«Юве» канфліктуе з Улахавічам: хочуць прадаць ужо цяпер, а серб – сысці бясплатна праз год

Адна з галоўных трансферных саг на мяжы канфлікту гэтым летам адбываецца ў Турыне. Зорка клуба, Душан Улахавіч, і «Ювентус» пасварыліся наконт таго, як менавіта і калі будуць развітвацца: гэтым летам за грошы ці наступным – без кампенсацыі.

«Юве» хоча зарабіць на сербе – і фактычна ўжо дамовіўся пра яго замену

Кантракт Улахавіча, якога «старая сіньёра» купіла ў «Фіярэнціны» зімой 2022-га за 80+ млн еўра, падыходзіць да завяршэння ў чэрвені 2026-га. Працягваць яго абодва бакі не маюць намеру – мінулай восенню серб адхіліў прапанову падаўжэння кантракта, і ўсё на тым.

Цяпер «Ювентус», калі хоча адбіць хаця б частку заплачанай за Улахавіча сумы, мае толькі гэтае трансфернае акно – ужо ў студзені той зможа папярэдне весці перамовы пра пераход свабодным агентам. Сам серб плануе застацца ў «Юве» да канца.

І наадрэз адмаўляецца як сыходзіць, так і, паводле інфармацыі La Gazzetta dello Sport, падпісваць новы кантракт з памяншэннем зарплаты – цяпер атрымлівае, па розных звестках, ад 12 да 19,4 млн еўра ў год. У любым выпадку – гэта з адрывам самая высокая зарплата ў клубе.

Звесткі пра заробкі гульцоў у топ-лігах ужо даступныя уладальнікам Premium-падпіскі ў аплікацыі Tribuna.com на Android і iOS. Пампуйце!

Gazzetta адзначае, што паводзіны нападніка ўжо выклікаюць напружанне ў клубе, і кіраўніцтва не выключае варыянту, па якім гульца могуць адправіць у глыбокі запас па аналогіі з сітуацыяй вакол Федэрыка Кьезы.

Турынцы ўжо падабралі замену – Джонатана Дэвіда, які нарэшце пойдзе на павышэнне з «Ліля» свабодным агентам. Галоўнай праблемай там таксама стаў заробак – прапанова прыкладна ў 6 млн еўра з бонусамі ў сукупнасці з тым, што плацяць Улахавічу, стварае нагрузку на бюджэт клуба. Аднак канадзец ужо пагадзіўся на пераход.

А Джанлука ды Марцыа сцвярджае, што «старая сіньёра» акрамя Дэвіда яшчэ і плануе вярнуць у Серыю А Віктара Асімхена – гэта таксама амаль дакладна абыйдзецца ў капеечку.

За Улахавічам стаіць чарга – ён (пакуль) усім адмаўляе

За сітуацыяй сочаць некалькі зацікаўленых клубаў, якія хацелі б бачыць Улахавіча ў сябе. Аднак пакуль там не складаецца.

• «Мілан». «Расанеры» былі актыўныя ў сваім жаданні падпісаць сербскага нападніка ў пачатку чэрвеня – клуб быў гатовы прапанаваць Душану 5-гадовы кантракт з зарплатай у 7 млн ​​+ бонусы.

Улахавіч быццам бы і быў гатовы сысці, але перашкодай стаў заробак. Не дамовіліся і клубы: «Мілан» даваў 20 млн. еўра, «Юве» хацеў 25 млн. еўра.

• «Фенербахчэ». Жазэ Маўрынью быў бы не супраць бачыць у сябе Улахавіча – аднак той не хоча пакуль у Турцыю і чакае прапаноў топ-клубаў.

• «Аль-Ахлі» і іншыя саудаўскія клубы. Названы вышэй клуб прапаноўваў Улахавічу трохгадовы кантракт з заробкам у 20 млн. еўра ў год – серб адмовіў, як, падобна, і яшчэ некаторым неназваным клубам з Саудаўскай Аравіі.

• «Манчэстэр Юнайтэд». Паралельна развіваецца хісткая па надзейнасці крыніц гісторыя з абменам паміж «МЮ» і «Юве» – турынцы нібыта хочуць сабе Джэйдана Санча, а ў Манчэстэр гатовыя адправіць Улахавіча, Веа ці Дугласа Луіса. Праўда, ці трэба гэта «МЮ» – пытанне.

На КЧС Улахавіч забіў два галы і аддаў асіст у матчах групавога этапу з «Відадам» і «Ман Сіці» (адзіны поўны) – супраць «Рэала» у плэй-оф сядзеў у запасе.

Фота: Jonathan Moscrop/Getty Images, Joao Bravo/Sports Press Photo/Getty Images