Цікавыя формы Алімпіяды: шэдэўр ад Манголіі, Luhta для фінаў, курткі амерыканцаў, якія можна надзьмуць

Алімпійскія гульні-2026 ў Мілане-Карціне нястрымна набліжаюцца – ужо 6 лютага адбудзецца цырымонія адкрыцця, а папярэднія спаборніцтвы і афіцыйныя трэнінгі ўвогуле ўжо пачаліся.

А як выглядаюць самыя цікавыя формы зборных? Паверце, тут ёсць на што паглядзець.

Манголія

Гэтая форма – у суб’ектыўным топ-1 аўтара гэтага тэксту. Усё таму, наколькі крута мясцовы вытворца Goyol прадставіў нацыянальныя элементы – як у цырыманіяльным стылі, так і ў кэжуале. Спаборнічаць спартсмены ў ёй, вядома, не будуць.

Вялікабрытанія

У дызайне цырыманіяльнай формы Ben Sherman закалабіліся з экс-скакуном у ваду Томам Дэйлі, які пасля завяршэння кар’еры з трайной сілай захапіўся сваім хобі – вязаннем. Ад студыі – непасрэдна адзенне, ад Дэйлі – шапкі і шалікі.

На цырымоніі адкрыцця атлеты выйдуць у блакітным варыянце, на закрыцці – у белы.

Adidas, які распрацоўваў форму непасрэднага для ўдзелу ў спаборніцтвах, таксама не адстаў у дызайнерскіх рашэннях. Больш фота тут.

ЗША

У бок вязання пайшлі і прадстаўнікі Злучаных Штатаў – гаворка, вядома ж, пра вопратку, а не пра дзеянні мясцовых сілавікоў. На цырымоніі адкрыцця амерыканцы апранаюць вязаныя швэдры з дзяржаўнымі сімваламі, а на іх – паліто з драўлянымі гузікамі. На цырымоніі закрыцця – проста клёвыя курткі.

Варта пазначыць і элемент паўсядзённай экіпіроўкі – куртку ад Nike, якая літаральна надзімаецца націскам адной кнопкі. Усё дзякуючы той жа тэхналогіі Air, якую Nike выкарыстоўвае ў дызайне красовак ужо дзесяцігоддзі.

Італія

Дызайн параднай формы італьянцаў – адна з апошніх работ Джорджа Армані перад смерцю ў верасні 2025-га. Прэзентавалі яе падчас Міланскага тыдня моды сёлета ў студзені.

Цырыманіяльная форма гаспадароў Алімпіяды мінімалістычная – снежна-белыя курткі з колерам сцяга і адной цікавай дэталлю, каштоўнай кожнаму італьянцу: тэкстам гімна Італіі на ўнутраным боку.

Ісландыя

Не адыходзячы далёка ад белых формаў, зазірнем у адну з нардычных краін. Мясцовы брэнд 66 ° North арганізаваў і адзін з самых халодных лукаў, і адну з самых халодных прэзентацый. Апошняе – у літаральным сэнсе.

Францыя

Адмовіліся ад яркасці і ў Le Coq Sportif. «Кожная адзінка адзення азначае ўнікальнае спалучэнне Парыжа і Мілана – дзвюх сталіц моды, аб’яднаных пад адным сцягам, пераасэнсаваным у яркім трохкаляровым матыве, натхнёным краявідамі і горнымі вяршынямі», – тлумачаць вытворцы.

Канада

Цырыманіяльная форма выклікала рэзананс у краіне – многія традыцыяналісты крытыкавалі сыход Lululemon ад традыцыйных чырвона-белых спалучэнняў. На гэты раз канадцы натхняліся колерамі Палярнага ззяння, леднікоў, айсбергаў і зямлі – атрымалася канцэптуальна.

Швейцарыя

А вось швейцарцы з Ohsner Sport паставіліся да задачы літаральна – лініі на форме сімвалізуюць сляды, якія пакідаюць канькі і лыжы, асноўныя інструмент перасоўванняў на зімовых пляцоўках.

Прысвяцілі гэтаму асобны прэзентацыйны ролік – адзін з найлепшых на гэтых Гульнях.

Нарвегія

Нарвежцы з Dale of Norway сёлета настальгуюць – вытворца формы ўпершыню апрануў зборную на зімовую Алімпіяду 1956 года, якая таксама праходзіла ў Карціне-д’Ампеца. Цяперашняя форма аддае даніну тагачаснай – але з мадэрновым поглядам на яе.

Фінляндыя

Luhta, мясцовы вытворца, які забяспечвае зборную цырыманіяльным і паўсядзённым адзеннем, сёлета натхняўся відамі Лапландыі – яе унікальнай прыродай і цішынёй. Вядома, у цэнтры ўвагі дызайну цікавы пераход ад снежна-белага колеру да цёмна-сіняга.

Украіна

НАК Украіны форму прэзентаваў у канцы кастрычніка 2025-га. Стыль – таксама мінімалізм, традыцыйныя сіне-жоўтыя колеры.

Поўны агляд камплекта правяла Аляксандра Мяркушына:

Фота: goyolcashmere.mn, Ben Sherman, Team GB, Le Coq Sportif, Lululemon, ochsner_sport, daleofnorway