Заўзятары абураюцца праз адстаўку Шпілеўскага – той амаль найгоршы трэнер «Пары НН» у часы РПЛ, але пляжаць кіраўніцтва

Аляксей Шпілеўскі афіцыйна звольнены з «Пары НН». Нараджэнец Беларусі кіраваў камандай цягам 33 матчаў і здабыў усяго сем перамог.

Ад самага пачатку працы 38-гадовы Шпілеўскі знаходзіўся пад шчыльным ціскам расійскіх экспертаў і былых футбалістаў, ад якіх пераважна прылятала за пафасныя выказванні. Коўч не раз заяўляў, што не будзе гуляць ад абароны, і сцвяржваў, што зробіць з аўтсайдара каманду з уласным ДНК. На практыцы склалася інакш.

«Пары НН» – гэта пастаянны андэрдонг прэм’ер-лігі з хаосам у кіраўніцтве ў найгоршых традыцыях рэгіянальных расійскіх клубаў. Калі б не яркія прамовы, чаканняў, магчыма, было б меней, але ў выніку прамежкавае 15-е месца Ніжняга Ноўгарада не адпавядае ні канкрэтным задачам, ні планам самога Шпілеўскага.

А што кажуць пра звальненне заўзятары? І каго ўзялі яму на замену? Расказваем.

Коўч пайшоў насустрач па грошах, у каментарах клуба – неразуменне

Фота: афіцыйны сайт «Пары НН»

Шпілеўскі скончыў працу ў «Пары НН» з паказнікам 0,76 бала за гульню ў сярэднім. Калі браць выключна сустрэчы прэм’ер-лігі, выйдзе 0,81 пункта – толькі адзін пастаянны коўч Ніжняга у перыяд расійскай «вышцы» дэманстраваў горшы тэмп у чэмпіянаце.

Пры гэтым навіна пра звальненне Шпілеўскага ў сацыяльных сетках «Пары НН» выклікала ў заўзятараў расчараванне. Гэта бачна і па пераважнай колькасці рэакцый, і па каментарах.

Людзі натхніліся планамі беларуса і адзначаюць яго адзрозненне ад папярэднікаў, а яшчэ больш акцэнтуюць увагу на прафнепрыдатнасці клубнага кіраўніцтва.

Цягам усяго сезона зверху расказвалі пра давер, але не вельмі паслядоўна звольнілі Шпілеўскага за тры туры да канца чэмпіянату – у самы адказны момант. Шанцаў на бяспечнае 12-е месца ў Ніжняга няшмат (чатыры балы адставання), але ад стыкаў каманда адставала ўсяго на два пункты.

Поўная табліца РПЛ на «Трыбуне»

Генменеджар клуба Віталій Карасёў сказаў, што сочыць за рэакцыяй заўзятараў, і пракаментаваў адстаўку дадаткова.

– Перастаноўкі на пасадзе трэнерскага штаба – гэта заўсёды ўзварушэнне для каманды. На наш погляд, на астатнія туры неабходныя новыя эмоцыі, энергія і тактычныя рашэнні. <...> У заўзятараў узнікае пытанне, чаму расставанне з Аляксеем Шпілеўскім і яго памочнікамі адбылося не раней. Мы да апошняга верылі ў наш трэнерскі штаб, даючы магчымасці для рэалізацыі ідэй і чакаючы канвертавання ў вынік, – сказаў Карасёў.

Фота: афіцыйны сайт «Пары НН»

Эксперты каментуюць сыход беларуса па-рознаму. Экс-футбаліста і каментатара Канстанціна Геніча здзівіў час адстаўкі: «Навошта? Чаму менавіта цяпер? Нейкая дзіўнае рашэнне, калі гэта шчыра».

Экс-гулец зборнай Расіі і паслядоўны хейтэр трэнераў без значнай гульнявой кар’еры Аляксандр Маставы выказаўся прадказальна: «Яго працу ацаню як «ніяк». Як яны дадумваюцца такіх запрашаць? Хто іх прапіхвае і прасоўвае?»

За скасанне кантракта Шпілеўскі атрымае кампенсацыю – гэта пацвердзіў гендыр Карасёў, дадаўшы, што з трэнерам атрымаўся «цывілізаваны дыялог», які дазволіў «істотна знізіць суму адступных». Паводле тэлеграм-канала «Sport Baza», клуб выплаціць беларусу 20 мільёнаў расійскіх рублёў – то бок каля 267 тысяч долараў.

На замену ўзялі медыятрэнера, які працаваў у камандзе з назвай энергетыка

Плынь негатыву ад заўзятараў не ўпала і пасля аб’явы новага трэнера – каманду прыняў 55-гадовы расіянін Вадзім Гаранін. Ён больш за паўтара года не працаваў у прафесійным футболе, галоўным у РПЛ быў толькі раз – тры з паловай гады таму ў «Сочы», а апошнім часам наогул узначальваў медыяфутбольны праект «Lit Energy».

Гаранін і Літвін на фоне. Фота: тэлеграм-канал «Lit Energy»

Гэта каманда з забаўляльнай аматарскай лігі належыць блогеру-прадпрымальніку Міхаілу Літвіну і названая ў гонар яго аднайменнага энергетычнага напою.

Сам Літвін не раз распавядаў, што дапамагае пуцінскай арміі у агрэсіі супраць Украіны: купляе машыны на фронт, перадае грошы ваенным і іх сям’ям.

Шпілеўскага адпраўляюць у «Кайрат», але беларус адмаўляе інсайды

Праз некалькі гадзін пасля звальнення ў тэлеграм-канале «ЖаркOFF» з’явілася інфармацыя, што Шпілеўскі можа прыняць «Кайрат». Казахстанская крыніца паведаміла, што беларус можа вярнуцца ў клуб, які ўжо ўзначальваў у 2019-2021 гадах, бо там «спяшаюцца ўмацаваць трэнерскую пазіцыю перад стартам міжнароднага сезона».

Фота: афіцыйны сайт «Кайрата»

Каманду Аляксандра Мартыновіча дагэтуль узначальвае Рафаэль Уразбахцін – пры ім алмацінцы летась узялі чэмпіёнства і выйшлі ў гістарычны асноўны этап ЛЧ.

На старце сезона-2026 «Кайрат» не правальваецца, але пэўныя цяжкасці мае. Каманда прагуляла Суперкубак у матчы з «Таболам» Максіма Мякіша (2:2, 4:5 па пенальці) і вылецела з Кубка ўжо на стадыі 1/8-й ад «Кайсара» (1:2). У нацыянальнай лізе калектыў лідаруе, але мае роўна балаў з «Ардабасы» – 15 пасля 7 тураў.

Сам Шпілеўскі такі кірунак катэгарычна адмаўляе: «У «Кайрата» выдатны трэнер і выдатны чалавек. На дадзены момант я нават уявіць не магу, каб заўтра пачаць дзесьці працу».