«Тата нічога не зрабіў?» – дачка Шагойкі задала пытанне «МЛ» і набрала дзясяткі тысяч праглядаў, але хутка выдаліла відэа
У каментарыях экс-коўча «букмекераў» не толькі падтрымалі.
Аляксандр Шагойка ўзначаліў «МЛ» Віцебск перад пачаткам чэмпіёнскага сезона, але пасля няўдалай серыі з трох паразаў запар з ім развіталіся. Менавіта пры ім клуб набраў найбольшую колькасць балаў (52 з 67, 77,6%). Аднак кіраўніцтва клуба нават не павіншавала яго з золатам, замест гэтага бос «букмекераў» толькі падзячыў за працу.
Зрэшты Шагойка даволі спакойна адрэагаваў на такую несправядлівасць. А вось яго дачка Вікторыя была менш стрыманай. Дзяўчына вядзе свой блог у TikTok, часткова ён прысвечаны працы бацькі ў футболе. Відэа менавіта на гэтую тэму з’яўляюцца самымі папулярнымі – звычайна набіраюць дзясяткі тысячаў праглядаў, а часам нават больш за сотню.
На апошнім вертыкальным відэа 20-гадовая дзяўчына віншуе «МЛ» з чэмпіёнствам, аднак робіць гэта ў тыповай для яе акаўнта іранічнай манеры. Дачка задалася пытаннем: «Дык а медалёк дадуць, ці тата нічога не зрабіў для перамогі?». Трошкі больш, чым праз дзень, ролік быў выдалены.
Відэа ў той момант сабрала больш за 23 тысячы праглядаў, 526 лайкаў і 75 каментароў. У асноўным там «Сан Саныча» Шагойку падтрымліваюць, а Вікторыя актыўна дзякуе заўзятарам.
Не абыйшлося і без хейтэраў. Крытыкавалі як трэнера, так і «МЛ».
Аб’явіўся нават фанат з незвычайным аўтографам, пакінутым на 10-рублёвай купюры.
Іншыя пасты карыстальніка
