У фіксацыі гульні рукой усё складаней знайсці логіку – ёсць адно кардынальнае рашэнне гэтай праблемы

Першая палова гэтага тыдня абяцала быць цікавай на падзеі, бо ў Лізе чэмпіёнаў было адразу некалькі класных шыльдаў. Аднак таксама на адрэзку з панядзелка па сераду здарылася ажно тры спрэчныя рашэнні арбітраў наконт фіксацыі гульні рукой.

1) У панядзелак сенсацыйны навічок АПЛ «Сандэрленд» прымаў дома «Эвертан». Гульня завяршылася ўнічыю 1:1, але гаспадары могуць быць незадаволеныя – на 73-й хвіліне цэнтральны абаронца «ірысак» Майкл Кін рукой перапыніў падачу Садзікі ў штрафной пляцоўцы. «Сандэрленд» афіцыйна звярнуўся ў Прэм’ер-лігу з просьбай растлумачыць, чаму ў дадзеным эпізодзе не быў прызначаны пенальці.

2) Праз суткі ў той жа Англіі, але ўжо ў рамках матча Лігі чэмпіёнаў, здарыўся яшчэ адзін спрэчны эпізод – цяпер у матчы «Ліверпуля» і «Рэала». На 30-й хвіліне мяч патрапіў Чуамені ў руку – арбітр спачатку прызначыў штрафны, затым VAR заклікаў яго праверыць на прадмет пенальці. У выніку – ні пенальці, ні штрафнога, таму што гульні рукой, на думку суддзі, не было.

2) У сераду ўвечары адбыўся, мабыць, самы скандальны эпізод – «Аталанта» вырвала перамогу ў гасцях у «Марселя», забіўшы ў контратацы пасля вось такога вось траплення ў руку Эдэрсана. Раберта дэ Дзербі, трэнер французскай каманды, яшчэ і атрымаў жоўтую картку за спрэчкі з арбітрам.

У кожным з гэтых эпізодаў пры жаданні можна знайсці апраўданне рашэнням арбітраў. Цяпер у футболе мы ўсё часцей чуем словазлучэнне «прыроднае палажэнне». Правілы фіксацыі гульні рукой былі зменены некалькі гадоў таму ў спробе дадаць справядлівасці, бо сапраўды ў мінулым было нямала прыкладаў, калі гулец каманды, якая абараняецца, «прывозіў» пенальці ў сітуацыі, калі ён нічога не мог зрабіць з палажэннем сваёй рукі.

Але ці дадалі новыя крытэры фіксацыі справядлівасці? Магчыма, але дакладна не ў той ступені, у якой задумвалася. Да таго ж – нікуды не дзелася суб’ектыўнасць у рашэннях арбітраў. Чаму, напрыклад, некалькі тураў таму суддзя прызначыў пенальці ў вароты «Эвертана» ў дадзеным эпізодзе?

Партнёр Майкла Кіна па цэнтры абароны, Джэймс Таркоўскі, здаецца, меў яшчэ больш прыроднае палажэнне рукі, чым яго таварыш на прыкладзе вышэй. Аднак у гэтым выпадку рэферы указаў на кропку, а «Лідс» здабыў мінімальную перамогу.

А ці сапраўды рука Эдэрсана ў гульні супраць «Марселя» была ў натуральным палажэнні? Магчыма, натуральна было б, калі б яна знаходзілася на 5-10 сантыметраў вышэй ці ніжэй? Як вызначыць?

Ды і калі ўжо ісці шляхам пошуку прыроднага палажэння, то чаму б не прымяняць яго да ўсіх эпізодаў, якія патрабуюць дапамогі VAR? У мінулым туры Бундэслігі паўабаронца «Гамбурга» Імануэл Фераі атрымаў чырвоную картку праз дзве хвіліны пасля выхаду на замену. Сам па сабе цікавы факт, але не для гульца. У эпізодзе з другой жоўтай карткай ён урэзаўся ў суперніка, папярэдне крыху падслізнуўшыся. Выходзіць, што ў яго было натуральнае палажэнне пасля няўдалага кантакту буцы з газонам, проста потым ён «ссек» суперніка па інэрцыі. Цалкам магчыма, што калі б не гэтая дробная дэталь, ён згуляў бы ў мяч ці сфаліў бы не так цвёрда, як у выніку гэта выглядала падчас трансляцыі.

Падобна, тут ёсць толькі адно рашэнне, якое здыме 90% прэтэнзій да арбітраў. Яно гучыць так: парушэнне правіл фіксуецца пры любым кантакце мяча з рукой палявога гульца. Прыроднае палажэнне ці не – не важна. Ці была ў гульца магчымасць прыбраць руку пасля кантакту з іншай часткай цела – не важна. Мяч патрапіў у руку – гэта штрафны/пенальці/адмена гола.

Гэта можа здацца адкатам да правілаў футбола мінулага, калі часам суддзі памылкова фіксавалі фол у сітуацыях, дзе мяч і рука насамрэч не датыкаліся. Аднак цяпер, у адрозненне ад нулявых, у іх ёсць VAR. Задача спросціцца – трэба будзе проста зразумець па малюнку, ці быў кантакт мяча з рукой.

Вядома, цалкам выкараніць спрэчкі не атрымаецца. Будуць выпадкі, калі праблематычна будзе зразумець, а ці быў увогуле дотык. Аднак гэта дакладна знізіць колькасць скаргаў і афіцыйных тлумачэнняў ад трэнерскіх карпусоў. Ёсць нейкія пытанні? Глядзі стоп-кадр – там у большасці выпадкаў будзе выразна відаць.

Усе будуць гуляць па аднолькавых правілах: сёння ў твае вароты прызначылі пенальці, калі ты ніяк не мог прыбраць руку з траекторыі палёту мяча, у наступным туры – прызначылі пенальці ў вароты твайго суперніка ў падобнай сітуацыі.

***

Што думаеце з гэтай нагоды? Пішыце сваё меркаванне ў каментарах.

Фота: Lars Baron/Getty Images