А хто да беларусаў выступаў на Алімпіядзе пад нейтральным сцягам? Сабралі некалькі цікавых гісторый

Беларускія спартсмены выступілі на Алімпіядзе ў Мілане пад нейтральным сцягам, гэта ўжо другія Гульні ў такім статусе. Прычынай гэтаму стала рашэнне МАК па адхіленні ў сувязі з удзелам у паўнамаштабным уварванні Расіі ва Украіну 24 лютага 2022 года.

Вядома, гэта не першы раз, калі атлеты прыязджаюць на Алімпійскія спаборніцтвы пад нейтральным сцягам. А ці былі сярод іх цікавыя гісторыі? Сабралі пару.

Фехаід Аль-Дыхані

У кастрычніку 2015 года ФІФА і МАК адхілілі Кувейт ад міжнародных спаборніцтваў. Прычынай стала палітычнае ўмяшальніцтва ў працу нацыянальных федэрацый. Пры гэтым асобныя спартсмены мелі права кваліфікавацца і выступаць у нейтральным статусе.

Такім чынам, на летнюю Алімпіяду 2016 года ў Рыа-дэ-Жанэйра патрапіў стралок па мішэнях Фехаід Аль-Дыхані. Ён заклікаў да адстаўкі кувейцкіх чыноўнікаў, адказных за забарону МАК, але адмовіўся несці алімпійскі сцяг на цырымоніі адкрыцця. У фінале мужчынскага двайнога трапу Аль-Дыхані перамог італьянца Марка Іначэнці і стаў першым кувейтцам, які выйграў залаты медаль.

Спартсмен сказаў, што ўзнагарода – лепшы адказ тым, хто не паказваў сцяг Кувейта на цырымоніях. Таксама ён падкрэсліў, што ўсе называлі яго «Фехайдам Кувейтам». «Я не прадстаўляў Алімпійскі камітэт, хутчэй, я прадстаўляў Кувейт».

Юсра Мардзіні

Плыўчыха Юсра Мардзіні нарадзілася ў Сірыі. У 2015 годзе дом быў разбураны падчас грамадзянскай вайны, пасля чаго яны з сястрой Сарай вырашылі бегчы. Пры пераправе з Турцыі ў Грэцыю лодка з 20 мігрантамі пачала тануць. Тады 17-гадовая Юсра, Сара і яшчэ два чалавекі тры гадзіны штурхалі судна да бліжэйшай выспы.

Мардзіні спрабавала кваліфікавацца на Алімпіяду ў Рыа ў плаванні на 200 метраў вольным стылем. Яна стала адной з дзесяці спартсменак, адабраных у нядаўна сфармаваную зборную бежанцаў. Юсра спаборнічала ў плаванні на 100 метраў вольным стылем і 100 метраў батэрфляем. У апошнім яна апярэдзіла чатырох плаўчынь і заняла 41-е месца, але для праходу ў паўфінал гэтага не хапіла.

«Мы дапамагаем ім ажыццявіць сваю мару аб спартыўным майстэрстве, нават калі ім даводзіцца ўцякаць ад вайны і гвалту» – сказаў пра спартсменаў-бежанцаў прэзідэнт МАК Томас Бах.

Мардзіні таксама ўдзельнічала ў летніх АГ-2020 года ў Токіа. Яна несла сцяг алімпійскай каманды бежанцаў на цырымоніі адкрыцця. У жаночым плаванні на 100 метраў батэрфляем яна скончла на этапе кваліфікацыі.

У траўні 2017 года Мардзіні стала самым маладым паслом добрай волі ААН па справах бежанцаў. 20 чэрвеня 2023 года, у Сусветны дзень бежанцаў, яна заснавала Фонд Юсры Мардыні для падтрымкі спорту і адукацыі для ўцекачоў.

У пачатку 2025 года Юсра вярнулася ў Сірыю пасля прыкладна 10 гадоў у выгнанні. Яна наведала свой стары трэніровачны басейн каля Дамаска. Мардзіні распавяла як у дзяцінстве марыла стаць алімпійкай менавіта тут, і што то ў яе басейн аднойчы прыляцела ракета, але ён ацалеў.

ВІДЭА