Тыя ж фанаты, што білі Хацкевіча, яшчэ і распранулі Шыкаўку – той увогуле стаў удзельнікам эпічнага правалу
Спусціўся па грошы з Экстракласы ў Д3, а там здарылася зусім нечаканае.
Усяго сем гадоў таму, у сезоне-2018/19, «Заглембе» з Сасноўца гуляў у Экстракласе – найвышэйным дывізіёне польскага футбола. Сёлета каманда звалілася ў Д4, і двойчы на гэтым шляху да правалу былі датычныя беларусы.
Раскаваем, як Яўген Шыкаўка не ўлічыў памылку Аляксандра Хацкевіча, паверыў у самы правальны праект польскага футбола апошніх гадоў і пад якія зневажанні патрапіў пад канец сезона.
Першым дасталося Хацкевічу, а футбаліст, які нібыта падгаварыў хуліганаў, дагэтуль у клубе
Нагадаем, што спачатку да паніжэння «Заглембе» спрычыніўся Аляксандр Хацкевіч. Ён узначаліў каманду падчас сезона-2022/23, калі тая ішла на апошнім месцы польскага Д2 і амаль не мела шанцаў на паратунак. Трэнер у выніку не прабыў у Сасноўцы і трох месяцаў, а кантракт быў скасаваны пасля скандальнай атакі хуліганаў-фанатаў «Заглембе» на трэнерскі штаб і футбалістаў падчас трэнавання.
Паводле слоў тагачаснага спартдыра клуба Міхаіла Залеўскага, падчас сутычкі Хацкевіча некалькі разоў спрабавалі стукнуць рукамі, адзін з хуліганаў, які напаў цішком, дасягнуў мэты.
«Удар одного Николаевич заблокировал, но второй ударил сзади исподтишка». Как атаковали Хацкевича
Фота: афіцыйны сайт «Заглембе» Сасновец
Што цікава, праз пэўны час пасля здарэння тагачасны ўкраінскі кіпер «Заглембе» Аляксей Шаўчэнка заявіў, што хуліганаў на коўча натравілі футбалісты-палякі. Адным з завадатараў, паводле Шаўчэнкі, быў 36-гадовы кіпер, імя якога ён не назваў. Праўда, пад апісанне пасаваў толькі Матэуш Кос, які ў прыватнай размове з украінцам нібыта нават прызнаў арганізацыю нападу.
Ветэран, якому сёння 39, дагэтуль у «Заглембе». На старце сезона ён правёў пару матчаў, але яшчэ ў версні-2025 знік з заяўкі.
З Шыкаўкам і самым вялікім бюджэтам у лізе «Заглембе» вылецеў ужо ў Д4
Праз пару тураў пасля сыходу Хацкевіча каманда афіцыйна вылецела, а наступны сезон – 2024/25 – скончыла на 9-м месцы ўжо ў Д3.
Фота: афіцыйны сайт «Заглембе» Сасновец
Перад стартам наступнага чэмпіянату да каманды далучыўся Яўген Шыкаўка. Трансфер па усіх параметрах быў вельмі нечаканым: беларус папярэдні сезон правёў у Экстракласе за «Карону», а яшчэ за месяц да пераходу гуляў за зборную Беларусі. Патлумачыць рэзкі даўнгрэйд можна было хіба што сур’ёзнымі намерамі клуба і выключнымі для лігі фінансавымі магчымасцямі. Прыблізна такую аргументацыю свайго рашэння агучыў і сам беларус: «Да выбару «Заблембе» Сасновец мяне схілілі выдатныя ўмовы, якія прапануе клуб».
Паводле партала igol.pl, бюджэт «Заглембе» на сезон-2025/26 складаў 12-13 мільёнаў злотых, у пераводзе на долары – прыблізна 3,3-3,6 мільёна. Выданне Przegląd Sportowy дадавала, што такія фінансы не мае ніводны іншы клуб лігі. Апроч гэтага, Сасновец на тле канкурэтаў па «міноры» вылучаўся адной з найлепшых баз у Польшчы і новым стадыёнам, што адпавядае еўракубкавым стандартам.
Але, нязгледзячы на шматлікія плюсы, «Заглембе» ўжо некалькі гадоў не можа вырашыць сваю галоўную стратэгічную задачу. Клуб намагаюцца перадаць у прыватныя рукі, але справа ніяк не рухаецца. Каманда працягвае фінсавацца гарадскімі ўладамі і жыве з пастаяннымі зменамі ў кіраўніцтве. Як бачна па выніках, да чагосьці добрага сённяшняя форма менеджменту не прывяла.
