Цікавосткі статыстыкі ЧБ: «Дынама» Мінск вельмі перабрала балаў, у БАТЭ суцэльная бяда з атакай, самы востры гулец з Расіі
У зборную Беларусі было каго ўзяць замест Казлова.
Сабралі статыстычныя факты, якія найбольш уражваюць на стартавым адрэзку чэмпіянату Беларусі.
Мінскае «Дынама» вельмі перабрала балаў
Фота: ВК «Дынама» Мінск
Колькасць чаканых ачкоў (xP) паказвае, колькі клуб заслугоўваў пунктаў у залежнасці ад таго, што стварыў у чужой брамы і дапусціў ля сваёй. І галоўная анамалія па xP у ЧБ гэтага сезона – мінскае «Дынама». Пасля дзевяці тураў чакалася 13,1 ачка – а каманда набрала ажно 20.
Гэта кажа нам пра вельмі добрую рэлізацыю на старце сезона, але звычайна ўсю дыстанцыю так прайсці не атрымліваецца – найчасцей паказчыкі чаканых і рэальных пунктаў цягам чэмпіянату выраўноўваюцца. Для мінчан гэта кепскі сігнал.
Другі па пераборы балаў – «Мінск». Яго ўдачу, як і ў выпадку з «Дынама», пацвярджае нізкі ўзровень шматлікіх дадатковых паказчыкаў.
БАТЭ – найгоршая каманда ў атацы
Фота: телеграм-канал БАТЭ
БАТЭ сабраў сёлета сабраў ужо вельмі шмат кампліментаў: малады склад з клубнай легендай Арцёмам Канцавым у якасці трэнера ўзяў Кубак Беларусі. Але ў ЧБ барысаўчане выглядаюць куды горш – барацьба ўнізе табліцы, усяго адна перамога, 0:0 нават з найгоршай камандай лігі «Нафтанам».
Пакуль Барысаў – найгоршы ў ЧБ па атацы: 5 галоў – менш не забіў ніхто (столькі ж у навапалачан) – пры 7,55 чаканага гола (xG), гэта найслабейшы паказчык па лізе. Па ўдарах (84) і трапленнях у створ (29) БАТЭ ідзе перадапошнім, па кутніх (25) – апошнім.
Самы востры футбаліст – дэбютант ЧБ
З першых тураў склалася ўражанне, што 23-гадовы расіянін Кірыл Данілін заехаў у ЧБ ненадоўга. Вінгер «Гомеля» дэманстраваў класны і, галоўнае, вельмі дарэчны дрыблінг, пры гэтым таксама сваечасова знаходзіў партнёраў перадачамі. Ды яшчэ і паспеў аформіць па два галы і асісты за 9 тураў.
Фота: афіцыйны сайт «Гомеля»
Менавіта Данілін – лідар лігі па створаных галявых момантах, ажно 15. Таксама ён у топе па перадачах пад удар, ключавых пасах, дастаўцы мяча ў штрафную і частаце дрыблінгу. Замежнік паспеў і даць інтэрв’ю, дзе нібы адмыслова сабраў кампіляцыю стэрэатыпаў пра Беларусь ад сваіх суачыннікаў у Threads.
«Топы» па марнатраўству – у «МЛ» і «Славіі»
«Славія» сёлета, можна сказаць, стала ахвярай чаканняў пасля леташняга броназавага сезона. Па факце каманду пакінулі шмат ключавых выканаўцаў, а на замену прыйшоў не такі амбітны камплект футбалістаў без намацаных сувязяў. Пакуль мазыране з двума перамогамі ідуць у ніжняй палове табліцы.
Становішча магло быць нават так лепшым, калі б камандзе не бракавала рэалізацы. «Славія» мела момантаў на 13,73 xG, а вось аформіла ўсяго 7.
Галоўная асоба па частцы марнатраўства ў Мазыры – Цярэнцій Луцэвіч. Форвард меў момантаў ужо на 4,66 xG, а забіў двойчы. Ёсць таксама нераэлізаваны пенальці.
Фота: телеграм-канал «Славіі»
Напарнік Луцэвіча Андрэй Салавей у гэтым сезоне проста сам на сябе не падобны. Ён зусім не мае выніковых дзеянняў. Можа, каб гэта выправіць, гулец змяніў нумар на майцы з 13-га на 31-ы, але гэта не змяніла сітуацыі. Найлепшы па галах з гульні футбаліст мінулага сезона цяпер займае 211-е месца сярод 266 футбалістаў ва ўсёй лізе па індэксе RuStat. Пры гэтым толькі Салавей правёў за «Славію» ўсе 810 хвілін у ЧБ.
Але па згубленых момантах ён не апярэджвае Луцэвіча. Гэта ўдалося толькі аднаму чалавеку – малійцу Басеку Дыябатэ з «МЛ». Ён мае ў актыве 2 мячы, а па xG назбіраў 4,68 – на дзве сотыя больш за мозырскага калегу.
«Дняпро» каласальна залежыць ад Кірыленкі
Фота: телеграм-канал «Дняпра»
У «Дняпра», які цэліў на верхнюю палову табліцы, пакуль не атрымліваецца – адна перамога і 14-ы радок табліцы. Але магло быць яшчэ горш, каб не Кірыл Кірыленка. 25-гадовы вінгер забіў палову галоў усёй каманды – чатыры. І гэта ўжо яго асабісты рэкорд за адзін сезон ЧБ.
Таксама Кірыленка ў лідарах па ўсіх паказчыках атакі і нанёс амаль траціну ад ўсіх удараў «Дняпра» ў створ – 10 з 33. У персанальным рэйтынгу ўсіх футбалістаў лігі па індэксе RuStat вінгер забраўся на 10-ы радок.
У матчах таксама бачна, што ні з кім так шмат, як з Кірыленкам, не кантактуе галоўны трэнер «Дняпра» Станіслаў Сувораў: пастаянныя парады з броўкі, выклікі на персанальныя гутаркі падчас паўз, дыялогі пасля матчаў. Здаецца, маладому коўчу ўдалося спрацавацца з футбалістам, пра канфліктасць якога кажуць даўно.
Выклік Казлова ў зборную не вытрымлівае статыстычнай крытыкі
Фота: телеграм-канал «Нёмана»
З запасам самае спрэчнае рашэнне трэнера зборнай Беларусі Віктара Ганчарэнкі – выклік апорніка «Нёмана» Міхаіла Казлова. Гулец, які ўсё сваю кар’еру правёў у ЧБ, можа стаць самым узроставым дэбютантам зборнай.
Але, па-першае, не вельмі зразумела, для чаго камандзе ўвогуле трэці апорнік. Па-другое, Казлоў усяго 127-ы футбаліст ЧБ па індэксе RuStat, а яго ключавыя для апорніка метрыкі знаходзяцца на абсалютна сярэднім узроні. Напрыклад, па адборах Казлоў 63-і ў лізе, а яго працэнт пасяховых адзінаборстваў – усяго 59%. Аляксандр Свірэпа з «Іслачы» ці, напрыклад, Аляксей Бутарэвіч з брэстскага «Дынама» маюць лепшыя паказчыкі.
Іншыя пасты карыстальніка
