«Медалю стужка не патрэбная» – што на Гульнях адбываецца з ўзнагародамі?
Паспеў пажартаваць нават саюз біятланістаў.
На Алімпіядзе-2026 ужо з першых дзён у спарстменаў ламаюцца медалі!
Спачатку пра гэта паведаміла шведская лыжніца Эба Андэрсан. Паломка здарылася, калі спартсменка бегла святкаваць сваё срэбра ў скіатлоне да суайчынніцы, якая здабыла золата:
«Гэта было па-дурному. Я даганяла Фрыду Карлсан, і ў гэты момант медаль раскалоўся на часткі і ўпаў у снег. Я спрабавала склеіць яго, але адна з трох частак згубілася на вуліцы».
Наступнымм быў нямецкі бронзавы прызёр па біятлоне ў змяшанай эстафеце Юстус Штрэлаў. Відэа, дзе ў яго медаль проста адлятае падчас святкавання з камандай, ён падпісаў так: «Эй, Алімпіяда, што з медалямі? 😉».
Спартсмен на месцы паспрабаваў адрамантаваць ўзнагароду.
Амерыканка Аліса Лю выйграла золата ў складзе зборнай па фігурным катанні, пасля чаго выклала відэа, дзе дэманструе медаль і стужку асобна з жартлівым подпісам: «Майму медалю стужка не патрэбная».
А яе суайчынніца гарналыжніца Брызі Джонсан паказала журналістам, што мацаванне, якое мусіць злучаць стужку з яе залатым медалём, проста развалілася.
«Медаль адназначна цяжкі. Цяжэй, чым я чакала. Магчыма, таму і зламаўся. Ён не так і моцна зламаны».
Акаўнт Міжнароднага саюза біятланістаў (IBU) апублікаваў у сацсетках пацешную просьбу:
«Брызі Джонсан, калі знойдзецца нехта, хто паправіць ваш медаль, накіруйце яго, калі ласка, да Юстуса Штрэлава».
У аргкамітэце Гульняў ужо заявілі, што ў сувязі з кепскай якасцю медалёў вядзецца расследаванне.
Іншыя пасты карыстальніка
