На чэмпіянаце свету сярод клубаў прыпыняюць матчы праз навальніцу – нават калі сонечна. Чаму так?

Клубны чэмпіянат свету па футболе стартаваў не без праблем. На некаторых матчах – кепска з наведвальнасцю, у іншых – бракуе відовішчнасці. А яшчэ турніру моцна перашкаджае надвор'е.

Першы інцыдэнт адбыўся перад пачаткам матча паміж «Ульсанам» і «Мамелодзі» (0:1). Гульня праходзіла ў Арланда, усё было гатова да старту, але галоўны арбітр Клеман Цюрпэн паклікаў да сябе капітанаў, каб абвясціць, што матч адкладаецца на некаторы час. Справа ў тым, што на горад насоўваліся тарнада з дажджом і маланкамі. Гледачоў таксама папрасілі пакінуць свае месцы і укрыцца на тэрыторыі вакол стадыёна.

Прайшоў дзень – падобная сітуацыя адбылася ў Цынцынаці. Там, праўда, каманды – «Пачука» і «Зальцбург» (1:2) – паспелі пачаць матч. Аднак на 54-й хвіліне арбітр Мустафа Гарбал спыніў гульню – і звёў каманды з поля. Неба над стадыёнам сапраўды выглядала пагрозліва.

Праз некалькі гадзін такое ж рашэнне прыняў англійскі арбітр Энтані Тэйлар – у матчы «Палмейрас» і «Аль-Ахлі». Праўда, калі ён абвясціў пра прыпыненне сустрэчы на 62-й хвіліне, над «Метлайф Стэдыум» у Нью-Джэрсі бесклапотна свяціла сонца. Аднак суддзю паведамілі, што існуе верагоднасць навальніцы, таму ён і прыняў такое рашэнне.

Чаму ж на турніры так асцярожна ставяцца да надвор'я?

Справа ў тым, што ў Штатах дзейнічае строгая забарона на правядзенне мерапрыемстваў падчас навальніцы – меры бяспекі дзейнічаюць нават на школьных турнірах. Канкрэтна на Клубным чэмпіянаце свету-2025 гаворка ідзе пра бяспеку гульцоў, трэнераў і гледачоў. Напрыклад, у Фларыдзе, дзе праходзіў матч «Ульсан» – «Мамелодзі», пагроза маланкі ў радыусе 16 км лічыцца важкай прычынай для спынення мерапрыемства, бо непагода можа рэзка наблізіцца і аказацца разбуральнай.

Таксама варта ўлічваць і рэкамендацыі ФІФА на выпадак непагадзі. Калі гром чутны на працягу 30 секунд – арбітр абавязаны спыніць матч мінімум на 30 хвілін і адправіць усіх ва ўкрыццё. Калі за гэты час зноў будуць зафіксаваныя маланка і гром, чутны не менш за 30 секунд – 30-хвілінны «таймер» скідаецца, і адлік пачынаецца наноў.

Так што магчыма, гэта не апошнія выпадкі прыпынення на турніры праз надвор'е. Цікава, колькі падобных сітуацый адбудзецца ў наступным годзе, калі ў ЗША будзе праходзіць чэмпіянат свету сярод зборных – бо матчаў там будзе яшчэ больш.

Фота: скрыншоты трансляцыі DAZN, Sebastian Frej/Getty Images, PAUL ELLIS/AFP via Getty Images, ANGELA WEISS/AFP via Getty Images