джордан хапаў сваіх партнёраў па камандзе за яйкі і абараняўся як шалёны. Ты павінен быць прыкладам для пераймання, як чалавек і як гулец.

Ты феномен, гулец сусветнага ўзроўню. Несумненна. Але для мяне гэтага недастаткова. Сапраўдны лідар – гэта той, хто калі не можа дапамагчы нам з галамі, таму што ўчора супраць цябе гулялі два гульцы высокага ўзроўню, той дапамагае нам ва ўсім, у чым трэба.

Гэта тое, што я хачу, каб ты рабіў. Як лідар тут. Дзве астатнія гульні. Я хачу, каб ты пайшоў праз вялікія дзверы. Без усялякага шкадавання».

А цяпер, маўляў, паглядзіце на розніцу паміж двума футбалістамі.

У Дэмбеле яшчэ будзе клубны ЧС, у Ямаля – не. Але яны сыдуцца ў Лізе нацый

Усман мае яшчэ адзін аргумент – верагодны поспех на клубным ЧС у ЗША, куды «ПСЖ» адабраўся, а «Барселона» з Ямалем і Рафіньяй не. У групе парыжане сустрэнуцца з «Атлетыка», «Батафога» і «Сіэтлам», а ў 1/8 могуць сустрэць кагосьці з чацвёркі «Порту», «Палмейрас», «Аль-Ахлі» (Егіпет) і «Інтэр» Маямі.

Усе групы і поўны расклад – у тэгу турніру на Tribuna.com

Аднак на гэтым тыдні будзе яшчэ адзін цікавы матч у гэтым кантэксце – паўфінал Лігі нацый паміж зборнымі Іспаніі і Францыі, дзе Ямаль і Дэмбеле выйдуць адзін супраць аднаго. Ламін ужо паспеў даць каментар:

💬 «Я з тых, хто галасуе па выніках усяго года. Калі ў чацвер што-небудзь пойдзе не так – як мне ці Дэмбеле таго не хочацца – што тады? Галасаваць за каго-небудзь іншага, хто згуляе ў фінале ў нядзелю? Калі хто хоча вырашыць лёс узнагароды адным матчам – добра, тады давайце згуляем».

На каго ставіце вы?

Фота: Justin Setterfield/Getty Images, Michael Regan/UEFA via Getty Images, скрыншоты трансляцыі MEGOGO