Шагойка не аматар зваротных замен, але ўжо двойчы так зняў Алыкулава – вось якія прычыны для гэтага бачныя
Не толькі эмоцыі цераз край.
Перайшоўшы перад пачаткам бягучага сезона ў мінскае «Дынама», кыргызстанец Гулжыгіт Алыкулаў казаў, што «на 50%» кіраваўся прызначэннем Аляксандра Шагойкі. На пытанне, ці падабаецца з ім працаваць, кыргызстанец упэўнена адказваў: «Канешне!»
Алыкулаў быў адным з самых яркіх гульцоў мінчан у міжсезонне, у спарынгах паспеў адзначыцца 4 мячамі. Але у афіцыйных матчах усё складаней. Свае 2+1 у 13 сустрэчах вінгер выбіў, але добрыя выхады на поле чаргуе з правальнымі. Ды ўжо двойчы футбаліст трапляў пад зваротную замену ад Шагойкі, які ў свой дэбютны сезон у вышэйшай лізе з «МЛ» наогул іх не рабіў (хаця ўсё ж калісьці вучыўся ў Анатоля Юрэвіча, майстра такіх крокаў).
Пасля свежай такой замены Алыкулаў выглядаў вельмі злым і выплюхнуў негатыў. Ці было за што яго вяртаць на лаўку?
Часцяком не спраўляецца з эмоцыямі
Фота: афіцыйны сайт «Дынама» Мінск
Праблема з агрэсіяй Алыкулава ўзнікла ад першага тура, калі вінгер раптам з разбегу махнуў рукою ды ўляцеў локцем у галаву абаронцу «Славіі» Паўлу Чыкідзе. Арбітр Віктар Шымусік чамусьці не паказаў ніякай карткі – і потым доўга не працаваў у ЧБ).
Потым гулец «Дынама» казаў, што не меў «дрэнных намераў» і хацеў проста спыніць суперніка – а атрымалася груба, але і самому яму раней «прылятала ў галаву» ад іншых, маўляў, гэта футбол.
Алыкулов объяснил, зачем ударил соперника локтем в голову и почему выбрал минское «Динамо»
Але ў першым кубкавым матчы з «МЛ» Алыкулаў зноў быў агрэсіўным. Спачатку гэта дапамагло: выйшаўшы на замену на 66-й хвіліне, вінгер дадаў эмоцый у атацы і паўдзельнічаў у першым голе сваёй камнды, зачапіўшыся за мяч у штрафной. Але на 74-й хвіліне, атрымаўшы па нагах ад Руслана Лісаковіча, Алыкулаў сконкнуў на суперніка і пхнуў проста ў твар.
Арбітр Дзмітрый Маркаў абодвум паказаў па жоўтай, неўзабаве дынамаўцы забілі. А на 85-й хвіліне Алыкулаў быў заменены на цэнтрбэка Максіма Швяцова – праз ўсяго 19 хвілін пасля выхада на поле. Выглядала гэта перастрахоўкай ад выдалення, няхай Шагойка пасля матча і сказаў, што замена быццам бы не звязана з папярэджаннем, а была зробленая проста для перахода на тры цэнтральныя абаронцы.
У матчы з БАТЭ рабіў памылку за памылкай – а на лаўцы сарваўся
20 траўня ў матчы 8-га тура з БАТЭ Алыкулаў зноў застаўся на лаўцы. На поле выйшаў на 63-й хвіліне пры ліку 0:0. У гэты момант Шагойка пайшоў на эксперымент: апусціў Карэна Варданяна на пазіцыю «дзясяткі», а кыргызстанца ўпершыню ў сезоне адправіў на правы фланг атакі замест левага.
Каманда ад такога рашэння не стала выглядаць лепш, а персанальна Алыкулаў меў вельмі шмат браку. Напрыклад на 70-й хвіліне загубіў вельмі перспектыўны выхад тры ў два – замест перадачы проста страціў кантроль над мячом (адзнака 2:14:48).
А на 73-й хвіліне абсалютна ў нікуды выканаў падачу са штрафнога. Адразу пасля буйным планам паказалі Шагойку, які задуменна чухаў скронь (адзнака 2:18:03).
Алыкулаў яшчэ некалькі разоў страчваў мяч – у прыватнасці, калі прымаў неаргументаваныя рашэнні. Аднойчы вырашыў пайсці ў дрыблінг на чатырох футбалістаў БАТЭ – быў лагічна лёгка спынены.
У дададзены час, праз 28 хвілін пасля выхаду на поле, кыргызстанец у другі раз у сезоне патрапіў пад зваротную замену – выйшаў зноў Максім Швяцоў. Алыкулаў нібыта бег замяняцца непасрэдна да калегі, аднак за пару метраў раптам завярнуў да лаўкі наўпрост (адзнака 2:35:26).
Шагойка працягнуў падапечнаму руку для звыклага поціску, але Алыкулаў толькі коратка пляснуў далонню па далоні трэнера, нават не паглядзеўшы ў яго бок.
Пасля чаго цалкам праігнараваў памочнікаў трэнера, з якімі таксама звычайна ціснуць рукі пасля замен, і пнуў бутэльку.
«Не зусім тое мы чакалі ўбачыць. Гэта ні ў якім разе не адлюстроўвае яго ўзровень майстэрства. Часам футбаліст не трапляе ў гульню. Рэдка, але такое бывае. Мне непрыемна рабіць зваротныя замены, я разумею стан футбаліста ў гэты момант. Але, на жаль, вырашылі так», – сказаў пасля матча галоўны трэнер «Дынама».
Ён і сам адпрацаваў даволі слаба: ідэі з Варданянам у ролі «дзясяткі» і Алыкулавым справа не далі плён, а Швяцова выпусцілі ў цэнтр абароны, каб адтуль Аляксей Іваноў, вядомы добрай гульнёй галавой, пайшоў у цэнтрфорварды. Але «фінальнага штурму» мінчукі так і не арганізавалі.
Па нашай інфармацыі, адразу пасля гульні галоўны трэнер паводзіў сябе ў раздзявальні даволі спакойна. Нейкіх размоў тэт-а-тэт з Алыкулавым наконт яго паводзінаў не было.
Іншыя пасты карыстальніка
