Поле аднаго з аўтсайдараў ЧБ-2025 ганяць ледзь не ўсе – уключаюць у антырэйтынгі і ўвогуле называюць нефутбольным
Праз гэтую праблему гулец клуба не забіў у пустыя з мінімальнай дыстанцыі.
Стадыёну «Юнацтва», дзе прымае супернікаў «Смаргонь», у гэтым сезоне добра так дастаецца. 9 жніўня там гасцяваў канкурэнт па ніжняй частцы табліцы – «Слуцк» (0:0). Трэнер Аляксандр Гурыновіч распавёў, як спрабаваў цягам матча ставіць пазіцыйную гульню – і выказаў меркаванне, што якасць поля магла перашкодзіць яго плану.
Пасля апошняга тура ЧБ супраць «Віцебска» (0:2), не забыў выказацца пра стадыён і нядаўна прызначаны на ролю іх коўча Сяргей Гурэнка. Ён даваў каментар, які датычыўся іншага эпізода.
Гульца каманды абвінавацілі ў расізме да футбаліста «Смаргоні», а Гурэнка вырашыў яго абараніць, за адно дадаўшы пару ласкавых і пра якасць няшчаснага газону: «Поле ў горадзе не дазваляе гуляць у футбол».
Галоўнаму трэнеру «мядзьведзяў» Сяргею Дараховічу некалькі разоў ужо даводзілася апраўдвацца за якасць поля. 30 жніўня пасля матча з бяззменным лідарам табліцы «МЛ» (0:1), ад «букмекераў» у адрас газону прыляцеў эпітэт «пастка». Коўч «Смаргоні» абурыўся і заявіў, што «поле на дадзены момант добрай якасці, нармальнае».Таксама на «пастку» Дараховіч спасылаўся пасля пераможнай гульні ў Жодзіна (1:0), падкрэсліўшы, што вырашае якасць каманды, а не дрэнная якасць газона. І вось, адразу ж праз тыдзень, яго спыталі пра частыя падзенні падапечных у дамашняй гульні з «Нёманам» і тут Дараховіч сам пацвердзіў сумнеўны стан поля.
Не забываліся выказвацца і гульцы розных клубаў ЧБ – як толькі ў іх запытваліся на тэму якасці палёў, дык адразу ўзгадвалася тое самае. Данііл Сілінскі з «Гомеля» на пытанне пра «нацыянальны» стадыён, адказаў, што «ён – топ, не «Смаргонь». Уладзіслаў Варакса з «Мінска» пасля просьбы аб складзе антырэйтынгу назваў ужо чаканага фаварыта, а Раман Бегуноў са сталічнага «Дынама» наўпрост заявіў, што «поле – не футбольнае».
А кульмінацыяй стаў выпадак ужо з гульцом «Смаргоні». У матчы з «Віцебскам», на 88-й хвіліне пры ліку 0:2, левы абаронца «мядзведзяў» Аляксей Фірсаў не змог замкнуць прастрэл. Да брамы былі ўжо лічаныя сантыметры, а футбаліст наўпрост не патрапіў па мячы, які з хуткасцю чарапахі каціўся проста яму пад правую. Нібыта фэйл, але не ўсё так проста – пры павольным паўторы можна заўважыць, як мяч падскоквае за долю секунды да таго, як Фірсаў робіць рух нагой. Таксама на відэа бачна, як каля лініі брамы адсутнічае добры кавалак травы.
Іншыя пасты карыстальніка
