Іспанцы, што не далі «Нёману» пралезці ў еўравосень, ужо ў паўфінале ЛК – па дарозе «адпосмцілі» за трэнера-беларуса
Прэтэндуюць на першы трафей у гісторыі клуба.
У Беларусі ўжо распачаўся сезон-2026, а на элітным узроўні ўсё яшчэ разбіраюцца з еўракубкамі, што стартавалі летась. У іх найлепшым беларускім прадстаўніком стаў «Нёман», які дабраўся да плэй-оф кваліфікацыі ў Лізе канферэнцый, але за крок ад асенняга этапу быў разгромены іспанскім «Рая Вальекана».
Миж тым былы супернік гродзенцаў ужо ў паўфінале еўракубка – расказваем падрабязней пра шлях іспанцаў.
Аўтар дубля ў браму Гродна цяпер у топе ЛК па «гол + пас»
Фота: тэлеграм-канал «Нёмана»
«Нёман» матчы з «Рая» праводзіў у тыднёвым цыкле і з ЕС не выязджаў, а супернік паміж сустрэчамі меў яшчэ тур Ла Лігі. Акцэнт важнасці быў расстаўлены іспанцамі яшчэ з першага матча: супраць Гродна пераважна гуляў рэзервовы склад.
Пры гэтым усе мячы ў абодвух гульнях (0:1 і 0:4) былі забітыя ўжо пасля 64-й хвіліны, а вынік рабілі футбалісты, што выходзілі на замену. «Джокеры» забілі чатыры з пяці і аддалі два асісты (у астатніх мячах адсутнічаў аўтар перадачы). Асабліва тады адзначыўся 33-гадовы Альвара Гарсія – на яго рахунку 3+1 пры ўсяго 61 хвіліне супраць беларусаў на полі!
Вось яго гол у першым матчы (адзнака 1:13).
А вось (зноў) пераможны і апошні мячы ў другой сустрэчы (адзнака 0:15 і адзнака 1:57).
У асноўным этапе ЛК іспанскі форвард набраў яшчэ 3+3 – толькі пяць гульцоў турніру маюць болей. Праўда, у чвэрцьфінале Гарсія атрымаў траўму і быў вымушана заменены.
Па дарозе да паўфіналу выбілі клуб, які адправіў у адстаўку Маеўскага
Па дарозе да паўфіналу «Рая» нікому не забіваў болей, чым «Нёману». Тыя чатыры мячы ў браму каманды Ігара Кавалевіча ў гэтым сезоне мадрыдцы пераплюнулі толькі ў кубкавай сустрэчы на стадыі 1/64-й – тады абгулялі «Юнкас» з іспанскага Д6 6:1.
У асноўным раўндзе ЛК «Рая» набраў 13 пунктаў за 6 тураў і скончыў яго 5-м, што дазволіла прапусціць 1/16-ю і чакаць суперніка адразу ў 1/8-й.
На гэтай стадыі іспанцам патрапіўся турэцкі «Самсунспор». У першым – гасцявым – матчы «Рая» перамог 3:1, а дома саступіў 0:1.
Далей лёсаванне вывела іспанцаў на грэчаскі «АЕК». Да таго ў 1/8-й супернік па суме двух матчаў абгуляў «Цэле». Вырашальнай стала першая сустрэча, у якой славенцамі яшчэ кіраваў Іван Маеўскі. Менавіта параза 0:4 ад грэкаў стала фінальным ударам па кароткім адрэзку беларускага трэнера на чале «Цэле». У другім матчы без Маеўскага клуб са Славеніі змог адгуляць два мячы, але і саступіўшы дома, «АЕК» забяспечыў сабе сустрэчу з «Рая».
У выніку іспанцы разабраліся з грэкамі дома 3:0, а вось потым ледзь на страцілі перавагу ў гасцях – 1:3. На 51-й хвіліне грэчаскі клуб вёў 3:0 пры 30 тысячах заўзятараў на трыбцнах, але «Рая» справіўся з ціскам.
Фота: інстаграм-акаўнт «АЕК»
Цяпер «Рая» чакае паўфінал з французскім «Страсбурам», а ў другой пары згуляюць данецкі «Шахцёр» і «Крыстал Пэлас». Букмекеры ацэньваюць шанц іспанцаў на перамогу ў турніры як 1:5 – толькі «Шахцёр» у гонцы з’яўляецца большым аўтсайдарам.
Калі што, у гісторыі «Рая» няма трафеяў на найвышэйшым узроўні.
Дзе спыніліся іншыя супернікі белклубаў?
Фота: афіцыйны сайт «Лудагорца»
Мінскае «Дынама» ў кваліфікацыі ЛЧ спатыкнулася аб «Лудагорац», а потым канчаткова страціла шанцы на еўравосень у адобры ЛК супраць «Эгнаціі». Балгары ў выніку прабіліся ў групу Лігі Еўропы, дайшлі да 1/8 фінала, дзе саступілі венгерскаму «Феранцварашу» (2:1, 0:2). Албанцы ж вылецелі ў наступным для сябе раўндзе кваліфікацыі ад славенскай «Алімпіі» (0:0, 2:4).
Такі ж, як у «Эгнаціі», лёс напаткаў і тых, хто выбіў іншыя беларускія клубы ў ЛК. Чарнагорская «Суцьеска», ад якой у першым раўндзе вылецела брэсцкае «Дынама», следам выбыла ад ізраільскага «Бейтара» (1:2, 2:5). А ізраільскі «Макабі» Хайфа, які ў другім раўндзе адбору прайшоў «Тарпеда-БелАЗ», у наступным вылецеў ад польскага «Ракава» (1:0, 0:2).
Іншыя пасты карыстальніка
