Футбольны клуб «МЛ Віцебск» (да 2024 года – «Макслайн») – беларускі прафесійны футбольны клуб з горада Віцебска. Заснаваны ў 1971 годзе. Да 2023 года прадстаўляў горад Рагачоў. У 2025 годзе стаў чэмпіёнам Беларусі ў свой дэбютны сезон у вышэйшай лізе. Клубныя колеры – жоўта-зялёныя.
Гісторыя
Клуб быў заснаваны 12 красавіка 1971 года ў горадзе Рагачоў. У савецкі час і ў першыя гады незалежнасці Беларусі каманда выступала ў ніжэйшых дывізіёнах пад назвамі «Аўтамабіліст», «КСМ», «Днепр» і «Рагачоў». У 2006 годзе з-за фінансавых праблем клуб спыніў выступленні на прафесійным узроўні і перайшоў у аматарскі чэмпіянат.
Новы этап пачаўся ў 2014 годзе з вяртання ў другую лігу. У 2021 годзе каманда атрымала назву «Макслайн» у гонар тытульнага спонсара і пачала імклівы ўздым, забяспечыўшы сабе выхад у першую лігу. У сакавіку 2023 года клуб змяніў прапіску, афіцыйна пераехаўшы з Рагачова ў Віцебск, каб адпавядаць інфраструктурным патрабаванням лігі.
У 2024 годзе віцебскі клуб заняў другое месца ў першай лізе, заваяваўшы прамую пуцёўку ў чэмпіянат Беларусі. 29 снежня 2024 года каманда змяніла назву на «МЛ Віцебск», бо рэгламент АБФФ строга забараняе выкарыстанне назваў букмекерскіх кампаній для клубаў вышэйшай лігі. У сезоне 2025 года «МЛ Віцебск» стварыў гістарычную сенсацыю, датэрмінова заваяваўшы першы ў сваёй гісторыі тытул чэмпіёна Беларусі.
Дасягненні
Чэмпіянат Беларусі
Чэмпіён: 2025
Першая ліга
Срэбраны прызёр: 2024
Другая ліга
Сярэбраны прызёр: 2021
Хатні стадыён
Галоўнай арэнай клуба з’яўляецца Цэнтральны спартыўны комплекс (ЦСК) «Віцебскі».
Умяшчальнасць: 8 100 гледачоў (асноўная арэна), 1 020 гледачоў (штучнае поле).
Пакрыццё: натуральны газон / штучнае пакрыццё.
Стадыён стаў хатнім для каманды з 2023 года пасля пераезду клуба ў абласны цэнтр.
Цікавыя факты
«Згушчонкавае дэрбі»: у часы базавання ў Рагачове матчы каманды супраць клуба з Глыбокага мелі асаблівы прынцыповы падтэкст і жартам называліся мясцовымі балельшчыкамі «згушчонкавым дэрбі» — у гонар спрадвечнай народнай спрэчкі пра тое, чыя згушчонка смачнейшая.
Барацьба за гледача: Пасля вымушанага пераезду ў клуба спачатку не было мясцовай фан-базы, і камандзе давялося канкураваць за новую аўдыторыю з гістарычным ФК «Віцебск». Кіраўніцтва зрабіла стаўку на агрэсіўны маркетынг: па ўсім горадзе развешваліся плакаты з футбалістамі, а на хатніх гульнях сталі рэгулярна праводзіць розыгрышы прызоў, наносіць бясплатны аквагрым для дзяцей і раздаваць клубную атрыбутыку. Гэта дапамагло «МЛ Віцебск» хутка сабраць аўдыторыю на новым месцы.
Навіны і пасты
