Канадскі футбольны блогер, збіраючы «джэрсі» па ўсім свеце, завітаў у Беларусь – паставіў на апошняе месца ў рэйтынгу
«Прыязджайце, калі хочаце выпіць гарэлкі і згуляць у казіно».
Ці шмат блогераў асвятляюць футбол у краінах, дзе ён не моцна развіты? А такія ёсць, прынамсі адзін. Яго завуць Маціас Буэна, мае партугальска-бразільскае паходжанне, але сам з Канады.
Ён вядзе інстаграм і тыкток, дзе ездзіць па ўсім свеце і збірае футболкі не самых папулярных зборных. У блогера ёсць і ютуб-канал, праўда апошняя публікацыя там адбылася 28 верасня 2025 года.
У тым відэа быў агляд рыхтык на Беларусь. Назва публікацыі – «Watching Football in Europe’s Last Dictatorship» («Гляджу футбол у апошняй дыктатуры Еўропы»). Маціас прайшоўся па Мінску, і ў пошуках «джэрсі» зборнай патрапіў толькі ў фан-шоп мінскага «Дынама» на стадыёне. А потым з мясцовым блогерам завітаў і на матч «бела-сініх» – то быў першы тур ЧБ-2025 са «Смаргонню» (1:0).
– Бразільцы гуляюць нават і тут, – падсумаваў блогер (адзіны мяч тады забіў Педра Ігар).
У перапынку беларус сказаў госцю:
– Калі хочаш выпіц гарэлкі і пагуляць у казіно, то прыязджай у Беларусь. Не каб паглядзець футбол.
Гэта падалося канадцу смешым.
Кароткі агляд на падарожжа зараз замацаваны ў інстаграме Маціаса – адзін з лідараў па лайках (44,4 тысячы). Ён звярнуў увагу на вялікую колькасць савецкай архітэктуры і скардзіўся, што складана знайсці форму каманд акрамя «Дынама».
На днях ён пачаў складаць рэйтынг з пяці узроўняў.
Буэна хацеў параўнаць развіццё і папулярнасць футбола ў розных краінах. З трох, на якія паспеў зрабіць агляд, толькі Славакію паставіў на перадапошняе месца, а Літва і Беларусь апынуліся на самым дне.
Прыязджаў Маціас і ў Расію. Досыць шмат кантэнту ён наздымаў, дзе распавядаў, што «нягледзячы на ізаляцыю, футбол тут усё яшчэ жывы і на добрым узроўні».
Тут ён набыў футболку зборнай і пахваліўся тым, што «знайшоў забаненую форму» – на чырвонай плошчы паўтарыў мем «шырокі Пуцін».
Іншыя пасты карыстальніка
