Навошта Беларусі натуралізаваныя расіяне ў горных лыжах? Паспрабаваў патлумачыць прывазны спартсмен, баронячы суайчынніцу

У алімпійскім слаламе-2026 Беларусь, няхай і ў нейтральным статусе, прадстаўляла расіянка Марыя Шканава. За нашую краіну яна выступае з 2008 года, а гэтыя Гульні для яе сталі пятымі ў кар’еры. Спартсменка заняла выніковае 37-е месца сярод удзельніц. Гэта яе найгоршае месца на Алімпіядах у слаламе з 2010 года, калі стала 38-й.

У нейкі час пасля першай спробы 36-гадовая нараджэнка яшчэ савецкага Ленінграда ўвогуле была апошняй. Гэты факт зафіксаваў тэлеграм-канал «Спорт Беларусі».

Адзін з каментатараў зазначыў, што расіянка ганьбіць Беларусь.

Што цікава, год таму Шканава казала, што патрапіць на Алімпіядзе ў топ-15 – «цалкам рэальна». На папярэдніх Гульнях у слаламе яна была 20-й – так што гэтым разам здарыўся істотны адкат. Але калі глядзець назад, то расіянка ніколі не набліжалася да алімпійскіх медалёў.

Тым не менш пад навіной у спартсменкі знайшоўся абаронца. Яго ролю на сябе прымерыў Юры Данілачкін – таксама былы гарналыжнік, які выступаў за зборную Беларусі.

34-гадовы Данілачкін таксама расіянін і нарадзіўся ў тым жа горадзе, што і Шканава. Грамадзянства на беларускае змяніў летам 2010 года і выступаў за нашую краіны да восені 2019-га.

Карыстальнікі не разумелі, навошта завазіць у Беларусь расійскіх спартсменаў, якія не здольныя замахнуцца на высокія месцы. Сам Данілачкін на Алімпіядах – паспеў з’ездзіць на дзве – вышэй за 31-е месца не ўздымаўся. Абаронца напіраў на тое, што Шканава «патрыёт» (пасля выбараў-2020 падпісалася ў падтрымку беззаконня) і ўвогуле ёсць прадуктам сістэмы беларускага спорту.

Увогуле, спачатку Данілачкін і не казаў, што ён Данілачкін. Высветлілася гэта выпадкова – калі апанент прывёў яго як яшчэ адзін прыклад няўдалай натуралізацыі.

Былы спартсмен пачаў расказваць, як цяжка вырасціць пакаленне гарналыжнікаў (асабліва ў краіне, дзе няма гор). Данілачкін гэтым якраз займаецца.

У выніку спрэчка дайшла да вайны. Данілачкін нагадаў, што праз яе беларусаў не дапускаюць на міжнародныя старты, а расіяніну Данілачкіну нагадалі, хто яе распачаў.

Сам Данілачкін пасля завяршэння спартыўнай кар’еры застаўся жыць у Беларусі. Кіруе гарналыжным клубам, працуе інструктарам, а яшчэ адкрыў залу гарналыжных трэнажораў і займаецца продажам саміх горных лыжаў. Кажа, што сярод выхаванцаў ёсць пераможца юнацкага чэмпіянату Беларусі па горных лыж. Але ці будзе гэты хлопец заменай натуралізаваным расіянам, на сёння казаць рана.