Не толькі Швецыя: хто праваліўся на еўрапейскай кваліфікацыі ЧС, а хто перавысіў чаканні

Зборная Беларусі традыцыйна не выйшла ў фінал ЧС, але яшчэ і набрала антырэкордныя для сябе 2 пункты (раней на адборах прынамсі было 3). Перад Карласам Алосам ужо напачатку стаяла невыканальная задача – заняць другое месца ў групе з Шатландыяй, Даніяй і Грэцыяй. З такім раскладам два балы – не такі і сумны вынік. Хіба што 17 прапушчаных мячоў і толькі чатыры забітыя дадаюць моцнага «дзёгцю». Хто яшчэ праваліў кваліфікацыю, а хто выступіў лепш, чым чакалася? Падсумоўваем першую частку еўрапейскага адбору.

Швецыя – галоўны правал турніру

Скандынавы не змаглі ні разу перамагчы ў групе з Швейцарыяй, Косава і Славеніяй. А ў складзе некалькі сапраўдных топ-гульцоў: Дзёкерэш, Ісак, Ліндэлёф. Здабылі толькі два балы і занялі апошняе месца. Прычым адзіны разгром (1:4 ад Швейцарыі) адбыўся ўжо пры Грэме Потэры – новым трэнеры, прызначаным пасля страты шанцаў выйсці з групы. Каманда заняла апошняе месца з 2 баламі.

Аднак у шведаў ёсць яшчэ шанцы трапіць на мундыяль. Усё дзякуючы Лізе нацый – там каманда заняла першае месца і цяпер будзе змагацца за апошнія чатыры пуцёўкі на ЧС. Праўда, іх разыграюць паміж 16 камандамі.

Балгарыя – да апошняга туру было зусім сумна

Калі ў шведаў вырасла даволі добрае пакаленне гульцоў, то ў балгараў – крызіс. Няма ні гучных імёнаў, ні добрага развіцця ўнутранага чэмпіянату – толькі «Лудагорац» прадстаўляе краіну на еўракубках, праўда, у ЛЕ. Не падфарціла балгарам і група: Іспанія, Турцыя і Грузія – шанцаў ад пачатку было няшмат. У выніку – 19 прапушчаных мячоў і толькі тры забітыя, найгоршы паказнік сярод груп з чатырма камандамі. 4-ае месца ў групе, 3 пункты і адзіная перамога намі грузінамі ў апошнім туры.

Грузія – чакалася большага

У грузін цяпер адно з найлепшых пакаленняў, аднак каманда набрала толькі тры балы і на развітанне нават саступіла балгарам. Гульня ў Сакартвэла не заладзілася з першага тура: каманда ў Тбілісі прайграла туркам 0:3 і толькі пад канец матча змагла сысці ад разгрому – 2:3. Аднак ужо праз месяц грузіны праваліліся ў Турцыі: 0:3, і ў 4-м туры страцілі шанцы на выхад. У выніку: 3 пункты і трэці радок.

Фарэры – галоўная нечаканка адбору

Большасць гульцоў зборнай гуляе ў паўпрафесійным мясцовым чэмпіянаце. Так, «Клаксвік» улетку паказаў, што нават электрыкі могуць нароўных біцца супраць «Нёмана». Да апошняга туру зборная захоўвала шанцы на другое месца ў групе з харватамі, чэхамі, чарнагорцамі і гібралтарцамі. У выніку – 12 балаў, трэцяе месца, перамога над Чэхіяй і +2 у розніцы забітых і прапушчаных. Чакаем на Еўра?

Сербія і Венгрыя біліся годна

Гэтыя зборныя вылецелі з адбору, але занялі трэція месцы. Сербы набралі 13 пунктаў, іх толькі на адзін бал іх апярэдзілі прынцыповыя супернікі – албанцы. У вырашальным матчы ў Бялградзе Сербія мінімальна саступіла – 0:1. Першае месца ў групе заняла Англія, якая ў адборы набрала 24 з 24-х магчымых пунктаў.

Венгрыя таксама да апошняга туру захоўвала шанцы на выхад у стыкавыя матчы. Але ў вырашальнай гульне дома саступіла ірландцам – 2:3. Вынік: 8 пунктаў і трэці радок.

Вынікі ўсіх матчаў у еўрапейскай кваліфікацыі ЧС – у зручным матчцэнтры «Трыбуны»