У «Барселоны» процьма траўмаваных – хто з лідараў дакладна не згуляе супраць «Рэала»

Ужо 26 кастрычніка на «Бернабэу» згуляюць першае Эль-Класіка сезона, аднак у «Барселоны» за тыдзень да матчу такая сабе сітуацыя з траўмамі. З улікам і без таго не самай доўгай лаўкі запасных «блаўгранас», гэта можа стаць сур’ёзнай праблемай для Хансі Фліка.

Нагадаем, што на Tribuna.com вы можаце ўбачыць траўмаваных гульцоў любой каманды – яны пазначаны чырвоным крыжыкам каля прозвішча ў складзе. Як вось тут:

Доўгатэрміновыя траўмы

Марк-Андрэ тэр Штэген – тэрмін вяртання: студзень 2026 года

Немец атрымаў траўму спіны яшчэ на пачатку сезона, што справакавала цэлую эпапею з клубам, які на яго месца зарэгістраваў Жаана Гарсію. Цяпер траўмаваны і іспанец, таму даводзіцца зноў спадзявацца на Войцэха Шчэнснага.

«Не думаю, што гэта прыемная сітуацыя. Я быў у такой жа сітуацыі з «Ювентусам» і вырашыў завяршыць футбольную кар’еру. Я не раю гэтага Марку, таму што ён яшчэ можа шмат чаго прыўнесці ў футбол, але, думаю, часам у гэтай працы даводзіцца змірыцца з тым, што некаторыя рашэнні могуць быць балючымі», – кажа паляк пра свайго таварыша.

Да немца ёсць цікавасць з АПЛ, але той хоча далей гуляць у «Барсе». Вось толькі ён у ёй не гуляе, а гэты факт ідзе супраць жадання патрапіць на чэмпіянат свету – таму ўсё яшчэ можа змяніцца.

Гаві – тэрмін вяртання: люты 2026 года

Пасля траўмы медыяльнага меніска выбыў на 4-5 месяцаў, хаця на перадсезонцы «Барсы» быў адным з ключавых гульцоў.

Пашкодзіў тое ж калена, дзе былі разарваныя крыжападобныя звязкі. Спачатку траўму спрабавалі лячыць без аперацыі, аднаўленне мусіла заняць 5-6 тыдняў, аднак клуб усё ж рэкамендаваў правесці артраскапію.

Хірург, які рабіў аперацыю, быў непрыемна здзіўлены – траўма аказалася больш складанай, чым лічылася. Сітуацыя непрыемная, але іспанец не губляе аптымізму: «Тыя, хто мяне ведае, ведаюць, што я вярнуся столькі разоў, колькі будзе трэба, каб бараніць «Барсу».

Сярэднетэрміновыя траўмы

Жаан Гарсія – тэрмін вяртання: лістапад 2025 года

Пашкоджанне галкіпера падобнае да траўмы Гаві, але крыху лягчэйшае: разрыў унутранага меніска правага калена. Гарсія перанёс аперацыю, дактары даюць на аднаўленне 4-6 тыдняў. Аперацыю зрабілі напрыканцы верасня, таму ўвесь кастрычнік вылятае.

«Я бачыў яго летась у «Эспаньёле», і ён зрабіў на мяне велізарнае ўражанне, і пасля трох дзён сумесных трэнінгаў у «Барселоне» я вырашыў, што магу зрабіць свой невялікі ўнёсак у развіццё гульца, які, магчыма, стане найлепшым брамнікам свету. Я не кажу, што ён цяпер такім з’яўляецца, але бачу ў яго неверагодны патэнцыял», – казаў пра партнёра Шчэнсны.

Роберт Левандоўскі – тэрмін вяртання: сярэдзіна лістапада 2025 года

Адна з самых свежых траўм для «Барсы» – вельмі балючая, хоць паляк у гэтым сезоне і не з’яўляецца безумоўным лідарам атакі.

Левандоўскі гуляў за зборную супраць Літвы і пры ліку 1:0 у першым тайме адчуў дыскамфорт у тым жа месцы, дзе атрымаў траўму ў пачатку сезона. Вырашыў усё ж дагуляць сустрэчу да канца пасля таго, як медыкі наклалі адмысловую павязку – і нават адзначыўся мячом. Вось толькі пагоршыў пашкоджанне – і выбыў на месяц. Цяпер Эль-Класіка і яшчэ шэраг важных матчаў дакладна пройдуць без паляка.

У «Барсе» былі ў шоку, бо Левандоўскі заўсёды вельмі ўважліва ставіцца да свайго цела – і звычайна першым сігналізуе пра праблемы.

Дані Ольма – тэрмін вяртання: лістапад 2025 года

Паўабаронца таксама паехаў у зборную з пэўным дыскамфортам. У «Барсе» пра яго ведалі, але лічылі «нязначным» і таму не прызначалі дадатковага медабследавання. Пры гэтым Ольма не трэнаваўся ўвесь тыдзень, а зборная ўвесь час была на сувязі з «Барсай», каб адсочваць стан гульца, – пішуць каталонскія журналісты.

Тым не менш Дані выйшаў на трэнінг перад Грузіяй і падчас яго скардзіўся на праблемы з ікраножнай цягліцай. У «Барсе» была падрыхтаваная адмысловая справаздача, якая дазваляла не адпускаць гульца, як гэта зрабіў «Рэал» з Хёйзенам, аднак паўабаронца ўсё ж паехаў. Цяпер Ольма не будзе гуляць тры тыдні. У «Барсы» няма прэтэнзій да зборнай – вінаваты сам гулец, які рызыкнуў, баючыся за месца ў складзе на ЧС.

Блізкія да вяртання

Рафінья – тэрміны аднаўлення: канец кастрычніка – пачатак лістапада

Найбольш заблытаныя перспектывы ў бразільца. Рафа не ездзіў на матчы зборнай праз пашкоджанне, рыхтаваўся да гульняў за клуб, але яго нагнаў непрыемны рэцыдыў траўмы падкаленнага сухажылля.

У клубе правялі дадатковае МРТ, якое паказала, што магчымасць аднавіцца да класіка ўсё ж ёсць. Але супраць «Жыроны» ў мінулыя выходныя Рафінья не выйшаў.

Феран Торэс – можа вярнуцца да Эль-Класіка

Феран атрымаў траўму ў матчы супраць Грузіі і не выйшаў супраць Балгарыі. Гулец адчуваў боль у сухажыллі.

***

Пры гэтым праблема не толькі ў траўмах, але і ў фізічнай падрыхтоўцы ў цэлым. Па звестках Mundo Deportivo, 14 каманд Ла Лігі прабягаюць за матч большую дыстанцыю, чым «Барса». Хаця ў апошніх чэмпіёнскіх сезонах Фліка і Хаві каманда была сярод лідараў па гэтым паказніку.

Хуліа Тус, які ўзначаліў летась аддзел фізпадрыхтоўкі, абяцаў скараціць траўмы на 50%. Пэўныя поспехі былі, асабліва гэта адбілася на форме Педры, аднак ужо ў гэтым сезоне траўмы вярнуліся.

Фота: Grzegorz Wajda/SOPA Images/LightRocket via Getty Images/Miguel Fernandez/NurPhoto via Getty Images