Фота: афіцыйны сайт «Заглембе» Сасновец
У сезоне-2025/26 «Заглембе» змяніў ажно чатырох трэнераў. Увогуле, былі класныя адрэзкі, калі каманда нейкі час нават ішла ў зоне плэй-оф за павышэнне, але ўжо перад зімняй паўзай стала зразумела, што Сасновец хутчэй будзе змагацца за захаванне прапіскі, чым за апгрэйд.
Форма Шыкаўкі таксама не была стабільнай. Большасць са сваіх 10 мячоў пры 30 выхадах на поле ён забіў падчас кароткіх выніковых адрэзкаў (пяць галоў – з 5-га па 10-ы тур і чатыры – з 20-га па 23-і).
Бадай, самым прыгожым атрымаўся пераможны ўдар супраць «Падхале» (1:0) у 22-м туры. Астатнія мячы беларус пераважна клаў пасля прастрэлаў і падач – як класічны завяршальнік.
Шыкаўка, які часам насіў капітанскую павязку, па выніках сезона стаў найлепшым бамбардзірам «Заглембе», але па лізе 10 гульцоў забілі больш за яго. Улічваючы статус ледзь не галоўнай зоркі Д3, наўрад ці беларус можна быць задаволены персанальнай статыстыкай. Паказальна, што два сезоны таму форвард меў тыя ж 10 мячоў – праўда, у Экстракласе.
Ну а «Заглембе» яшчэ за некалькі тураў да фінішу страціў шанцы на захаванне прапіскі ў Д3 наўпрост і змагаўся толькі за зону стыкавых матчаў. Такі вынік абсалютна не задавальняў хуліганаў з фан-сектара Сасноўца.
Фота: афіцыйны сайт «Заглембе» Сасновец
Варта адзначыць, што ў Польшчы паміж хуліганамі і звыйчанымі фанатамі існуе адчувальная розніца. Першых у мясцовых медыях даслоўна называюць «псеўдафанатамі». Прадстаўнікі гэтай групы, апроч непасрэднага заўзення, арганізавана займаюцца крымільнымі справамі, якія не датычаць футбола. Частка ультрас «Заглембе», якая ў 2023-м накінулася на Хацкевіча, – ідэальны таму прыклад.
Яшчэ больш свежы кейс – затрыманне ў сакавіку тых жа «псеўдафанатаў» Сасноўца, якія разам з хуліганамі клуба «Тыхі» займаліся вытворчасцю і продажам наркотыкаў. Парадокс у тым, што нават прынцыповае супрацьстаянне паміж калектывамі не замінала затрыманым ладзіць супольны «бізнес».
Тое, што рабілі прыхільнікі «Заглембе» ў апошняй сустрэчы сезона, таксама не вельмі падобна да фанатызму. У 34-м туры Сасновец прагуляў «Сандэцыі» (0:1) і афіцыйна пакінуў Д3 Польшчы, заняўшы 15-е з 18 месцаў. Цягам матча хуліганы скандавалі «Бойцеся, хамы!». А пасля гульні прымусілі ўсіх гульцоў Сасноўца, якія падышлі да фан-сектара, зняць і аддаць свае майкі. Не стаў выключэннем і Шыкаўка.
Зрэшты, традыцыяй з распрананнем у Польшчы карыстаюца не толькі ў «Заглембе». За тур за Сасноўца, свае майкі фанатам аддавалі футбалісты «Каліша» – той саступіў 0:3 якраз у гульні з камандай Шыкаўкі і пазбавіўся шанцаў захаваць прапіску яшчэ раней. «Здымайце, сука, усе майкі. Бо мы вас, сука, паламаем. Абяцаем вам», – гучала з трыбуны.
Паводле Transfermarkt кантракт 33-гадовага Шыкаўкі разлічаны да лета 2027-га – на такіх умовах перад сезонам-2025/26 падпісвалі многіх футбалістаў. Ці ўпадуць яны разам з «Заглембе» на рэгіянальны ўзровень – вялікае пытанне. Але, што б не здарылася ў міжсезонне, беларускі форвард ужо дакладна аформіў галоўнае падзенне ў нашым футболе за апошні год.
Іншыя пасты карыстальніка
