Капітан зборнай Беларусі і іншыя важныя гульцы за мяжой блізкія да вылету ў Д2 – у аднаго зусім сумныя расклады
Невыкліканы бамбардзір таксама пад пагрозай.
Адразу некалькі ключавых выканцаўцаў зборнай Беларусі са сваімі замежнымі клубамі проста цяпер знаходзяцца ў зоне вылету. У якіх краінах і ці ёсць шанцы на выратаванне?
Яўген Яблонскі, «Астэрас»
Фота: інстаграм-акаўнт «Астэраса»
30-гадовы паўабаронца пасля сыходу з БАТЭ ў пачатку 2022-га правёў 1,5 сезона за кіпрскі «Арыс». Потым паўгода быў без клуба, а ў 2024-м прыйшоў у «Астрэрас» – серадняк Д1 Грэцыі.
У зборнай Яблонскі даўно асноўны выбар на пазіцыю апорніка. У 2023-м дарос да капітанства, потым страціў павязку на час вяртання Аляксандра Мартыновіча, але цяпер вярнуў яе. Пры Віктары Ганчарэнку згуляў ужо 51-ы і 52-і матчы за каманду.
Пры гэтым у «Астэрасе» ў сезоне-2025/26 падпісант за рэжым пасля 28 тураў мае толькі 17 выхадаў на поле пры адным асісту. Апошні раз гуляў за клуб яшчэ 8 сакавіка, калі атрымаў чырвоную картку. А пасля дыскваліфікацыі і матчаў зборнай застаецца на лаўцы.
«Астэрас» цяпер ідзе на апошнім, 14-м месцы ў лізе, з 21 балам. Але шанцы ёсць – да выратавальнага 12-га радку ўсяго два ачкі, у апошніх чатырох сустрэчах каманда саступіла толькі раз, а цяпер пачаліся матчы ніжняй шасцёркі, таму гуляць з наўпроставымі канкурэнтамі. На тое, каб застацца, ёсць яшчэ восем тураў.
Павел Забелін, «Акрытас»
Фота: інстаграм-акаўнт «Акрытаса»
30-гадовы абаронца за мяжой з 2023-га. Пагуляў у казахстанскім «Таболе», «Сокале» з расійскага Д2, а цяпер выступае ў чэмпіянаце Кіпра за «Акрытас».
Забелін называў краіну «раем» і адзначаў камфорт сям’і. Па футбольнай частцы ў цэнтрбэка ўсё таксама было ў парадку: у клубе атрымліваў рэгулярны гульнявы час (23 матчы, 1+0) і дапамагаў трымацца на дыстанцыі ад зоны вылету. За зборную футбаліст меў 11 выхадаў у старце ў апошніх 12 афіцыйных матчах, згуляў і ў «таварняке» з Арменіяй пры Ганчарэнку.
Але «Акрытас» прагуляў апошнія пяць матчаў лігі. Цяпер з 26 баламі пасля 28 тураў займае 13-е месца з 14 каманд. У ніжняй васьмёрцы ад бяспечнай зоны клуб адстае ажно на пяць балаў – а засталося ўсяго пяць тураў. 19 красавіка – матч з нікасійскім «Алімпіякосам», калі і яго прайграць, усё будзе зусім складана.
Ды і ў зборнай вельмі добра праявіла сябе пара Захара Волкава і Івана Ціхамірава, таму статус Забеліна пры Ганчарэнку пакуль пад пытаннем.
Арцём Шуманскі і Кірыл Пячэнін, «Крылы Саветаў»
Фота: тэлеграм-канал «Крылаў Саветаў»
29-гадовы Пячэнін у Расіі гуляе з 2022-га. Першыя паўгода правёў у Д2 – потым яго «Арэнбург» падняўся ў прэм’ер-лігу, а яшчэ пазней гулец перабраўся ў «Крылы Саветаў». Вясной 2026-га ў клуб у арэнду з ЦСКА прыйшоў 21-гадовы Шуманскі.
Вінгер паспеў правесці за каманду пяць сустрэч у РПЛ, не набраўшы выніковых балаў. Пячэнін з пачатку сезона-2025/26 мае 24 выхады на поле у 24 турах, аформіў два асісты.
У РПЛ «Крылы Саветаў» цяпер маюць 22 балы і займаюць 13-ы радок з 16 каманд – знаходзяцца ў зоне пераходных матчаў з клубамі Д2. Ад зоны прамога вылету ёсць запас у два ачкі, а бяспечная пазіцыя зусім блізка.
Яшчэ нядаўна турнірнае становішча было не галоўнай праблемай самарскага клуба – яго ў прынцыпе магло не стаць. У студзені здарылася абвастрэнне фінансавых праблем, якія цягнуліся праз даўгі яшчэ з 2000-х гадоў.
Расійскі футбольны саюз наклаў на клуб траснферны бан, але ўжо ў лютым яго знялі. У сакавіку з’яўлялася інфармацыя, што ў камандзе два месяцы не плацяць заробкі футбалістам, але ў канцы таго ж месяца агент аднаго з гульцоў расказваў, што сітуацыя нармалізавалася.
Што тычыцца зборнай, то ў апошнія гады цяперашнія аднаклубнікі мелі розны уплыў на каманду. Пячэнін рэгулярна закрываў левы фланг: гуляў там і латэраля, і абаронцу. А Шуманскі скочыў паміж «моладзеўкай» і асноўнай зборнай і не спрацаваўся нават з дыпламатычным Карласам Алосам.
Але ў першых спарынгах Ганчарэнка даверыўся абодвум футбалістам. Яны двойчы выходзілі ў старце супраць Кіпра і Арменіі.
Бонус: Аляксандр Шасцюк, «Раднічкі» Ніш
Фота: афіцыйны сайт «Раднічкаў» Ніш
23-гадовы Шасцюк стаў найлепшым бамбардзірам «вышкі»-2025, а пасля працягнуў актыўна забіваць у Сербіі. Тым не менш, на апошнія спарынгі зборнай форвард не патрапіў, што выклікала публічныя дыскусіі.
Усяго за 10 матчаў Шасцюк стаў найлепшым бамбардзірам «Раднічкаў» у сезоне з 5 галамі. Першыя галы форварда прыносілі клубу ачкі, якія дазволілі не толькі паказаць найлепшую серыю з восені 2020-га ў чатыры запар перамогі ў афіцыйных матчах, але і выбрацца з зоны вылету.
Але за апошнія пяць тураў перад дзяленнем на васьмёркі «Раднічкі» набралі толькі бал і ўпалі на 13-е месца ў лізе. Яе скарачаюць да 14 каманд, таму цяпер з 16 клубаў вылятаюць адразу чатыры – адпаведна, каманда Шасцюка зноў у небяспечнай зоне. Цяпер у «Раднічкаў» ёсць сем тураў на тое, каб не вылецець, і ў табліцы ўсё вельмі шчыльна.
Іншыя пасты карыстальніка
